ବୌଦ୍ଧ,୨୩।୪(ଅଜିତ କୁମାର ବାରିକ)/ ଆଠମଲ୍ଲିକ (ଉଦୀପ୍ତ ପୁରୋହିତ): ବୌଦ୍ଧ ଜିଲା ଆମ୍ବଝରି ପଞ୍ଚାୟତ ବଏଲବେଡ଼ା ଗ୍ରାମରୁ ଅନୁଗୋଳ ଜିଲା ଆଠମଲ୍ଲିକ ଥାନା ବେଲପୁଞ୍ଜି ଗ୍ରାମକୁ ମଙ୍ଗଳବାର ରାତିରେ ଆସିଥିବା ବରଯାତ୍ରୀଙ୍କ ଉପରେ ଗୁଳିମାଡ଼ ହୋଇଛି। ଏଥିରେ ୨ ବରଯାତ୍ରୀ ଆହତ ହୋଇଛନ୍ତି। ସେମାନେ ହେଲେ କିରାସିରା ଗ୍ରାମର ଶିବ ଭୋଇ ଓ ଦମଣ୍ଡା ଗ୍ରାମର ରାକେଶ କହଁର। ଗୁଳିମାଡ଼ର କାରଣ ସ୍ପଷ୍ଟ ହୋଇ ନ ଥିବାବେଳେ ଏକ କାର୍ରେ ଆସି ଗୁଳି ଚଳାଇଥିବା ବୌଦ୍ଧ ସହର ଖଲିଆବଗିଚାର ଅରୁଣ ସ୍ବାଇଁଙ୍କୁ ବରଯାତ୍ରୀମାନେ ନିସ୍ତୁକ ମାଡ଼ ମାରିଛନ୍ତି। ଆହତ ୨ ବରଯାତ୍ରୀଙ୍କୁ ବୌଦ୍ଧ ମେଡିକାଲ ଓ ଆହତ ଅଭିଯୁକ୍ତଙ୍କୁ ଆଠମଲ୍ଲିକ ମେଡିକାଲରେ ଭର୍ତ୍ତି କରାଯାଇଛି। ଏ ସଂକ୍ରାନ୍ତରେ ଆଠମଲ୍ଲିକ ଥାନାରେ ନଂ. ୧୩୬/୨୬ରେ ଏକ ମାମଲା ରୁଜୁ ହୋଇଥିବା ବେଳେ ବ୍ୟବହୃତ ବନ୍ଧୁକ ସରକାରୀ ସ୍ବୀକୃତିପ୍ରାପ୍ତ ବୋଲି ଆଇଆଇସି ସନ୍ତୋଷ କୁମାର ସେଠୀ ସୂଚନା ଦେଇଛନ୍ତି।
ଅନୁଯାୟୀ, ବରଯାତ୍ରୀମାନେ ଶୋଭାଯାତ୍ରାରେ ଯାଉଥିବାବେଳେ ହଠାତ ଏକ କାର୍ରେ କେତେଜଣ ଯୁବକ ଆସି ବରଯାତ୍ରୀଙ୍କ ସହିତ କୌଣସି କାରଣରୁ ଗଣ୍ଡଗୋଳ କରିଥିଲେ। ବରଯାତ୍ରୀ ଶିବ ସମ୍ପୃକ୍ତ ଯୁବକମାନଙ୍କୁ ବାରଣ କରିବାରୁ କାର୍ରେ ଥିବା ଅଭିଯୁକ୍ତ ଅରୁଣ ବନ୍ଧୁକରୁ ଗୁଳିମାଡ଼ କରିଥିଲେ। ଏଥିରେ ଶିବଙ୍କ ପାପୁଲି ଓ ନିକଟରେ ଥିବା ରାକେଶଙ୍କ ଡାହଣ ଗୋଡ଼ରେ ଗୁଳି ବାଜିଥିଲା। ତୁରନ୍ତ ଉଭୟଙ୍କୁ ନିକଟସ୍ଥ ମାଧପୁର ମେଡିକାଲ ଓ ପରେ ଆଠମଲ୍ଲିକ ମେଡିକାଲକୁ ନିଆଯାଇଥିଲା। ବୁଧବାର ଉଭୟଙ୍କୁ ବୌଦ୍ଧ ମେଡିକାଲରେ ଭର୍ତ୍ତି କରାଯାଇଛି। ତେବେ ଗୁଳିମାଡ଼ କରିଥିବା ଅରୁଣଙ୍କୁ ବରଯାତ୍ରୀମାନେ ନିସ୍ତୁକ ମାଡ଼ ମାରିବା ସହ ଗଛରେ ବାନ୍ଧି ଦେଇଥିଲେ। ତାଙ୍କ ଅବସ୍ଥା ଗୁରୁତର ଥିବାରୁ ଆଠମଲିକ ମେଡିକାଲରେ ଭର୍ତ୍ତି କରାଯାଇଛି। ଆହତ ରାକେଶଙ୍କ ଅଭିଯୋଗ ଆଧାରରେ ମାମଲାର ତଦନ୍ତ ଜାରି ରହିଛି।
