ସିଡ୍ନୀ,୨୪ା୪: ମିଚେଲ ଷ୍ଟାର୍କଙ୍କୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଖେଳିବା ଲାଗି କ୍ରିକେଟ ଅଷ୍ଟ୍ରେଲିଆ ଅନୁମତି ଦେଇଛି। ଫଳତଃ ମେ ୧’ରେ ଦିଲ୍ଲୀ କ୍ୟାପିଟାଲ୍ସ ଏବଂ ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ ପାଇଁ ସେ ଉପଲବ୍ଧ ହେବେ।
କହୁଣି ଏବଂ କାନ୍ଧରେ ସମସ୍ୟା ଯୋଗୁ ବାମହାତୀ ପେସ୍ ବୋଲର ମିଚେଲ ଗତ ଜାନୁଆରୀରୁ ଖେଳରୁ ଦୂରେଇ ରହିଥିଲେ। ଇଂଲଣ୍ଡ ବିପକ୍ଷ ସମସ୍ତ ୫ ଆଶେସ ଟେଷ୍ଟରେ ତାଙ୍କର ବଡ଼ ଭୂମିକା ରହିଥିଲା। ସେ ପ୍ଲେୟର ଅଫ୍ ଦି ସିରିଜ ବିବେଚିତ ହୋଇଥିଲେ।
ସେହି ମାସର ପରବର୍ତ୍ତୀ ଭାଗରେ ସେ ସିଡ୍ନୀ ସିକ୍ସର୍ସ ତରଫରୁ ୫ ବିଗ୍ ବାଶ୍ ଗେମ୍ ଖେଳିଥିଲେ। ଆଇପିଏଲ୍ର ପ୍ରଥମ ପର୍ଯ୍ୟାୟରେ ମିଚେଲଙ୍କ ଅନୁପସ୍ଥିତି ବିଦେଶୀ ଖେଳାଳିଙ୍କ ପ୍ରତିବଦ୍ଧତାକୁ ନେଇ ବିତର୍କ ସୃଷ୍ଟି ହୋଇଥିଲା, ଫଳରେ ଷ୍ଟାର୍କଙ୍କୁ ସୋସିଆଲ ମିଡିଆରେ ସଫେଇ ଦେବାକୁ ପଡ଼ିଥିଲା। ଏହା ଭୁଲ୍ ସୂଚନାଯୁକ୍ତ ମତାମତ ବୋଲି ସେ ଦର୍ଶାଇଥିଲେ।
ତାଙ୍କ କାନ୍ଧ ଓ କହୁଣିରେ ଆଘାତ ଲାଗିଥିବାରୁ ସେ ବର୍ତ୍ତମାନ ରିହାବିଲିଟେଶନରେ ଅଛନ୍ତି। ସୂଚନାଯୋଗ୍ୟ, ଷ୍ଟାର୍କ ଗତ ସିଜନରେ ଦିଲ୍ଲୀ କ୍ୟାପିଟାଲ୍ସର ଅଗ୍ରଣୀ ପେସ୍ ବୋଲର ଥିଲେ। ସେ ୧୧ଟି ମ୍ୟାଚରେ ୧୪ ଉଇକେଟ ଅକ୍ତିଆର କରିଥିଲେ। ଚଳିତ ଆଇପିଏଲ୍ରେ ଦିଲ୍ଲୀ ଏପର୍ଯ୍ୟନ୍ତ ସୁଦ୍ଧା ୬ଟି ଗେମ୍ ଖେଳି ୩ ବିଜୟ ସହ ପଏଣ୍ଟ ଟେବୁଲର ୫ମ ସ୍ଥାନରେ ଅଛିି। ଅନ୍ୟପକ୍ଷରେ ଅଷ୍ଟ୍ରେଲିଆ ଅଧିନାୟକ ପ୍ୟାଟ କୁମିନ୍ସ ଏହି ସିଜନରେ ପ୍ରଥମ ଥର ସନ୍ରାଇଜର୍ସ ହାଇଦ୍ରାବାଦ ତରଫରୁ ଖେଳିବେ। ଅନ୍ୟପକ୍ଷରେ ପ୍ରଥମ ପର୍ଯ୍ୟାୟରେ ଖେଳି ନ ଥିବା ଜୋଶ ହାଜେଲଉଡ୍ ଇତିମଧ୍ୟରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ତରଫରୁ ଖେଳିବା ଆରମ୍ଭ କରିଦେଇଛନ୍ତି।
