କୋଲକାତା,୧୭ ।୧୨: ପଶ୍ଚିମବଙ୍ଗକୁ ନେଇ ଭାରତୀୟ ଜନତା ପାର୍ଟି(ଭାଜପା) ଏବେ ନୁହେଁ ତ କେବେ ନୁହେଁ ପରିସ୍ଥିତିରେ ପହଞ୍ଚିଯାଇଛି କହିଲେ ଚଳେ । ରାଜ୍ୟରେ ଶାସନ କ୍ଷମତା ହାତେଇବାକୁ ଦଳ ସବୁ ପ୍ରକାଳ କୌଶଳ ପ୍ରାୟୋଗ କରିବାରେ ଲାଗିପଡିଛି । ନିର୍ବାଚନ ବୈତରଣୀ ପାର ହେବା ପାଇଁ ଭାଜପା ରାଷ୍ଟ୍ରୀୟ ମହାସଚିବ ବୈଳାଶ ବିଜୟଭର୍ଗିୟଙ୍କୁ ରାଜ୍ୟ ପ୍ରଭାରୀ ପଦ ଦେଇଛି । ଏବେ ବିଜୟଭର୍ଗିୟ ନିର୍ବାଚନରେ ବିଜୟ ପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟାର୍ଗେଟ କରିଛନ୍ତି । ରାଜ୍ୟରେ ଆଶନ ଶୃଙ୍ଖଳା କଥା ଉଠାଇ ସେ କହିଛନ୍ତି, ମମତା ରାଜ୍ୟରେ ଏମିତି ଭୟଭୀତ କଲାଭଳି ବାତାବରଣରେ ଲୋକଙ୍କୁ ରଖିଛନ୍ତି ଯାହା ଫଳରେ ଏଠାରେ ମମତାଙ୍କ ନିର୍ଦ୍ଦେଶ ହିଁ ଏଠାକାର ଆଇନ ପାଲଟିଯାଇଛି । ସୂଚନାଯୋଗ୍ୟ, ଆଗାମୀ ବର୍ଷ ପଶ୍ଚିମବଙ୍ଗରେ ହେବାକୁ ଥିବା ବିଧାନସଭା ନିର୍ବାଚନ ଲାଗି ଏବେଠାରୁ ସବୁ ରାଜନୈତିକ ଦଳ ଅଣ୍ଟା ଭିଡିଲେଣି । ବିଶେଷ କରି ତ୍ରୁଣମୂଳ କଂଗ୍ରେସକୁ ହରାଇ ଏଥର ଭାଜପା ଶାସନ କ୍ଷମତା ହାତକୁ ନେବାକୁ ପ୍ରୟାସ କରି ଚାଲିଛି । କିଛିଦିନ ତଳେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ପଶ୍ଚିମବଙ୍ଗ ଗସ୍ତରେ ଯାଇଥିବା ବେଳେ ତାଙ୍କ ଉପରକୁ ହୋଇଥିବା ପଥରମାଡକୁ ନେଇ ସେ ଏହା ପଛରେ ତ୍ରୁଣମୂଳ କଂଗ୍ରେସର ହାତ ଅଛି ବୋଲି କହିଥିଲେ । ପରେ ଏହାକୁ ନେଇ ପୁଣି ରାଜନୈତିକ ବାତାବରଣ ହୋଇଥିଲା ସରଗରମ ।
