ଭୁବନେଶ୍ୱର,୧୬।୧୦(ବ୍ୟୁରୋ): ଜେଲରେ ଥିବା ବହୁଚର୍ଚ୍ଚିତ ମହିଳା ବ୍ଲାକ୍ମେଲର ଅର୍ଚ୍ଚନା ନାଗଙ୍କୁ ନେଇ ତଦନ୍ତ ସେପରି ଆଗେଇ ପାରିନାହିଁ। ଇତିମଧ୍ୟରେ ୧୦ରୁ ଅଧିକ ଦିନ ବିତିଯାଇଥିଲେ ମଧ୍ୟ ତାଙ୍କ କଳା ସାମ୍ରାଜ୍ୟର ପେଡ଼ି ଖୋଲିପାରୁ ନାହିଁ ପୋଲିସ। କେମିତି ନିଜ ନାଗଫାଶରେ ପକାଇ ରାଜନେତା, ଚଳଚ୍ଚିତ୍ର ପ୍ରଯୋଜକ, ଅଭିନେତା, ବ୍ୟବସାୟୀ, ପ୍ରଶାସନିକ ଓ ପୋଲିସ ଅଧିକାରୀଙ୍କୁ ରଙ୍ଗମହଲକୁ ଡାକି ପରେ ବ୍ଲାକ୍ମେଲିଂ ଆଳରେ ଟଙ୍କା ଲୁଟି ଅମାପ ସମ୍ପତ୍ତି ଅର୍ଜନ କରିଛନ୍ତି ଗିରଫ ପରେ ତାହା ଜଳ ଜଳ ହୋଇ ସାମ୍ନାକୁ ଆସିଛି। ଗିରଫ ବେଳେ ପୋଲିସ ଅର୍ଚ୍ଚନାଙ୍କଠାରୁ ମୋବାଇଲ, ଲାପ୍ଟପ୍, ବ୍ୟାଙ୍କ ପାସ୍ବୁକ୍, ହାର୍ଡ ଡିକ୍ସ ଜବତ କରିଥିଲା, ଯେଉଁଥିରେ ଅର୍ଚ୍ଚନାଙ୍କ କଳା କାରାନାମାର ସମସ୍ତ ପ୍ରମାଣ ରହିଛି। ହେଲେ ତାଙ୍କ ରଙ୍ଗିନ ରାତିର ସାଥୀ ବନିଥିବା, କଳାସାମ୍ରାଜ୍ୟ ତିଆରିରେ ସାଥ୍ ଦେଇଥିବା ବହୁ ରାଜନେତା ଓ ବଡବଡିଆ ସଂପୃକ୍ତ ଥିବାରୁ କାଳେ ଅର୍ଚ୍ଚନା ମୁହଁ ଖୋଲିଦେବେ ସେଥିପାଇଁ ତାଙ୍କୁ ପଦାକୁ ଆଣିବାକୁ ଡରୁଛି କମିଶନରେଟ ପୋଲିସ। ଏପରି ସ୍ଥିତିରେ ଅର୍ଚ୍ଚନାଙ୍କୁ ଜେଲ ଭିତରେ କମିଶନରେଟ ପୋଲିସ ଜେରା କରିବାକୁ ଅଣ୍ଟା ଭିଡିଛି। ଏଥିପାଇଁ ପ୍ରକ୍ରିୟା ଆରମ୍ଭ ହୋଇଥିବାବେଳେ ଭୁବନେଶ୍ୱର ଏସ୍ଡିଜେଏମ୍ କୋର୍ଟରେ ଅନୁମତି ଆଣିବାକୁ ଆବେଦନ କରିବାକୁ ଯାଉଛି। ଅନୁମତି ମିଳିବା ପରେ ଥାନାକୁ ନ ଆଣି ସୁରକ୍ଷା ଦୃଷ୍ଟିରୁ ଝାରପଡା ଜେଲରେ ପଚରାଉଚରା କରିବାକୁ ଯୋଜନା ଚଳାଇଛି। ପୋଲିସ ଅର୍ଚ୍ଚନାଙ୍କଠାରୁ ତାଙ୍କ କଳାକାରନାମାର ସତ ଓକାଳିବାକୁ ଆଶା ରଖିଛି। କିନ୍ତୁ ପୋଲିସ ତାହାକୁ ପଦାକୁ ଆଣିବ ତ? ଏଭଳି ପ୍ରଶ୍ନ ଏବେ ସମସ୍ତଙ୍କ ମନରେ ଉଙ୍କି ମାରୁଛି। ଶୁକ୍ରବାର ଅର୍ଚ୍ଚନା ଜାମିନ ଆବେଦନ କରିଥିଲେ। ସୁରକ୍ଷା ଦୃଷ୍ଟିରୁ କୋର୍ଟକୁ ନିଆ ନ ଯାଇ ଭିଡିଓ କନ୍ଫରେନ୍ସ ମାଧ୍ୟମରେ ହାଜର କରାଯାଇଥିଲା। କୋର୍ଟ ତାଙ୍କ ରାୟକୁ ସଂରକ୍ଷିତ ରଖିଛନ୍ତି।
