ଭଞ୍ଜନଗର,୨୫ା୪(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ କୁଲାଡ଼ ବିଟ୍ ଅଧୀନରେ ଥିବା ବାରୁଡ଼ା ଲଙ୍କାଗଡ଼ ପାହାଡ଼ରେ ଥିବା ଜଙ୍ଗଲ ଶୁକ୍ରବାର ରାତିରେ ଜଳିଯାଇଛି। ଫଳରେ ଉକ୍ତ ଜଙ୍ଗଲରେ ଥିବା ଅଧିକାଂଶ ବାଉଁଶ ସମେତ ଅନ୍ୟାନ୍ୟ ଗଛ ନଷ୍ଟ ହୋଇଯାଇଛି। ଖବରପାଇ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ବିଳମ୍ବିତ ରାତିରେ ନିଆଁକୁ ଆୟତ୍ତ କରିଥିବା ଜଣାପଡ଼ିଛି। ନିଆଁ ଲାଗୁଲାଗୁ ବିଭଗୀୟ କର୍ମଚାରୀମାନେ ସୂଚନା ପାଇ ପାରୁନାହାନ୍ତି।
ସୂଚନା ବିଳମ୍ବରେ ମିଳିବା ବେଳକୁ ସେତେବେଳକୁ ପରିସ୍ଥିତି ଜଟିଳ ହୋଇଯାଇଥିଲା। ଗ୍ରାମବାସୀ ଓ ବିଭାଗୀୟ କର୍ମଚାରୀଙ୍କ ମଧ୍ୟରେ ସମନ୍ବୟ ଅଭାବ ଯୋଗୁ ଅନେକ ସମୟରେ ଏହି ସମସ୍ୟା ଦେଖାଦେଇଛି। ନିଆଁ କେଉଁଭଳି ଲାଗିଛି ତାହା ସଠିକ୍ ଭାବେ ଜଣାପଡ଼ିନାହିଁ। ଚଳିତ ବର୍ଷ ମଝିରେ ମଝିରେ ବର୍ଷା ଯୋଗୁ ନିଆଁ ସେତେଟା ବଢ଼ିନାହି ଏହି ବନଖଣ୍ଡରେ। ଯାହାକି ଅଞ୍ଚଳବାସୀଙ୍କ ପାଇଁ ଖୁସିର ଖବର। ବିଗତ କିଛି ଦିନ ହେବ ଭଞ୍ଜନଗର ଅଞ୍ଚଳରେ ତାପମାତ୍ରା ବହୁତ ବଢ଼ିଯାଇଛି। ତେଣୁ ଏହି ସମସ୍ୟା ଦେଖାଦେଇଥିବା ଅନୁମାନ କରାଯାଉଛି। ଅପରପକ୍ଷେ ଶନିବାର ସକାଳ ୯ ଟା ପର୍ଯ୍ୟନ୍ତ ଭଞ୍ଜନଗର ଅଞ୍ଚଳ ଧୂଆଁମୟ ହୋଇଯାଇଥିଲା। ଜଙ୍ଗଲ ପୋଡ଼ି ଯୋଗୁ ଧୂଆଁ ବହୁ କିଲୋମିଟର ପର୍ଯ୍ୟନ୍ତ ବ୍ୟାପିଯାଇଛି। ଶନିବାର ଭଞ୍ଜନଗର ଅଞ୍ଚଳରେ ସର୍ବାଧିକ ତାପମାତ୍ରା ୪୨ ଡିଗ୍ରୀ ହେବବୋଲି ପାଣିପାଗ ବିଭାଗ ପକ୍ଷରୁ ଅନୁମାନ କରାଯାଇଛି।
