କୋଲକାତା,୨୫ା୪: ପଶ୍ଚିମବଙ୍ଗରେ ଏକ ନିର୍ୱାଚନୀ ସଭାରେ ବିରୋଧୀଦଳ ନେତା ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ କରିଛନ୍ତି। ମୋଦି ଏବଂ ମମତା କ୍ଷମତାଲୋଭୀ ବୋଲି ରାହୁଲ କହିଛନ୍ତି।
ହୁଗୁଳି ଜିଲାର ସେରାମପୁରଠାରେ ସେ କହିଛନ୍ତି, ପ୍ରଧାନମନ୍ତ୍ରୀ ନିଜକୁ ଜଣେ ଦେଶଭକ୍ତ ବୋଲି କହୁଥିଲେ ହେଁ ସେ ଦେଶକୁ ବିକି ଦେବାକୁ ବସିଛନ୍ତି। ପଶ୍ଚିମବଙ୍ଗରେ ମଧ୍ୟ ମୁଖ୍ୟମନ୍ତ୍ରୀ ମମତା ଗରିବ ଲୋକଙ୍କୁ ସହାୟତା କରିବା ବଦଳରେ ଧନୀଙ୍କୁ ଉପରକୁ ଉଠାଇବାକୁ ପଛାଇନାହାନ୍ତି। ଏହାସତ୍ତ୍ୱେ ସେମାନେ କ୍ଷମତାରେ ରହିବାକୁ ଚାହୁଁଛନ୍ତି। ତେବେ ମମତାଙ୍କ ପ୍ରତି ତାଙ୍କର ଏଭଳି ଆକ୍ଷେପକୁ ନେଇ ରାଜନୈତିକ ମହଲରେ ଭ୍ରୁକୂଞ୍ଚନ ସୃଷ୍ଟି ହୋଇଛି। ଇଣ୍ଡିଆ ମେଣ୍ଟରେ ରହିଥିବା ଟିଏମସି ମୁଖିଆଙ୍କ ପ୍ରତି ରାହୁଲ କେମିତି ଏଭଳି ଆକ୍ଷେପ କଲେ ବୋଲି ପ୍ରଶ୍ନ ଉଠିଛି।
