ନୂଆଦିଲ୍ଲୀ: ୨ ଲକ୍ଷ କୋଟି ଟଙ୍କାର ଉତ୍ପାଦନ ସଂଯୋଗୀ ପ୍ରୋତ୍ସାହନ ନିବେଶ (ପିଏଲ୍ଆଇ) ଯୋଜନାକୁ କେନ୍ଦ୍ର କ୍ୟାବିନେଟ ବୁଧବାର ମଞ୍ଜୁରୀ ପ୍ରଦାନ କରିଛି। ଦେଶ ମଧ୍ୟରେ ମାନୁଫାକ୍ଚରିଂକୁ ଉତ୍ସାହିତ କରିବା ଲାଗି ସରକାର ଏଭଳି ପଦକ୍ଷେପ ନେଇଛନ୍ତି। ଏହା ଦ୍ୱାରା ୧୦ଟି କ୍ଷେତ୍ର ଲାଭବାନ ହେବେ ବୋଲି ଜଣାପଡିଛି। କ୍ୟାବିନେଟ ବୈଠକ ପରେ କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି, ଘରୋଇ ବଜାରରୁ ରପ୍ତାନି ବୃଦ୍ଧି ଏବଂ ମାନୁଫାକ୍ଚରିଂ କ୍ଷମତାକୁ ବଢାଇବା ଦିଗରେ ଏଭଳି କାର୍ଯ୍ୟକ୍ରମ ହାତକୁ ନିଆଯାଇଛି। ଏହି ଯୋଜନା ଦ୍ୱାରା ଭାରତୀୟ ଶିଳ୍ପଗୁଡିକ ବିଶ୍ୱ ସ୍ତରରେ ନିଜକୁ ଆହୁରି ପ୍ରତିଦ୍ୱନ୍ଦ୍ୱୀ କରାଇପାରିବେ। ଉଭୟ ରପ୍ତାନି ଏବଂ ନିବେଶ ଏହାଦ୍ୱାରା ବଢିପାରିବ ବୋଲି ଜାଭଡେକର ମତ ରଖିଛନ୍ତି। ଯୋଜନା ଅନ୍ତର୍ଗତ ଲାଭବାନ ହେବାକୁ ଥିବା କ୍ଷେତ୍ର ମଧ୍ୟରେ ଆଡଭାନ୍ସ କେମିଷ୍ଟ୍ରି ସେଲ୍ ବ୍ୟାଟେରି, ଇଲେକଟ୍ରୋନିକ୍ସ ପ୍ରଡକ୍ଟ, ଅଟୋମୋବାଇଲ ଏବଂ ଅଟୋ କମ୍ପୋନେଣ୍ଟ, ଫାର୍ମା, ଟେଲିକମ ଏବଂ ନେଟ୍ଓ୍ବାର୍କିଂ ପ୍ରଡକ୍ଟ, ହ୍ବାଇଟ ଗୁଡ ଏବଂ ସ୍ବତନ୍ତ୍ର ଷ୍ଟିଲ ସାମିଲ ରହିଛି। କେନ୍ଦ୍ର ସରକାର ପୂର୍ବରୁ ମଧ୍ୟ ଏଭଳି ଯୋଜନା ସମ୍ପର୍କରେ ଘୋଷଣା କରିଥିଲେ। ଏହା କେବଳ ଇଲେକଟ୍ରୋନିକ୍ସ ମାନୁଫାକଚରିଂ କ୍ଷେତ୍ର ଲାଗି ଉଦ୍ଦିଷ୍ଟ ରହିଛି।
