ଓଭାଲ୍,୭।୯: ଇଂଲଣ୍ଡ ବିପକ୍ଷ ଓଭାଲ ଟେଷ୍ଟରେ ଶତକ ହାସଲ କରି ଭାରତର ଐତିହାସିକ ବିଜୟର ମୂଳଦୁଆ ପକାଇଥିବା ଓପନର୍ ରୋହିତ ଶର୍ମା ମ୍ୟାନ ଅଫ ଦି ମ୍ୟାଚ ହୋଇଥିଲେ। ବିଜୟ ପରେ ରୋହିତ କହିଛନ୍ତି ଯେ, ତାଙ୍କ ଠାରୁ ଅଧିକ ଅନ୍ୟ ଜଣେ ଖେଳାଳି ଏହି ପୁରସ୍କାର ପାଇବାକୁ ଯୋଗ୍ୟ। ଭାରତର ଦ୍ୱିତୀୟ ଇନିଂସରେ ୧୨୭ ରନ ସ୍କୋର କରିଥିବା ରୋହିତ କହିଛନ୍ତି ଯେ ଶାର୍ଦ୍ଦୁଲ ଠାକୁର ତାଙ୍କ ଅପେକ୍ଷା ଏହି ପୁରସ୍କାର ପାଇବାକୁ ଯୋଗ୍ୟ ବୋଲି କହିଛନ୍ତି। ରୋହିତ ଏହା ପଛର କାରଣ ମଧ୍ୟ କହିଛନ୍ତି। ସେ କହିଥିଲେ ଯେ, ମୁଁ ପଡ଼ିଆରେ ଅଧିକରୁ ଅଧିକ ସମୟ ବିତାଇବାକୁ ଚାହୁଁଥିଲି। ଦ୍ୱିତୀୟ ଇନିଂସ ଅତ୍ୟନ୍ତ ସ୍ବତନ୍ତ୍ର ଏବଂ ଶତକ ମଧ୍ୟ ଥିଲା। ମୋ ଇନିଂସ ସହିତ ଦଳକୁ ଏକ ଭଲ ସ୍ଥିତିରେ ରଖି ମୁଁ ଖୁସି। ବିଦେଶୀ ମାଟିରେ ଏହି ମ୍ୟାଚରେ ରୋହିତ ତାଙ୍କ ଟେଷ୍ଟ କ୍ୟାରିୟରର ପ୍ରଥମ ଶତକସ୍କୋର କରିଥିଲେ।
ଏହି ମ୍ୟାଚରେ ଶାର୍ଦ୍ଦୁଲ ଠାକୁର ମଧ୍ୟ ଚମତ୍କାର ପ୍ରଦର୍ଶନ କରିଥିଲେ। ସେ ଉଭୟ ଇନିଂସରେ ଭଲ ବ୍ୟାଟିଂ କରିଥିଲେ। ବ୍ୟାଟିଂ ବ୍ୟତୀତ ଠାକୁର ବୋଲିଂରେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ। ପ୍ରଥମ ଇନିଂସରେ ୩୬ ଟି ବଲରେ ଠାକୁର ୫୭ ରନ ସଂଗ୍ରହ କରିଥିଲେ। ଦ୍ୱିତୀୟ ଇନିଂସରେ ସେ ୬୦ ରନ ସଂଗ୍ରହ କରିଥିଲେ। ଏଥିସହ ସେ ଉଭୟ ଇନିଂସରେ ମୋଟ ୩ ଉଇକେଟ ନେଇଥିଲେ। ଆଜି ସମସ୍ତେ ଶାର୍ଦ୍ଦୁଲ ଠାକୁରଙ୍କ ଏହି ପ୍ରଦର୍ଶନକୁ ପ୍ରଶଂସା କରୁଛନ୍ତି। ରୋହିତ ଶର୍ମା ମଧ୍ୟ ତାଙ୍କର ପ୍ରଶଂସକ ହୋଇଛନ୍ତି। ଠାକୁରଙ୍କୁ ପ୍ରଶଂସା କରି ସେ କହିଛନ୍ତି ଯେ ଶାର୍ଦ୍ଦୁଲ ଠାକୁର ମୋ ଅପେକ୍ଷା ଏହି ପୁରସ୍କାର ପାଇବାକୁ ଯୋଗ୍ୟ। ଦି ଓଭାଲରେ ଭାରତ ଜିତିବା ସହିତ ସେମାନେ ୫ ମ୍ୟାଚ ବିଶିଷ୍ଟ ସିରିଜରେ ୨-୧ ଅଗ୍ରଣୀ ହାସଲ କରିଛି।
