ଭୁବନେଶ୍ୱର, ୯।୧୦(ବ୍ୟୁରୋ): ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା ବିଭାଗ (ଏସଡିଟିଇ) ଅଧୀନରେ ଥିବା ପାରଳା ମହାରାଜା ଯାନ୍ତ୍ରିକ ମହାବିଦ୍ୟାଳୟ (ପିଏମ୍ଇସି) ବ୍ରହ୍ମପୁର ଓ ସରକାରୀ ଯାନ୍ତ୍ରିକ ମହାବିଦ୍ୟାଳୟ (ଜିଇସି) କେଉଁଝରଠାରେ ଉତ୍କର୍ଷ କେନ୍ଦ୍ର ପ୍ରତିଷ୍ଠା ହେବ। ଏନେଇ ୱାଲର୍ଡ ସ୍କିଲ୍ ସେଣ୍ଟରଠାରେ ଶୁକ୍ରବାର ୩ ଚୁକ୍ତିନାମା ସ୍ବାକ୍ଷରିତ ହୋଇଛି। ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ ବାର୍ତ୍ତା ମାଧ୍ୟମରେ ଓଡିଶାର ଦୁଇଟି ପ୍ରମୁଖ ଯାନ୍ତ୍ରିକ ମହାବିଦ୍ୟାଳୟ ଦେଶର ଦୁଇଟି ପ୍ରମୁଖ ଶିଳ୍ପସଂସ୍ଥା ଟେକ୍ ମହିନ୍ଦ୍ରା ଓ ଡାସୌଲ୍ଟ ସିଷ୍ଟମ୍ସ ଇଣ୍ଡିଆ ସହ ଉତ୍କର୍ଷ କେନ୍ଦ୍ର ସ୍ଥାପନ ପାଇଁ ବୁଝାମଣା ପତ୍ର ସ୍ବାକ୍ଷର କରୁଥିବାରୁ ଖୁସି ବ୍ୟକ୍ତ କରିଥିଲେ। ଉତ୍କର୍ଷ କେନ୍ଦ୍ରଗୁଡିକ ରାଜ୍ୟର ଦକ୍ଷତା ବିକାଶ କାର୍ଯ୍ୟକ୍ରମକୁ ଆହୁରି ଆଗେଇ ନେବା ସହ ଏକ ନୂତନ ଦିଗନ୍ତ ଓ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ସେ କହିଛନ୍ତି। ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ମନ୍ତ୍ରୀ ପ୍ରେମାନନ୍ଦ ନାୟକ କହିଲେ, ଶିକ୍ଷାର୍ଥୀଙ୍କୁ ନୂତନ ଜ୍ଞାନକୌଶଳ ଶିଖିବା ସହ ଉନ୍ନତମାନର ପ୍ରଶିକ୍ଷଣ ପାଇବାରେ ଏହି କେନ୍ଦ୍ର ସାହାଯ୍ୟ କରିବ।
ପିଏମ୍ଇସିରେ କ୍ଲାଉଡ୍ କମ୍ପ୍ୟୁଟିଂ ଓ ସାଇବର ସୁରକ୍ଷା କ୍ଷେତ୍ରରେ ଉତ୍କର୍ଷ କେନ୍ଦ୍ର ପ୍ରତିଷ୍ଠା ନିମନ୍ତେ ପିଏମ୍ଇସି ବ୍ରହ୍ମପୁର, ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟ (ବିପିୟୁଟି) ଓ ଟେକ୍ ମହିନ୍ଦ୍ରା ମଧ୍ୟରେ ପ୍ରଥମ ବୁଝାମଣାପତ୍ର ସ୍ବାକ୍ଷରିତ ହୋଇଥିବାବେଳେ ଏରୋସ୍ପେସ୍, ଅଟୋମୋବାଇଲ୍, ପ୍ରତିରକ୍ଷା ଏବଂ ଏହାର ସହଯୋଗୀ କ୍ଷେତ୍ରରେ ସେବା ଯୋଗାଇବା ନିମନ୍ତେ ଉତ୍କର୍ଷ କେନ୍ଦ୍ର ସ୍ଥାପନ ନେଇ ପିଏମ୍ଇସି, ବିପିୟୁଟି ଏବଂ ଗ୍ରାମ ତରଙ୍ଗ ଏମ୍ପ୍ଲୟବିଲିଟି ଟ୍ରେନିଂ (ଜିଟିଇଟି) ମଧ୍ୟରେ ଦ୍ୱିତୀୟ ଚୁକ୍ତିନାମା ହୋଇଛି। ସେହିପରି ଜିଇସିଠାରେ ଖଣି ଓ ଏହା ସମ୍ବନ୍ଧୀୟ ଉତ୍କର୍ଷ କେନ୍ଦ୍ର ସ୍ଥାପନ ପାଇଁ ଜିଇସି, ଜିଟିଇଟି ଏବଂ ଡାସୌଲ୍ଟ ସିଷ୍ଟମ୍ସ ମଧ୍ୟରେ ତୃତୀୟ ଚୁକ୍ତିନାମା ସ୍ବାକ୍ଷରିତ ହୋଇଛି। ଓଏସ୍ଏମ୍ଇ କେଉଁଝର ଏବଂ ଯାଜପୁର ଓ ଦେବଗଡ ସରକାରୀ ପଲିଟେକ୍ନିକ୍ରେ ମଧ୍ୟ ଏଭଳି କେନ୍ଦ୍ର ସ୍ଥାପିତ ହେବ। କାର୍ଯ୍ୟକ୍ରମରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ପ୍ରମୁଖ ଶାସନ ସଚିବ ହେମନ୍ତ କୁମାର ଶର୍ମା, ବିପିୟୁଟିର ରେଜିଷ୍ଟ୍ରାର ହିମାଂଶୁ ଶେଖର ବେହେରା, ପିଏମ୍ଇସି ଅଧ୍ୟକ୍ଷ ରଞ୍ଜନ କୁମାର ସ୍ବାଇଁ, ଟେକ୍ ମହିନ୍ଦ୍ରାର ବରିଷ୍ଠ ଉପସଭାପତି ବି. କେ. ମିଶ୍ର, ଜିଇସି ଅଧ୍ୟକ୍ଷ ତ୍ରିଲୋଚନ ସାହୁ, ଡାସୌଲ୍ଟ ସିଷ୍ଟମ ଇଣ୍ଡିଆର ପରିଚାଳନା ନିର୍ଦ୍ଦେଶକ ଦୀପକ ଉପସ୍ଥିତ ଥିଲେ।
