ଭୁବନେଶ୍ୱର,୧୨।୧(ବ୍ୟୁରୋ): କରୋନା ସମୟରେ ବିଭିନ୍ନ କାର୍ଯ୍ୟାଳୟ ବନ୍ଦ ଯୋଗୁ ରାଜ୍ୟ ସରକାରଙ୍କ ଅବସରପ୍ରାପ୍ତ ସରକାରୀ କର୍ମଚାରୀମାନେ ସେମାନଙ୍କର ପେନ୍ସନ୍ ଓ ଭବିଷ୍ୟନିଧି ପାଣ୍ଠି(ଜିପିଏଫ୍) ପ୍ରାପ୍ୟ ଠିକ୍ ସମୟରେ ପାଇପାରି ନାହାନ୍ତି। ଏହାକୁ ଦୃଷ୍ଟିରେ ରଖି ସ୍ଥାନୀୟ ପ୍ରଧାନ ମହାଲେଖାକାର(ଏ.ଜି.)ଙ୍କ ନିର୍ଦ୍ଦେଶକ୍ରମେ ଆସନ୍ତା ୧୩ ଓ ୨୦ ତାରିଖରେ ସ୍ବତନ୍ତ୍ର ଭବିଷ୍ୟନିଧି ପ୍ରକୋଷ୍ଠ ଖୋଲାଯିବ। ଏ.ଜି .ସମ୍ମିଳନୀ କକ୍ଷରେ ସକାଳ ୧୧ଟା ୩୦ରୁ ୧୨ଟା ୩୦ ମିନିଟ୍ ପର୍ଯ୍ୟନ୍ତ ଅବସରପ୍ରାପ୍ତ ସରକାରୀ କର୍ମଚାରୀମାନଙ୍କର ଅଭିଯୋଗ ଶୁଣାଣି କରାଯିବ। ଅବସରକାଳୀନ ପ୍ରାପ୍ୟ ଠିକ୍ ସମୟରେ ପାଇପାରି ନ ଥିବା କର୍ମଚାରୀମାନେ ପେନ୍ସନ୍ ଓ ଭବିଷ୍ୟନିଧି ସମ୍ବନ୍ଧୀୟ ଦସ୍ତାବିଜ ସହ ଅଭିଯୋଗ ପ୍ରକୋଷ୍ଠରେ ନିଜର ଆବେଦନ କରିପାରିବେ ବୋଲି ପ୍ରଧାନ ମହାଲେଖାକାର(ଲେଖା ଓ ହକ୍ଦାରି) କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି। ଏ ସମ୍ବନ୍ଧରେ ଅଧିକ ଜାଣିବା ପାଇଁ ସହକାରୀ ଲେଖା ଅଧିକାରୀ ସୁଶୀଲ ମିଶ୍ରଙ୍କୁ ମୋବାଇଲ ନଂ.-୯୪୩୮୦୩୮୩୪୩ରେ କାର୍ଯ୍ୟାଳୟ ସମୟରେ ଯୋଗାଯୋଗ କରିବାକୁ କୁହାଯାଇଛି। ଶୁଣାଣିବେଳେ କୋଭିଡ୍ ଗାଇଡଲାଇନକୁ ଅନୁସରଣ କରାଯିବ ବୋଲି ଏ.ଜି.ଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି।
