ବରଗଡ଼ ଅଫିସ୍,୧୪।୭: ବରଗଡ଼ ପୁରୁଣା ଜିଲା ମୁଖ୍ୟ ଡାକ୍ତରଖାନା ପରିସରରେ ରହିଥିବା ଶବ ସଂରକ୍ଷଣ ଗୃହର ଫ୍ରିଜର ଦୀର୍ଘଦିନ ହେଲା ଅଚଳ ହୋଇପଡ଼ିଛି । ଏହାକୁ ମରାମତି କରାଯାଇ ନ ଥିବା ଯୋଗୁ ଏଠାରେ ମୃତଦେହ ସଂରକ୍ଷିତ ରଖାଯାଇ ପାରୁନାହିଁ। ଫଳରେ ଲୋକଙ୍କୁ ହଟହଟା ହେବାକୁ ପଡୁଛି ।
ବୁଧବାର ଅତାବିରା ଥାନା ଗୋଡ଼ଭଗା ଫାଣ୍ଡି ପୋଲିସ ବ୍ୟବଚ୍ଛେଦ ପାଇଁ ଜଣେ ଅଜଣା ବ୍ୟକ୍ତିଙ୍କ ମୃତଦେହ ଉକ୍ତ ଡାକ୍ତରଖାନାକୁ ଆଣିଥିଲା । ତେବେ ମୃତକଙ୍କ ପରିଚୟ ମିଳି ନ ଥିବା ଯୋଗୁ ମୃତଦେହ ଚିହ୍ନଟ ପାଇଁ ୭୨ଘଣ୍ଟା ପର୍ଯ୍ୟନ୍ତ ସଂରକ୍ଷିତ ରଖିବା ପାଇଁ ନିୟମ ରହିଛି। ଏହି ଦୃଷ୍ଟିରୁ ବ୍ୟବଚ୍ଛେଦ ପରେ ମୃତଦେହକୁ ସଂରକ୍ଷଣ ଗୃହରେ ରଖିବା ପାଇଁ ଗୋଡ଼ଭଗା ଫାଣ୍ଡି ଅଧିକାରୀ ବିପିନ ବାଗ ଡାକ୍ତରଖାନାରେ ଥିବା ବିଭାଗୀୟ କର୍ମଚାରୀଙ୍କୁ କହିଥିଲେ। ମାତ୍ର ଫ୍ରିଜର ଅଚଳ ଥିବା ଯୋଗୁ ସେଠାରେ ମୃତଦେହ ସଂରକ୍ଷିତ ରଖିବା ସମ୍ଭବ ନୁହେଁ ବୋଲି ବିଭାଗୀୟ କର୍ମଚାରୀମାନେ କହିଥିଲେ । ଏ ନେଇ ଗୋଡ଼ଭଗା ପୋଲିସ ଚିନ୍ତାରେ ପଡିବା ସହ ହଟହଟା ହେବାକୁ ପଡ଼ିଛି। ଇତିମଧ୍ୟରେ ମୃତଦେହ ସଂରକ୍ଷିତ ରଖିବା ପାଇଁ ଗୋଡ଼ଭଗା ପୋଲିସ ବୁର୍ଲା ଯାଇଥିବା ସୂଚନା ମିଳିଛି ।
ଏ ନେଇ ଗୋଡ଼ଭଗା ଫାଣ୍ଡି ଅଧିକାରୀ ବାଗଙ୍କୁ ପଚାରିବାରୁ, ମଙ୍ଗଳବାର ରାତିରେ ଗୋଡ଼ଭଗା ସମଲେଶ୍ୱରୀ ମନ୍ଦିରରେ ଏକ ସଡ଼କ ଦୁର୍ଘଟଣାରେ ଜଣେ ବ୍ୟକ୍ତି ଗୁରୁତର ଆହତ ହୋଇଥିଲେ । ଚିକିତ୍ସା ପାଇଁ ତାଙ୍କୁ ବରଗଡ଼ ଜିଲା ମୁଖ୍ୟ ଡାକ୍ତରଖାନା ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବୁଧବାର ପୋଲିସ ମୃତଦେହ ବ୍ୟବଚ୍ଛେଦ କରାଯାଇଥିଲା । ତେବେ ମୃତକଙ୍କ ପରିଚୟ ମିଳି ନ ଥିବାରୁ ଡାକ୍ତରଖାନା ଫ୍ରିଜରରେ ସଂରକ୍ଷିତ ରଖିବା ପାଇଁ ବିଭାଗୀୟ କର୍ମଚାରୀଙ୍କୁ ଅବଗତ କରାଯାଇଥିଲା। ଫ୍ରିଜର ଅଚଳ ଥିବା କର୍ମଚାରୀମାନେ କହିଥିଲେ । ସେହିପରି ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ଅରୁଣ ପାତ୍ରଙ୍କୁ ପଚାରିବାରୁ,ଫ୍ରିଜର ମରାମତି ପାଇଁ ଆବଶ୍ୟକ ଯନ୍ତ୍ରାଂଶ ଏଠାରେ ଉପଲବ୍ଧ ହେଉ ନାହିଁ । ବାହାରୁ ମେକାନିକ ଆସି ଫ୍ରିଜର ଦେଖି ଯାଇଛନ୍ତି । ୨ରୁ ୩ଦିନ ମଧ୍ୟରେ ଆବଶ୍ୟକ ଯନ୍ତ୍ରାଂଶ ଧରି ଆସି ଫ୍ରିଜର ମରାମତି କରିବେ ବୋଲି ସେ କହିଛନ୍ତି।
