କେନ୍ଦୁଝର, ୨୮ା୧୨ (ସ୍ବ.ପ୍ର.) କେନ୍ଦୁଝର ଜିଲାରେ ବାହାର ରାଜ୍ୟର ଟ୍ରେଲର ଚଳାଚଳକୁ ନେଇ ଅସନ୍ତୋଷ ଦେଖାଦେଇଛି। ଏନେଇ ବିଭିନ୍ନ ଅଞ୍ଚଳର ୬ଟି ଟ୍ରକ ମାଲିକ ସଂଘକୁ ନେଇ ଗଠିତ କୋର କମିଟି ସଦସ୍ୟ ସୋମବାର ଜିଲାପାଳ ଆଶିଷ ଠାକ୍ରେଙ୍କୁ ଭେଟି ସମସ୍ୟା ଜଣାଇଛନ୍ତି। ଜିଲାପାଳ ଠାକ୍ରେ ଜାନୁୟାରୀ ପ୍ରଥମ ସପ୍ତାହରେ ଏ ସମ୍ପର୍କରେ ଆଲୋଚନା କରିବେ ବୋଲି ପ୍ରତିଶ୍ରୁତି ଦେଇଛନ୍ତି।
ବହୁ ସଂଖ୍ୟାରେ ଯୁବକ ଋଣ କରି ଟ୍ରକ ବ୍ୟବସାୟ କରୁଛନ୍ତି। ସେହିପରି ଏହି ବ୍ୟବସାୟ ଉପରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ଲକ୍ଷାଧିକ ଲୋକ ଗୁଜୁରାଣ ମେଣ୍ଟାଉଛନ୍ତି। ବିଶେଷ କରି ଜିଲାରେ ଥିବା ଖଣିରେ ବାହାର ରାଜ୍ୟର ଟ୍ରେଲର ଲୁହାପଥର ପରିବହନ କରୁଛି। ଏହା ଫଳରେ ଜିଲାର ହଜାର ହଜାର ସଂଖ୍ୟାର ଟ୍ରକ ପରିବହନ ସୁଯୋଗ ନ ପାଇ ଛିଡ଼ା ହୋଇ ରହୁଥିବାରୁ ଟ୍ରକ ମାଲିକ ଲୋଡିଂ ନ ପାଇ କ୍ଷତିଗ୍ରସ୍ତ ହେଉଛନ୍ତି ବୋଲି ଜଣାଇଥିଲେ। ଏଣୁ ଅତ୍ୟଧିକ ଟ୍ରେଲର ମାଧ୍ୟମରେ ପରିବହନ ବନ୍ଦ କରିବା ସହ ୨୦୧୨ରେ ପ୍ରଶାସନ ଉପସ୍ଥିତିରେ ରେଳ ତଥା ସଡ଼କ ପଥରେ ପରିବହନ ସମ୍ବନ୍ଧରେ ପରିବହନ ଅନୁପାତକୁ ନେଇ ଚୁକ୍ତିନାମା ଲାଗୁ କରିବା, ଉଚିତ୍ ପରିବହନ ମୂଲ୍ୟ ନିର୍ଦ୍ଧାରଣ କରିବା ଏବଂ ଲୋଡିଂ କ୍ଷେତ୍ରରେ କେନ୍ଦୁଝରର ଟ୍ରକଗୁଡ଼ିକୁ ଅଗ୍ରାଧିକାର ଭିତ୍ତିରେ ସୁଯୋଗ ଦେବାକୁ ଦାବି କରିଛନ୍ତି। ଏହି କମିଟିରେ ଜିଲା ଟ୍ରକ ମାଲିକ ସଂଘର ସଭାପତି ରାମଚନ୍ଦ୍ର ନାୟକ, ସାଧାରଣ ସମ୍ପାଦକ ସୂର୍ଯ୍ୟନାରାୟଣ କର, ଉପସଭାପତି ଦିଲୀପ କୁମାର ପଣ୍ଡା, ଯୁଗ୍ମ ସମ୍ପାଦକ ଦେବାଶିଷ ପଟ୍ଟନାୟକ, ଯୋଡ଼ା ଟ୍ରକ ମାଲିକ ସଂଘ ସମ୍ପାଦକ ସୁଶାନ୍ତ ବାରିକ, ବଡ଼ବିଲ ମାଇନିଂ ଏରିଆ ଟ୍ରକ ମାଲିକ ସଂଘ ସମ୍ପାଦକ ଚନ୍ଦ୍ର ପ୍ରସାଦ ଗୁପ୍ତାଙ୍କ ସମେତ ଅନ୍ୟ କର୍ମକର୍ତ୍ତା ଉପସ୍ଥିତ ଥିଲେ।
