ଭୁବନେଶ୍ୱର,୨୦ା୫(ବନ୍ଦନା ସେଠୀ):ଅଲ୍ ଇଣ୍ଡିଆ ଅର୍ଗାନାଇଜେଶନ ଅଫ୍ କେମିଷ୍ଟ୍ସ ଆଣ୍ଡ୍ ଡ୍ରଗିଷ୍ଟ୍ସ (ଏଆଇଓସିଡି) ପକ୍ଷରୁ ବୁଧବାର ସମଗ୍ର ଦେଶରେ ଔଷଧ ଦୋକାନ ବନ୍ଦ ଡାକରା ଦିଆଯାଇଛି। ଅନ୍ଲାଇନ ଔଷଧ ବିକ୍ରିକୁ ବିରୋଧ ଓ ଅନ୍ୟାନ୍ୟ ସମସ୍ୟାର ସମାଧାନ ଦାବି କରି ଏଆଇଓସିଡି ଅଧୀନରେ ଥିବା ସମସ୍ତ ଔଷଧ ବ୍ୟବସାୟୀ ଆନ୍ଦୋଳକୁ ଓହ୍ଲାଇବେ। ଇ-ଫାର୍ମାସି ଏବଂ ଅନ୍ଲାଇନ୍ ଔଷଧ ଡେଲିଭରି ପ୍ଲାଟ୍ଫର୍ମଗୁଡ଼ିକ ଯଥେଷ୍ଟ ନିରୀକ୍ଷଣ ବିନା କାର୍ଯ୍ୟ କରୁଥିବାରୁ ସୃଷ୍ଟ ନିୟମାବଳୀର ଅଭାବ ପ୍ରତି ସରକାରଙ୍କ ଦୃଷ୍ଟି ଆକର୍ଷଣ କରିବା ପାଇଁ ଏହି ପ୍ରତିବାଦ କରାଯାଉଥିବା ଏଆଇଓସିଡି ପକ୍ଷରୁ ସୂଚନା ଦିଆଯାଇଛି। ତେବେ ଏହାର ପ୍ରଭାବ ଯେପରି ଓଡ଼ିଶାରେ ନ ପଡ଼ିବ ଓ ଲୋକେ ଔଷଧ ପାଇଁ ହଇରାଣ ନ ହେବେ, ସେଥିପାଇଁ ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି। ଡ୍ରଗ୍ସ କଣ୍ଟ୍ରୋଲ ଡିରେକ୍ଟୋରେଟ ପକ୍ଷରୁ ସମସ୍ତ ଜିଲାର ଡ୍ରଗ୍ସ ଇନ୍ସପେକ୍ଟର ଓ ସହାୟକ ଡ୍ରଗ୍ସ କଣ୍ଟ୍ରୋଲରମାନଙ୍କୁ ସ୍ବତନ୍ତ୍ର ନିର୍ଦ୍ଦେଶ ଜାରି କରାଯାଇଛି। ବିଶେଷକରି ବନ୍ଦ ଯୋଗୁ ଜରୁରୀ ପରିସ୍ଥିତିରେ ଔଷଧ ବଣ୍ଟନ ଓ ବିକ୍ରୟ ଅବିଚ୍ଛିନ୍ନ ରଖିବା ପାଇଁ ସ୍ଥାନୀୟ କେମିଷ୍ଟ ସଂଘମାନଙ୍କୁ ଅନୁରୋଧ କରାଯାଇଛି। ସମସ୍ତ ସରକାରୀ ସ୍ବାସ୍ଥ୍ୟ ସଂସ୍ଥାରେ ଥିବା ନିରାମୟ କେନ୍ଦ୍ରଗୁଡ଼ିକରୁ ରୋଗୀମାନଙ୍କୁ ଔଷଧ ବଣ୍ଟନ କରାଯିବ। ଏହାର ନିରୀକ୍ଷଣ ଓ ସୁନିଶ୍ଚିତକରଣ ପାଇଁ ସମସ୍ତ ଜିଲାର ସିଡିଏମ୍ ଓ ପିଏଚ୍ଓମାନଙ୍କୁ ନିର୍ଦ୍ଦେଶ ଦିଆଯାଇଛି। ସେହିପରି ହସ୍ପିଟାଲ କ୍ୟାମ୍ପସ ଭିତରେ ଥିବା ମେଡିସିନ ଷ୍ଟୋର୍ ଓ ପ୍ରଧାନମନ୍ତ୍ରୀ ଭାରତୀୟ ଜନଔଷଧି କେନ୍ଦ୍ର (ପିଏମ୍ବିଜେକେ) ଖୋଲା ରହିବ। ହସ୍ପିଟାଲ ଓ କ୍ଲିନିକାଲ ସଂସ୍ଥାଗୁଡ଼ିକ ସହ ସଂଲଗ୍ନ ଇନ୍-ହାଉସ ଫାର୍ମାସି/ମେଡିସିନ ଷ୍ଟୋର୍ ସହିତ ୨୪ଘଣ୍ଟିଆ ଔଷଧ ଦୋକାନ ଖୋଲା ରଖିବାକୁ କୁହାଯାଇଛି। ଡ୍ରଗ୍ସ ଇନ୍ସପେକ୍ଟରମାନେ ହୋଲ୍ସେଲର ଓ ବିତରକମାନଙ୍କ ସହ ସମନ୍ବୟ ରଖି କାର୍ଯ୍ୟ କରିବାକୁ ପରାମର୍ଶ ଦିଆଯାଇଛି। ବିଶେଷକରି ଦୁର୍ଗମ ଅଞ୍ଚଳର କେମିଷ୍ଟମାନଙ୍କୁ ଡାଇବେଟିସ, ଉଚ୍ଚ ରକ୍ତଚାପ, ଆସ୍ଥମା, ହୃଦ୍ରୋଗ, କ୍ୟାନ୍ସର ଓ ଅନ୍ୟ ଗୁରୁତର ରୋଗରେ ପୀଡ଼ିତ ରୋଗୀମାନଙ୍କୁ ଆଗୁଆ ଔଷଧ ଯୋଗାଇଦେବାକୁ ନିର୍ଦ୍ଦେଶ ଦିଆଯାଇଛି। ଅପରପକ୍ଷେ କିଛି କର୍ପୋରେଟ ପରିଚାଳିତ ଔଷଧ ଦୋକାନ ଏଆଇଓସିଡି ସହ ସମ୍ପୃକ୍ତ ନ ଥିବାରୁ ସେମାନେ ବନ୍ଦରେ ସାମିଲ ହେବେ ନାହିଁ ଏବଂ ସାଧାରଣ ଭାବେ ଦୋକାନ ଖୋଲା ରଖିବେ ବୋଲି ସୂଚନା ଦିଆଯାଇଛି।
Dharitri – Odisha’s No.1 Odia Daily
