ନୂଆଦିଲ୍ଲୀ,୨୦।୯: ବଡ କାର୍ଗୁଡିକରେ ୮ ଏୟାରବ୍ୟାଗ୍ ରହିଛି। ମାତ୍ର ଛୋଟ କାରଗୁଡିକରେ ୨ଟି ଏୟାରବ୍ୟାଗ ଥିବାରୁ ଏହାକୁ ନେଇ କେନ୍ଦ୍ର ସଡକ ଏବଂ ପରିବହନ ମନ୍ତ୍ରୀ ନୀତିନ ଗଡକରୀ ରବିବାର ଅଟୋମୋବାଇଲ କମ୍ପାନୀଗୁଡିକୁ ପ୍ରଶ୍ନ କରିଛନ୍ତି।
ଗଡକରୀଙ୍କ କହିବା ମୁତାବକ, ଛୋଟ କାରରେ ମଧ୍ୟ ସବୁ ଯାତ୍ରୀଙ୍କ ଲାଗି ଏୟାରବ୍ୟାଗ ରହିବା ଆବଶ୍ୟକ। ଫଳରେ ନିମ୍ନ, ମଧ୍ୟବିତ୍ତ ଏବଂ ଗରିବ ବର୍ଗଙ୍କୁ ମଧ୍ୟ ଯାତ୍ରା ସମୟରେ ସୁରକ୍ଷା ମିଳିପାରିବ। ପିଟିଆଇକୁ ସାକ୍ଷାତକାରରେ ଗଡକରୀ କହିଛନ୍ତି, ଧନୀ ଲୋକ ନେଉଥିବା ବଡ ଯାନଗୁଡିକରେ କମ୍ପାନୀ ୮ ଏୟାର ବ୍ୟାଗ ଦେଉଛନ୍ତି। ମାତ୍ର ଛୋଟ କାରରେ ଏହା ୨ କିମ୍ବା ୩। ଏଭଳି କାହିଁକି ବୋଲି ସେ ପ୍ରଶ୍ନ ଉଠାଇଛନ୍ତି। ଦେଶ ମଧ୍ୟରେ ନିମ୍ନ ସେଗ୍ମେଣ୍ଟ ଗ୍ରାହକଙ୍କୁ ମଧ୍ୟ ସୁରକ୍ଷା ଦେବା ଜରୁରୀ ବୋଲି ସେ ମତ ରଖିଛନ୍ତି।
ସେ ପୁଣି କହିଛନ୍ତି, ଛୋଟ କାର୍ ସାଧାରଣତଃ ନିମ୍ନ ଏବଂ ମଧ୍ୟବିତ୍ତ ଲୋକ କ୍ରୟ କରିଥାନ୍ତି। ଏହି କାର୍ଗୁଡିକରେ ଆବଶ୍ୟକ ସଂଖ୍ୟକ ଏୟାର ବ୍ୟାଗ ନ ରହିବାକୁ ଦୁର୍ଘଟଣା ସମୟରେ ଅନେକ ଲୋକଙ୍କୁ ଜୀବନ ରକ୍ଷା କରିବାରେ କଷ୍ଟକର ହେଉଛି। ଏଣୁ ପ୍ରତିକାରରେ ଅତି କମ୍ରେ ୬ ଏୟାରବ୍ୟାଗ୍ ରଖିବାକୁ ଗଡକରୀ ଯାନ କମ୍ପାନୀଙ୍କୁ ଅପିଲ୍ କରିଛନ୍ତି। ସେ ଏୟା ମଧ୍ୟ ମାନିଛନ୍ତି ଯେ, ଛୋଟ କାରଗୁଡିକରେ ଏୟାରବ୍ୟାଗ ରଖିଲେ ସେଗୁଡିକର ଉତ୍ପାଦନ ଖର୍ଚ୍ଚ ୩ରୁ ୪ ହଜାର ବଢିଯିବ। ମାତ୍ର ଏହା ଦ୍ୱାରା ଗ୍ରାହକ ଲାଭବାନ ହୋଇପାରିବେ। ଚଳିତ ବର୍ଷ ଏପ୍ରିଲ ପହିଲାରୁ ନୂଆ କାରର ସବୁ ମଡେଲ ଉପରେ ଏୟାରବ୍ୟାଗକୁ ଅନିବାର୍ଯ୍ୟ କରାଯାଇଛି। ସଡ଼କ ସୁରକ୍ଷା ନେଇ ସୁପ୍ରିମକୋର୍ଟ ଗଠନ କରିଥିବା କମିଟି ଆଧାରରେ ଏଭଳି ନିଷ୍ପତ୍ତି ଗ୍ରହଣ କରାଯାଇଛି। ଅଧିକ ଟିକସ ଏବଂ ସୁରକ୍ଷା ନିୟମ କାରଣରୁ ଅଟୋମୋବାଇଲ କମ୍ପାନୀଗୁଡିକୁ ପ୍ରଡକ୍ଟ ମହଙ୍ଗା ହେଉଥିବାରୁ ଏହା ସେମାନଙ୍କ ପାଇଁ ଚିନ୍ତାର କାରଣ ପାଲଟୁଥିବା ଜଣାପଡିଛି।
