ଓ୍ବାଶିଂଟନ୍,୨୧।୫:ଇରାନ ବିରୋଧରେ ଫେବୃଆରୀ ୨୮ରେ ଆମେରିକା ଆରମ୍ଭ କରିଥିବା ସାମରିକ କାର୍ଯ୍ୟାନୁଷ୍ଠାନ ଏପିକ୍ ଫ୍ୟୁରିରେ ଓ୍ବାଶିଂଟନ ଲଢ଼ୁଆ ଜେଟ୍ ଓ ଡ୍ରୋନ୍ ସମେତ ୪୨ଟି ବିମାନ ହରାଇଥିବା ଏହାର ଏକ ସରକାରୀ ରିପୋର୍ଟରେ ପ୍ରକାଶ ପାଇଛି। ଆମେରିକା କଂଗ୍ରେସର ରିସର୍ଚ୍ଚ ସର୍ଭିସ ରିପୋର୍ଟ ଅନୁଯାୟୀ, କ୍ଷତିଗ୍ରସ୍ତ ଓ ନଷ୍ଟ ହୋଇଥିବା ବିମାନ ସଂଖ୍ୟାରେ ଆଗାମୀ ଦିନରେ ପରିବର୍ତ୍ତନ ହୋଇପାରେ, କାରଣ ଏହା ବର୍ଗୀକରଣ, ଚାଲିଥିବା ଯୁଦ୍ଧ କାର୍ଯ୍ୟକଳାପ ଏବଂ କ୍ଷତିର ପ୍ରକୃତ କାରଣ ଭଳି ଅନେକ ବିଷୟ ଉପରେ ନିର୍ଭର କରେ। କ୍ଷତିଗ୍ରସ୍ତ ହୋଇଥିବା ଯୁଦ୍ଧବିମାନ ମଧ୍ୟରେ ରହିଛି ୪ଟି ଏଫ୍-୧୫ଇ ଷ୍ଟ୍ରାଇକ୍ ଇଗଲ ଲଢ଼ୁଆ ଜେଟ୍, ଗୋଟିଏ ଏଫ୍-୩୫ଏ ଲାଇଟ୍-୨ ଲଢ଼ୁଆ ବିମାନ, ଗୋଟିଏ ଏ-୧୦ ଥଣ୍ଡରବୋଲ୍ଟ-୨ ସ୍ଥଳ ଆକ୍ରମଣ ବିମାନ, ୭ଟି କେସି-୧୩୫ ଷ୍ଟ୍ରାଟୋଟ୍ୟାଙ୍କର ଏରିଆଲ ରିଫୁଏଲିଂ ବିମାନ, ଗୋଟିଏ ଇ-୩ ସେଣ୍ଟ୍ରି ଏଡବ୍ଲ୍ୟୁଏସିଏସ୍ ବିମାନ, ୨ଟି ଏମ୍ସି-୧୩୦ଜେ କମାଣ୍ଡୋ-୨ ସ୍ବତନ୍ତ୍ର ଅପରେଶନ ବିମାନ, ଗୋଟିଏ ଏଚ୍ଏଚ୍-୬୦ଡବ୍ଲ୍ୟୁ ଜୋଲି ଗ୍ରିନ୍-୨ ହେଲିକପ୍ଟର, ୨୪ଟି ଏମ୍କ୍ୟୁ-୯ ରିପର ଡ୍ରୋନ୍ ଓ ଗୋଟିଏ ଏମ୍କ୍ୟୁ-୪ସି ଟ୍ରିଟନ ଡ୍ରୋନ୍। ଆମେରିକା କଂଗ୍ରେସର ହାଉସ୍ ଆପ୍ରୋପ୍ରିଏଶନ୍ସ ଉପକମିଟିରେ ଶୁଣାଣି ବେଳେ ପେଣ୍ଟାଗନ୍ର କାର୍ଯ୍ୟକାରୀ କମ୍ପଟ୍ରୋଲର ସାକ୍ଷ୍ୟ ଦେଇ ଇରାନ ବିରୋଧରେ ସାମରିକ ଅଭିଯାନର ବିଭାଗୀୟ ଖର୍ଚ୍ଚ ଆକଳନ ୨୯ ବିଲିୟନ ଡଲାର ହେବ ବୋଲି କହିଛନ୍ତି।
Dharitri – Odisha’s No.1 Odia Daily
