ନୂଆଦିଲ୍ଲୀ,୭ ।୧୦: କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଏବେ ଭାରତ ଯୋଡୋ ଯାତ୍ରାରେ । ଗୁରୁବାର ଅର୍ଥାତ ୬ ଅକ୍ଟୋବରରେ ଏହାକୁ ନେଇ ଏମିତି ଏକ ଭିଡିଓ ସାମ୍ନାକୁ ଆସିଛି ଯାହା ସମସ୍ତଙ୍କ ମନକୁ ବେଶ ପାଇଛି । ରାହୁଲ ଗାନ୍ଧୀ ଭାରତ ଯୋଡୋ ଯାତ୍ରାର ୨୯ତମ ଦିନରେ କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ହାତ ଧରି ଦୌଡିବା ଆରମ୍ଭ କରିଥିବା ବେଳେ ୭୫ ବର୍ଷିୟ ମୁଖ୍ୟମନ୍ତ୍ରୀ ବି ଏଥିରେ ଖୁବ୍ ଖୁସି ହୋଇ ଦୌଡିବା ଆରମ୍ଭ କରିଥିଲେ । ଏମିତି ଏକ ଭିଡିଓ କ୍ୟାମେରାରେ କଏଦ ହେବା ପରେ ଏବେ ଏହା ଚର୍ଚ୍ଚାର ବିଷୟ ପାଲଟିଛି । ଏହି ଭିଡିଓରେ ଉଭୟ ନେତା କାନ୍ଧରେ କାନ୍ଧ ମିଶାଇ ଦୌଡିବା ଭଳି ନଜର ଆସିଛି । ପୂର୍ବତନ କଂଗ୍ରେସ ଅଧ୍ୟକ୍ଷଙ୍କ ସହ ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଭାବ ଏହି ଭିଡିଓରେ ସ୍ପଷ୍ଟ ବାରି ହୋଇ ପଡୁଛି ।
ସିଦ୍ଧରମୈୟା କଛି ସମୟ ପାଇଁ ରାହୁଲଙ୍କ ସହ ଦୌଡୁଥିବା ବେଳେ ପାଖରେ ଥିବା ଅନ୍ୟ ନେତାମାନେ ହସୁଥିବା ଦେଖାଯାଇଛି । ସୂଚନାଯୋଗ୍ୟ, ଗୁରୁବାର କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀ ଭାରତ ଯୋଡୋ ଯାତ୍ରାର ୨୯ତମ ଦିନରେ ଏଥିରେ ସାମିଲ ହୋଇ ନେତା ଓ କର୍ମୀଙ୍କ ଉତ୍ସାହକୁ ବଢାଇଛନ୍ତି । ଏହି ଯାତ୍ରା ସମୟରେ ସୋନିଆ ଓ ରାହୁଲଙ୍କ ଭଲପାଇବାର ଦୃଶ୍ୟ ବି ଦେଖିବାକୁ ମିଳିଛି । ଏହି ସମୟରେ ମାଆପୁଅଙ୍କର ସ୍ନେହ ଓ ପ୍ରେମର କିଛି ଫଟୋ କଂଗ୍ରେସ ନେତା ତଥା ଅନ୍ୟମାନେ ସୋସିଆଲ ମିଡିଆରେ ଶେୟାର କରିଥିବା ଦେଖାଯାଇଛି ।
