ବୈଶିଙ୍ଗା,୨୧।୫(ରତନ ଦାଶ): ମୟୂରଭଞ୍ଜ ଜିଲାର ବୈଶିଙ୍ଗା ଥାନା ଅର୍ନ୍ତଗତ ଗଣେଶ୍ବରପୁର ଗ୍ରାମରେ ଏକ ଛାତିଥରା ହତ୍ୟାକାଣ୍ଡ ହୋଇଛି । ବୁଧବାର ରାତିରେ ଜନୈକା ୫୦ ବର୍ଷିୟା ମହିଳାଙ୍କୁ ହତ୍ୟା ହୋଇଯାଇଥିବା ସୂଚନା ମିଳିଛି । ମହିଳା ଜଣକ ହେଉଛନ୍ତି ସ୍ଵର୍ଗତ ରାଧୁ ସିଂଙ୍କ ପତ୍ନୀ ଅନିତା। ତାଙ୍କର ଏକ ମାତ୍ର ପୁଅ ସୁଦୂର ପୁଡୁଚେରୀରେ ରହି ଚାକିରି କରୁଥିବା ବେଳେ ଅନିତା ଗାଁରେ ନିଜ ଘର ସମ୍ମୁଖରେ ଏକ ଚକୋଲେଟ୍, ବିସ୍କୁଟ ଦୋକାନ କରି ଜିବୀକା ନିର୍ବାହ କରୁଥିଲେ।
ଗୁରୁବାର ସକାଳେ ତାଙ୍କ ଦୋକାନକୁ କିଣାକିଣି କରିବାକୁ ଆସିଥିବା ଲୋକେ ଶୋଇବା ଘରେ ଉଲଗ୍ନ ଅବସ୍ଥାରେ ତାଙ୍କ ମୃତଦେହ ପଡ଼ିଥିବା ଦେଖି ପୋଲିସକୁ ଖବର ଦେଇଥିଲେ। ଥାନାଧିକାରୀ ବାରିଣୀ ଦାସ ପୋଲିସ ଟିମ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ମୃତକଙ୍କ ଶରୀରର କୌଣସି ସ୍ଥାନରେ କ୍ଷତଚିହ୍ନ ନଥିବା ବେଳେ ଘର ଆଖପାଖ ଅଞ୍ଚଳରେ କୌଣସି ମାରଣାସ୍ତ୍ର ମଧ୍ୟ ମିଳିନାହିଁ।
ପ୍ରାଥମିକ ତଦନ୍ତରୁ ଅନିତାଙ୍କ ତଣ୍ଟି ଚିପି ହତ୍ୟା କରାଯାଇଥିବା ସୂଚନା ମିଳିଛି । ଜଣେ ବା ଏକାଧିକ ବ୍ୟକ୍ତିବିଶେଷଙ୍କ ଦ୍ୱାରା ଖୁବ୍ ସୁଚିନ୍ତିତ ଉପାୟରେ ହତ୍ୟାକାଣ୍ଡ ଘଟାଯାଇଥିବା ଅନୁମାନ କରାଯାଉଛି । ବାରିପଦାରୁ ଏକ ସାଇଣ୍ଟିଫିକ ଟିମ ମଧ୍ୟ ପହଞ୍ଚି ଘଟଣାର ଛାନଭିନ ଆରମ୍ଭ କରିଛି ।
