ନୂଆପଡ଼ା ଅଫିସ,୨୦ା୮: କିଛି ଦିନର ନୀରବତା ପରେ ପୁଣି ମାଓବାଦୀମାନେ ସକ୍ରିୟ ହୋଇଛନ୍ତି। ପୋଲିସ ଇନ୍ଫର୍ମର ସନ୍ଦେହରେ ଗୁରୁବାର ରାତିରେ ନୂଆପଡା ଜିଲା ସୁନାବେଡା ଅଭୟାରଣ୍ୟରେ ଜଣେ ଯୁବକଙ୍କୁ ହତ୍ୟା କରି ଫିଙ୍ଗି ଦେଇଥିବା ସୂଚନା ମିଳିଛି। ମୃତକ ହେଲେ କୋମନା ଥାନା ସୁନାବେଡା ପଞ୍ଚାୟତ ଢେକୁନପାଣି ଗାଁର ଅନ୍ତରାମ ରାଉତ (୪୪)। ସେଠାରେ ମାଓବାଦୀମାନେ ୩ଟି ପୋଷ୍ଟର ଛାଡି ଯାଇଛନ୍ତି। ସେଥିରେ ଉଲ୍ଲେଖ ରହିଛି ଯେ, ପୋଲିସକୁ ଖବର ଦେଉଥିବା ବ୍ୟକ୍ତିଙ୍କୁ ମୃତ୍ୟୁ ଦଣ୍ଡ ମିଳିଥାଏ। ଅନ୍ତରାମ ନୂଆପଡା ଏସ୍ପିଙ୍କ ଖବରଦାତା ଭାବେ କାର୍ଯ୍ୟ କରି ଆସୁଥିଲେ। ତାଙ୍କୁ ମାସକୁ ୮ ହଜାର ଟଙ୍କା ପାଉଣା ମିଳୁଥିଲା। ଅନ୍ତରାମଙ୍କର ସୁନାବେଡାଠାରୁ ଛତିଶଗଡ଼ ଆମାମୋରା ପର୍ଯ୍ୟନ୍ତ ନେଟୱର୍କ ରହିଛି। ଅମାମୋରା ଗାଁର ପର୍ଶୁ ଭୁଞ୍ଜିଆଙ୍କୁ ପୋଲିସ ଖବରଦାତା କରିବା ସହିତ ଅଞ୍ଚଳର ଆଉ ୪ଜଣଙ୍କୁ ସାମିଲ କରିଥିବାରୁ ତାଙ୍କୁ ମୃତ୍ୟୁଦଣ୍ଡରେ ଦଣ୍ଡିତ କରାଗଲା ବୋଲି ପୋଷ୍ଟରରେ ଉଲ୍ଲେଖ ରହିଛି। ପୋଷ୍ଟର ତଳେ ଭାକପା (ମାଓବାଦୀ) ମୈନପୁର-ନୂଆପଡ଼ା ଡିଭିଜନ କମିଟି ବୋଲି ଲେଖା ରହିଛି।
ସୂଚନାଯୋଗ୍ୟ ଯେ, ଗୁରୁବାର ରାତିରେ ଘରକୁ ୩୦/୪୦ଜଣ ଆସି ଉଠୋ ହାମକୋ ପାନି ଦୋ ବହୁତ ପ୍ୟାସ ଲାଗରାହା ହେଁ ବୋଲି କହି ଉଠାଇଥିଲେ। ହେଲେ ଅନ୍ତରାମଙ୍କ ସ୍ତ୍ରୀ ଘରେ କେହିନାହାନ୍ତି, ମୁଁ ଛୋଟ ଛୁଆଙ୍କୁ ସାଙ୍ଗରେ ଶୁଆଇ ଅଛି, ଉଠିପାରବି ନାହିଁ ବୋଲି କହିଥିଲେ। ଘର ଟିଣ କବାଟ ଭାଙ୍ଗି ମାଓବାଦୀମାନେ ଅନ୍ତରାମଙ୍କୁ ଉଠାଇ ମୁହଁରେ କପଡା ବାନ୍ଧି ଟାଣି ଟାଣି ନେଇଥିଲେ। ସ୍ତ୍ରୀ ପ୍ରତିବାଦ କରିବାରୁ ଆମେ ତାହାକୁ କିଛି କରିବୁ ନାହିଁ, ଉଚିତ ଶିକ୍ଷା ଦେବା ପାଇଁ ନେଉଛୁ ବୋଲି ସେମାନେ କହିଥିଲେ। ସେହି ସମୟରେ ଗାଁର କେତେଜଣ ବ୍ୟକ୍ତି ଛାଡିଦେବା ପାଇଁ ନେହୁରା ହୋଇଥିଲେ ମଧ୍ୟ ମାଓବାଦୀମାନେ ଛାଡି ନ ଥିଲେ। ଅନ୍ତରାମଙ୍କ ମୁଣ୍ଡକୁ ପିଟି ହତ୍ୟା କରି ଗାଁ ମୁଣ୍ଡରୁ ୧୦୦ ମିଟର ଦୂରରେ ଫିଙ୍ଗି ଚାଲି ଯାଇଥିଲେ। ଘଟଣା ପରେ ଗ୍ରାମବାସୀ ପୋଲିସକୁ ଖବର ଦେଇଥିଲେ। ହେଲେ ଖବର ଲେଖାଯିବା ପର୍ଯ୍ୟନ୍ତ ପୋଲିସ କିମ୍ବା ପ୍ରଶାସନ ପକ୍ଷରୁ କୌଣସି ଅଧିକାରୀ ଘଟଣାସ୍ଥଳରେ ପହଞ୍ଚତ୍ନାହାନ୍ତି।
ଉଲ୍ଲେଖନୀୟ ଯେ, ଅନ୍ତରାମ ରାଉତ ଛତିଶଗଡ଼ ଆମାମୋରା ପଞ୍ଚାୟତ ନାଗରା ଗାଁର ମୂଳ ବାସିନ୍ଦା। ଗତ ୨୦ ବର୍ଷ ହେବ ଢେକୁନପାଣି ଗାଁର ଗଣ୍ଡାରାମ ରାଉତଙ୍କ ଝିଅ ଧର୍ମି ଦେଈଙ୍କୁ ବିବାହ କରି ନାଗରା ଗାଁ ଛାଡି ଢେକୁନପାଣିରେ ରହି ଆସୁଥିଲେ। ତାଙ୍କର ସ୍ତ୍ରୀ ଧର୍ମୀଙ୍କ ସହ ୬ ଝିଅଙ୍କୁ ଧରି ଏଠାରେ ରହି ଆସୁଥିଲେ। ସେ କୁଲି ମଜୁରି, ଗାଁ ଗାଈ, ମଇଷି ଚରାଇବା ସହିତ ଦାଦନ ଶ୍ରମିକ ଭାବେ କାମ କରି ପରିବାର ପ୍ରତିପୋଷଣ କରି ଆସୁଥିଲେ। ଘର ମୁଖିଆ ଚାଲି ଯିବାରୁ ସ୍ତ୍ରୀ ଓ ୬ ଝିଅ ବେସାହାରା ହୋଇ ପଡିଛନ୍ତି।
