ନୂଆଦିଲ୍ଲୀ,୨।୮: କରୋନା ବିରୋଧରେ ଜାରି ରହିଥିବା ଲଢ଼େଇରେ ସବୁଠାରୁ ବଡ଼ ଅସ୍ତ୍ର ଭାବେ ଉଭା ହୋଇଛି ଟିକା। ତେଣୁ କରୋନାକୁ ହରାଇବା ପାଇଁ ସାରା ବିଶ୍ୱରେ ଟିକାକରଣକୁ ଅଧିକ ଗୁରୁତ୍ୱ ଦିଆଯାଉଛି। ଇତିମଧ୍ୟରେ ଭାରତରେ ଟିକାକରଣ ଜାନୁୟାରୀ ୧୬ରୁ ଆରମ୍ଭ ହୋଇଥିବା ବେଳେ ଏପର୍ଯ୍ୟନ୍ତ ୪୭କୋଟିରୁ ଅଧିକ ଲୋକ ଟିକା ନେଇସାରିଲେଣି। ସେଥିମଧ୍ୟରୁ କେବଳ ୧୦କୋଟି ୪୨ ଲକ୍ଷ ଲୋକ କରୋନା ଟିକାର ଉଭୟ ଡୋଜ ନେଇସାରିଥିବା ଜଣାପଡ଼ିଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଅନୁସାରେ ଦେଶରେ ଏପର୍ଯ୍ୟନ୍ତ ମୋଟ ୪୭,୨୨,୨୩,୬୩୯ଡୋଜ ଦିଆଯାଇଛି। ସେଥିମଧ୍ୟରୁ ୩୬,୭୯,୯୪,୫୮୬ ଲୋକଙ୍କୁ ପ୍ରଥମ ଡୋଜ ଦିଆଯାଇଥିବା ବେଳେ ୧୦,୪୨,୨୯,୦୫୩ଜଣ ଉଭୟ ଡୋଜ ନେଇଛନ୍ତି। କେନ୍ଦ୍ର ସରକାରଙ୍କ ପକ୍ଷରୁ ଏପର୍ଯ୍ୟନ୍ତ ୪୯କୋଟି ୬୪ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ଟିକା ଦିଆଯାଇଛି। ଅଗଷ୍ଟ ୨ପର୍ଯ୍ୟନ୍ତ କେନ୍ଦ୍ର ସରକାର ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ୪୯,୬୪,୯୮,୦୫୦ ଟିକା ଡୋଜ ଦେଇଛନ୍ତି। ବର୍ତ୍ତମାନ ରାଜ୍ୟଗୁଡିକ ନିକଟରେ ୩,୧୪,୩୪,୬୫୪ କରୋନା ଟିକା ଡୋଜ ଉପଲବ୍ଧ ଥିବା ବେଳେ ୯,୮୪,୬୧୦ ଟିକା ଡୋଜ ପାଇପଲାଇନରେ ଅଛି। ଯାହା ଖୁବ୍ଶୀଘ୍ର ରାଜ୍ୟମାନଙ୍କ ପାଇଁ ଉପଲବ୍ଧ ହେବ ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ନିକଟରେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ଏଲ୍. ମଣ୍ଡାଭିଆ ଟୁଇଟ କରି ସୂଚନା ଦେଇଥିଲେ ଯେ, ପ୍ରତି ମାସରେ ଟିକା ଯୋଗାଣ ବୃଦ୍ଧି ପାଉଛି। ମେ’ରେ ରାଜ୍ୟମାନଙ୍କୁ ପ୍ରାୟ ୭୦କୋଟି ଟିକା ପ୍ରଦାନ କରାଯାଇଥିବା ବେଳେ ଜୁନରେ କେନ୍ଦ୍ର ଏହାକୁ ବୃଦ୍ଧି କରି ୧୧.୪୬ କୋଟି ଦେଇଥିଲା। ସେହିପରି ଜୁଲାଇରେ ୧୩.୫୦ କୋଟି ଡୋଜକୁ ବୃଦ୍ଧି ପାଇଥିଲା। ଅବଶ୍ୟ ଜୁଲାଇରେ ୧୩.୫୦ କୋଟି ଟିକା ଡୋଜରେ ଉଭୟ ପ୍ରଥମ ଏବଂ ଦ୍ୱିତୀୟ ଡୋଜ ରହିଥିଲା। ତେବେ ଅଗଷ୍ଟରେ ଏହି ସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। ସୂଚନା ମୁତାବକ ନିକଟରେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ସୁପ୍ରିମକୋର୍ଟରେ ଦାଖଲ କରିଥିବା ଆଫିଡେଭିଟ୍ରେ କୁହାଯାଇଥିଲା ଯେ, ଅଗଷ୍ଟରୁ ଡିସେମ୍ବର ମଧ୍ୟରେ ସରକାର ୧୩୫ କୋଟି କୋଭିଡ ଟିକା କ୍ରୟ କରିବେ। ଏଥିରେ ୫୦କୋଟି କୋଭିସିଲ୍ଡ, ୪୦କୋଟି କୋଭାକ୍ସିନ, ୩୦ କୋଟି ବାୟୋ ଇ, ୧୦କୋଟି ସ୍ଫୁଟନିକ୍ ଭି ଓ ୫କୋଟି ଜାଇଡସ୍ କାଡିଲା ଡିଏନ୍ଏ ଟିକା ସାମିଲ ରହିଛି।
