ନୂଆଦିଲ୍ଲୀ,୨୫।୪: ଆଜିର ସମୟରେ ବ୍ୟାଙ୍କିଙ୍ଗଠାରୁ ଆରମ୍ଭ କରି ସରକାରୀ ଯୋଜନା ପର୍ଯ୍ୟନ୍ତ ସବୁଥିରେ ଆଧାର କାର୍ଡ ଏକ ଅପରିହାର୍ଯ୍ୟ ଦଲିଲ ପାଲଟିଛି। ଏଭଳି ସ୍ଥିତିରେ ବିଦେଶରେ ରହୁଥିବା ଭାରତୀୟ ବା NRI (Non-Resident Indian) ମାନଙ୍କ ମନରେ ଏକ ବଡ଼ ପ୍ରଶ୍ନ ଥାଏ ଯେ, ଯଦି ସେମାନଙ୍କ ପାସପୋର୍ଟରେ ବିଦେଶୀ ଠିକଣା ରହିଛି, ତେବେ ସେମାନେ ଆଧାର କାର୍ଡ ପାଇଁ ଆବେଦନ କରିପାରିବେ କି ନାହିଁ? ଏବେ ଭାରତୀୟ ବିଶିଷ୍ଟ ପରିଚୟ ପ୍ରାଧିକରଣ (UIDAI) ଏହି ଦ୍ୱନ୍ଦ୍ୱକୁ ଦୂର କରିଛି।
UIDAIର ନୂଆ ନିୟମ ଅନୁଯାୟୀ, ଜଣେ NRI ନିଜ ପାସପୋର୍ଟରେ ଥିବା ବିଦେଶୀ ଠିକଣା ବ୍ୟବହାର କରି ମଧ୍ୟ ଆଧାର କାର୍ଡ ପାଇଁ ଆବେଦନ କରିପାରିବେ। ଯଦି ଆପଣଙ୍କ ପାସପୋର୍ଟରେ ଭାରତ ବଦଳରେ ବିଦେଶର ଠିକଣା ଉଲ୍ଲେଖ ଅଛି, ତଥାପି ଆପଣଙ୍କୁ ଆଧାର କାର୍ଡ ମିଳିବାରେ କୌଣସି ଅସୁବିଧା ହେବ ନାହିଁ। ଆଧାର କାର୍ଡରେ ମଧ୍ୟ ସେହି ବିଦେଶୀ ଠିକଣାକୁ ହିଁ ବ୍ୟବହାର କରାଯାଇପାରିବ।
କ’ଣ ରହିଛି UIDAI ର ନିୟମ?
ଏନ୍ଆର୍ଆଇ ମାନଙ୍କ ପାଇଁ UIDAI କିଛି ସ୍ପଷ୍ଟ ନିର୍ଦ୍ଦେଶନାମା ଜାରି କରିଛି:
ମୁଖ୍ୟ ଦଲିଲ: ଆବେଦନ ସମୟରେ ପାସପୋର୍ଟକୁ ହିଁ ପ୍ରମୁଖ ଦଲିଲ ଭାବେ ଗ୍ରହଣ କରାଯିବ।
ଫର୍ମ ଚୟନ: ଆବେଦନକାରୀଙ୍କ ଶ୍ରେଣୀ ଅନୁସାରେ ଫର୍ମ ନମ୍ବର ୨, ୪ କିମ୍ବା ୬ ପୂରଣ କରିବାକୁ ପଡ଼ିବ।
ବାଧ୍ୟତାମୂଳକ ସର୍ତ୍ତ: ଆଧାର ପଞ୍ଜୀକରଣ ପାଇଁ NRI ବ୍ୟକ୍ତିଜଣଙ୍କୁ ଭାରତରେ ଉପସ୍ଥିତ ରହିବା ଜରୁରୀ। କାରଣ ବାୟୋମେଟ୍ରିକ ଡାଟା (ଆଙ୍ଗୁଠି ଚିହ୍ନ ଏବଂ ଆଖିର ସ୍କାନ) କେବଳ ଆଧାର କେନ୍ଦ୍ରରେ ହିଁ ନିଆଯାଇଥାଏ। ଏହି ପ୍ରକ୍ରିୟା ଅନଲାଇନ ମାଧ୍ୟମରେ ସମ୍ପୂର୍ଣ୍ଣ ହୋଇପାରିବ ନାହିଁ।
କାହିଁକି ଏହା ଗୁରୁତ୍ୱପୂର୍ଣ୍ଣ?
ଅନେକ ସମୟରେ ବିଦେଶରେ ଦୀର୍ଘ ଦିନ ଧରି ରହୁଥିବା ଭାରତୀୟଙ୍କ ପାଖରେ ନିଜ ଦେଶର କୌଣସି ସ୍ଥାୟୀ ଠିକଣା ନ ଥାଏ। ଏହି ସୁବିଧା ଫଳରେ ସେମାନେ ଭାରତରେ ଆର୍ଥିକ କାରବାର ଏବଂ ଅନ୍ୟାନ୍ୟ ସେବାଗୁଡ଼ିକର ସହଜରେ ଲାଭ ଉଠାଇ ପାରିବେ। ତେଣୁ ଯଦି ଆପଣ ଜଣେ NRI, ତେବେ ପରବର୍ତ୍ତୀ ଭାରତ ଗସ୍ତ ସମୟରେ ନିକଟସ୍ଥ ଆଧାର ସେବା କେନ୍ଦ୍ରକୁ ଯାଇ ନିଜର ଆଧାର କାର୍ଡ ବନାଇ ପାରିବେ।
