କଲମ୍ବୋ,୨୪ା୪: ଶ୍ରୀଲଙ୍କା ରାଷ୍ଟ୍ରପତି ଅନୁରା କୁମାରା ଦିସାନାୟକେ ଶୁକ୍ରବାର ଦେଶର କ୍ରିକେଟ ମୁଖ୍ୟ ଶାମି ସିଲ୍ଭାଙ୍କୁ ଭେଟିଥିଲେ। ଏଥିରୁ ଶ୍ରୀଲଙ୍କା କ୍ରିକେଟ (ଏସ୍ଏଲ୍ସି) ବୋର୍ଡରେ ପରିବର୍ତ୍ତନର ସୂଚନା ମିଳୁଛି। ଗଣମାଧ୍ୟମ ରିପୋର୍ଟ ଅନୁସାରେ ସିଲ୍ଭା ତାଙ୍କ ପଦବୀରୁ ବହିଷ୍କୃତ ହୋଇପାରନ୍ତି। ସରକାର ମେ’ ୧ରୁ ଏକ କାମଚଳା ପ୍ରଶାସନ ଖେଳର ପରିଚାଳନା ଦାୟିତ୍ୱ ନେଇପାରନ୍ତି। ଶ୍ରୀଲଙ୍କାର ୧୯୭୩ କ୍ରୀଡ଼ା ଆଇନ ଅନୁସାରେ ଦେଶର କ୍ରୀଡ଼ାମନ୍ତ୍ରୀ ଚାହିଁଲେ ଶ୍ରୀଲଙ୍କା କ୍ରିକେଟ ବୋର୍ଡକୁ ଭାଙ୍ଗି ଦେଇପାରିବେ। ହେଲେ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ନିୟମ ବହିର୍ଭୂତ କାର୍ଯ୍ୟ ହେବ। ଖେଳାଳିଙ୍କ ଅଶାନ୍ତି, ଅନ୍ତର୍ଜାତୀୟ ର଼୍ୟାଙ୍କିଙ୍ଗରେ ଶ୍ରୀଲଙ୍କା ତଳକୁ ଖସିବା ଏବଂ ଖରାପ ପ୍ରଦର୍ଶନ କାରଣରୁ ସିଲ୍ଭାଙ୍କ ପ୍ରତି ସରକାରଙ୍କ ଅସନ୍ତୋଷ ପ୍ରକାଶ ପାଇଛି।
ସିଲ୍ଭା ଗତବର୍ଷ ନିର୍ବାଚିତ ହୋଇଥିଲେ। ୨୦୨୭ ମେ ପର୍ଯ୍ୟନ୍ତ ତାଙ୍କ କାର୍ଯ୍ୟକାଳ ଥିଲା। ଗତ ନଭେମ୍ବରରେ ସେ ପୂର୍ବତନ କ୍ରୀଡ଼ାମନ୍ତ୍ରୀଙ୍କ ଦ୍ୱାରା ବହିଷ୍କୃତ ହୋଇଥିଲେ, ମାତ୍ର କୋର୍ଟଙ୍କ ହସ୍ତକ୍ଷେପ ଯୋଗୁ ସେ ପୁନଃ ଅବସ୍ଥାପିତ ହୋଇଥିଲେ। ୨୦୨୪ ଡିସେମ୍ବରରେ ଏକ ମଧ୍ୟବର୍ତ୍ତିକାଳୀନ କମିଟି ନିଯୁକ୍ତି ପାଇଁ ଏକ ରାଜନୈତିକ ପଦକ୍ଷେପ ଯୋଗୁ ଆଇସିସି ଦ୍ୱାରା ଶ୍ରୀଲଙ୍କାର ପୂର୍ଣ୍ଣ ସଦସ୍ୟତାରୁ ସସ୍ପେଣ୍ଡ ହୋଇଥିଲା। ଫଳରେ ଦେଶ ୧୯ ବର୍ଷରୁ କମ୍ ବିଶ୍ୱକପ୍ ୨୦୨୫ ଆୟୋଜନ ଅଧିକାର ହରାଇଥିଲା, ଯାହା ଦକ୍ଷିଣ ଆଫ୍ରିକାକୁ ସ୍ଥାନାନ୍ତରିତ ହୋଇଥିଲା। ଅନ୍ୟପକ୍ଷରେ ସରକାରଙ୍କ ସୂତ୍ରରୁ ପ୍ରକାଶ ସିଲ୍ଭାଙ୍କ ବିରୋଧରେ ଯେକୌଣସି କାର୍ଯ୍ୟାନୁଷ୍ଠାନ ପୂର୍ବରୁ ସରକାର ଆଇସିସିର ପରାମର୍ଶ ନେବେ।
