ଥୁଆମୂଳ ରାମପୁର, ୧୯।୫ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅଡ୍ରି ଗ୍ରାମ ପଞ୍ଚାୟତ ଅନ୍ତର୍ଗତ ଢୋଲପାସ ପଡ଼ିଆଠାରେ ଚାଲିଥିବା ପ୍ରତିଷ୍ଠିତ ଜିଲାସ୍ତରୀୟ ‘ରାଧାଗୋବିନ୍ଦ ନକ୍ଆଉଟ୍ କ୍ରିକେଟ ଟୁର୍ଣ୍ଣାମେଣ୍ଟ’ (ସିଜନ-୧) ମଙ୍ଗଳବାର ଭବ୍ୟ ସମାରୋହ ମଧ୍ୟରେ ଉଦଯାପିତ ହୋଇଯାଇଛି। ଏହି ରୋମାଞ୍ଚକର ଫାଇନାଲ ମ୍ୟାଚ୍ରେ କଲମପୁର ବ୍ଲକର ଗୁମାବାହାଲ ଟିମ୍ ପଡୋଶୀ ନବରଙ୍ଗପୁର ଜିଲା ତେନ୍ତୁଳିଖୁଣ୍ଟି ଅଞ୍ଚଳର ଏମ୍ ଇଲେଭେନ୍ (M-XI) ଦଳକୁ ୩୧ ରନ୍ରେ ପରାସ୍ତ କରି ଚମ୍ପିୟାନ ଆଖ୍ୟା ଅର୍ଜନ କରିଛି।
ମେଗା ଫାଇନାଲରେ ଗୁମାବାହାଲ ଦଳ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଦଳ ନିର୍ଦ୍ଧାରିତ ୧୨ ଓଭରରେ ୮ ଉଇକେଟ୍ ହରାଇ ୧୨୬ ରନ୍ର ଏକ ସମ୍ମାନଜନକ ସ୍କୋର ଛିଡ଼ା କରିଥିଲା। ଜବାବରେ ୧୨୭ ରନ୍ର ବିଜୟ ଲକ୍ଷ୍ୟ ନେଇ ମୈଦାନକୁ ଓହ୍ଲାଇଥିବା ଏମ୍ ଇଲେଭେନ୍ ଟିମ୍ ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୧୧ ଓଭରରେ ସମସ୍ତ ଉଇକେଟ୍ ହରାଇ ମାତ୍ର ୯୫ ରନ୍ରେ ସୀମିତ ରହିଥିଲା। ଫଳରେ ଗୁମାବାହାଲ ଦଳ ୩୧ ରନ୍ରେ ଚିତ୍ତାକର୍ଷକ ବିଜୟ ହାସଲ କରି ଟ୍ରଫି ଆପଣେଇ ନେଇଥିଲା। ଫାଇନାଲ ମ୍ୟାଚ୍ରେ ଉନ୍ନତ ପ୍ରଦର୍ଶନ ପାଇଁ ଗୁମାବାହାଲ ଦଳର ରମେଶଙ୍କୁ ‘ମ୍ୟାନ୍ ଅଫ୍ ଦ ମ୍ୟାଚ୍’ ଏବଂ ସମଗ୍ର ଟୁର୍ଣ୍ଣାମେଣ୍ଟରେ ଚମତ୍କାର ଖେଳ ପ୍ରଦର୍ଶନ ପାଇଁ ଏମ୍ ଇଲେଭେନ୍ ଦଳର ରାଜ୍ଙ୍କୁ ‘ମ୍ୟାନ୍ ଅଫ୍ ଦ ସିରିଜ୍’ ପୁରସ୍କାର ପ୍ରଦାନ କରାଯାଇଥିଲା।
ଗତ ମେ ୧୧ ତାରିଖରୁ ଆରମ୍ଭ ହୋଇଥିବା ଏହି ବୃହତ କ୍ରିକେଟ ମହାକୁମ୍ଭରେ ମୋଟ ୧୬ଟି ପ୍ରତିଷ୍ଠିତ ଦଳ ଅଂଶଗ୍ରହଣ କରିଥିଲେ। ପ୍ରଥମ ସେମିଫାଇନାଲରେ ମଣ୍ଟୁ ଇଲେଭେନ୍କୁ ପରାସ୍ତ କରି ଏମ୍ ଇଲେଭେନ୍ ଫାଇନାଲ ଟିକେଟ ହାସଲ କରିଥିବା ବେଳେ ଦ୍ୱିତୀୟ ସେମିଫାଇନାଲରେ ପ୍ରବଳ ପ୍ରତାପୀ ବେନ୍ଦାଝୋଲା ଦଳକୁ ଧୂଳି ଚଟାଇ ଗୁମାବାହାଲ ଫାଇନାଲରେ ନିଜ ସ୍ଥାନ ସୁରକ୍ଷିତ କରିଥିଲା।
ଉଦଯାପନୀ ଉତ୍ସବରେ ଆୟୋଜକ କମିଟି ପକ୍ଷରୁ ଏକ ବିଶେଷ ପୁରସ୍କାର ବିତରଣୀ ସଭାର ଆୟୋଜନ କରାଯାଇଥିଲା। ଏଥିରେ ଥୁଆମୂଳ ରାମପୁର ପଞ୍ଚାୟତ ସମିତି ଅଧ୍ୟକ୍ଷ ଦୟାନିଧି ମାଝୀ ମୁଖ୍ୟ ଅତିଥି ଭାବେ ଯୋଗଦେଇ କ୍ରୀଡ଼ାବିତ୍ମାନଙ୍କୁ ଉତ୍ସାହିତ କରିଥିଲେ। ସମ୍ମାନିତ ଅତିଥି ଭାବେ ଜିଲ୍ଲା ବିଜେପି ଏସ୍ସି ସେଲ୍ ସଭାପତି ବିଷ୍ଣୁ ନାଏକ, ବିଶିଷ୍ଟ ଯୁବ ନେତା ସୁଜାନ ନାଏକ, ଆଲୋକ ନାଏକ, ଅଡ୍ରି ପଞ୍ଚାୟତର ସରପଞ୍ଚ ନନ୍ଦାଇ ମାଝୀ ଓ ସମିତି ସଭ୍ୟ ରାମ ମାଝୀ ପ୍ରମୁଖ ମଞ୍ଚାସୀନ ଥିଲେ।
ଅତିଥିମାନଙ୍କ ଦ୍ବାରା ବିଜେତା ଗୁମାବାହାଲ ଦଳକୁ ଆକର୍ଷଣୀୟ ଚମ୍ପିୟାନ ଟ୍ରଫି ସହ ନଗଦ ୫୦,୦୦୦/- ଟଙ୍କାର ଡେମୋ ଚେକ୍ ପ୍ରଦାନ କରାଯାଇଥିବା ବେଳେ ଉପବିଜେତା ଏମ୍ ଇଲେଭେନ୍ ଦଳକୁ ରନର୍ସଅପ୍ ଟ୍ରଫି ସହ ନଗଦ ୩୦,୦୦୦/- ଟଙ୍କାର ଡେମୋ ଚେକ୍ ପ୍ରଦାନ କରାଯାଇଥିଲା।
ସମଗ୍ର ଟୁର୍ଣ୍ଣାମେଣ୍ଟରେ ଆଙ୍କର ବା ଉଦ୍ଘୋଷକ ଭାବେ କେଶବ କୁମାର ନାଏକ ଅତି ଚମତ୍କାର ଶୈଳୀରେ ମଞ୍ଚ ଓ ଖେଳ ପରିଚାଳନା କରି ସମସ୍ତଙ୍କ ମନ ଜିଣିଥିଲେ। ଖେଳକୁ ଅମ୍ପାୟର ବିଜୟ ମାଝୀ ଓ ଗଣେଶ ନାଏକ ଅତି ନିରପେକ୍ଷ ଭାବେ ପରିଚାଳନା କରିଥିବା ବେଳେ ସ୍କୋରବୋର୍ଡ ଦାୟିତ୍ୱରେ ନମେନ୍ଦ୍ର ମାଝୀ ସହଯୋଗ କରିଥିଲେ। ଆୟୋଜକ କମିଟିର ସଭାପତି ଉପେନ୍ଦ୍ର ନାଏକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ ଏହି ଟୁର୍ଣ୍ଣାମେଣ୍ଟକୁ ସଫଳ କରିବାରେ କମିଟିର ସଦସ୍ୟ ଉଗ୍ରେସର ନାଏକ, କୃଷ୍ଣଚନ୍ଦ୍ର ସାହୁ, ସାଗୁରାମ ନାଏକ, ଅଭିରାମ ଠାକୁର, ସାନ ନାଗ, ମଦନ ସାହୁ, ମଦନ ମୁଦୁଲି, ଅମୃତ ନାଏକ, ବଂଶଧର ନାୟକଙ୍କ ସମେତ ସମସ୍ତ ଢୋଲପାସ ଗ୍ରାମବାସୀ ପ୍ରମୁଖ ସକ୍ରିୟ ସହଯୋଗ କରିଥିଲେ। ଶେଷରେ ପଡ଼ିଆରେ ଉପସ୍ଥିତ ହଜାର ହଜାର କ୍ରୀଡ଼ାପ୍ରେମୀଙ୍କ ଶୃଙ୍ଖଳିତ ସହଯୋଗ ଯୋଗୁଁ ଏହି ଭବ୍ୟ କ୍ରିକେଟ ପ୍ରତିଯୋଗିତା ସଫଳତାର ସହ ସମ୍ପନ୍ନ ହୋଇଛି।
