ଭୁବନେଶ୍ୱର,୨।୪(ବ୍ୟୁରୋ): ଜଣେ ମା’ ୩ ଶିଶୁଙ୍କୁ ବିଷ ପିଆଇବା ପରେ ନିଜେ ବିଷ ପିଇବା ଓ ୨ ଶିଶୁପୁତ୍ରଙ୍କ ମୃତ୍ୟୁ ଘଟିବା ଘଟଣାକୁ ନେଇ ଚାଇଲ୍ଡ ଲାଇନ୍ ତଦନ୍ତ ଆରମ୍ଭ କରିଛି। ଗୁରୁବାର ଏକ ଟିମ ଚନ୍ଦକା ଥାନା କନ୍ଦଲେଇ ଗାଁକୁ ଯାଇ ପଚରାଉଚରା କରିଛି। ସ୍ବାମୀଙ୍କ ମୃତ୍ୟୁ ପରେ ମା’ ଜାନକୀ ଗାଗରାଇ ୩ ପିଲାଙ୍କ ସହ ରହୁଥିବାବେଳେ ଦିଅର ସହାୟତା କରୁଥିଲେ। ହେଲେ ଘଟଣା ପୂର୍ବଦିନ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିବା ଜଣାପଡିଛି। ଏହାକୁ ନେଇ ଜାନକୀ ଏପରି ଚରମ ନିଷ୍ପତ୍ତି ନେଇଥିବା ଅନୁମାନ କରାଯାଉଛି। ଅଭାବରୁ ଏଭଳି ଘଟଣା ଘଟିଥିବା ନେଇ ଯାହା କୁହାଯାଉଥିଲା ତାହାର ପ୍ରମାଣ ପାଇପାରିନି ଟିମ୍। ଅନ୍ୟପଟେ ଗୁରୁତର ଶିଶୁ କନ୍ୟା ଶିଶୁଭବନରେ ଚିକିତ୍ସିତ ହେଉଛନ୍ତି। ଜାନକୀଙ୍କ ପରିବାର ଲୋକେ ଶିଶୁ କନ୍ୟାକୁ ରଖି ଲାଳନ ପାଳନ କରିବାକୁ ଇଚ୍ଛୁକ ଥିବା ଚାଇଲ୍ଡ ଲାଇନର ନିର୍ଦ୍ଦେଶକ ବେଣୁଧର ସେନାପତି ସୂଚନା ଦେଇଛନ୍ତି। ଚାଇଲ୍ଡ ଲାଇନ ତରଫରୁ ଏ ସଂକ୍ରାନ୍ତ ତଦନ୍ତ ରିପୋର୍ଟ ଶିଶୁ ମଙ୍ଗଳ କମିଟି (ସିଡବ୍ଲ୍ୟୁସି) ଓ ଶିଶୁ ଅଧିକାର ଆୟୋଗକୁ ପ୍ରଦାନ କରାଯାଇଥିବା ସେ କହିଛନ୍ତି।
