ପୁରୀ ଅଫିସ,୧୯ା୧୦: ମହାପ୍ରଭୁ ହେଉଛନ୍ତି ଜଗତର ଠାକୁର। ତାଙ୍କ ମାୟାରେ ବନ୍ଧା ସମଗ୍ର ବିଶ୍ୱ। ମହାପ୍ରଭୁଙ୍କ ପ୍ରତି ଗଭୀର ଆସ୍ଥା ଓ ବିଶ୍ୱାସ ରଖିଥିବା ବହୁ ଜଗନ୍ନାଥପ୍ରେମୀ ବିଭିନ୍ନ ଦେଶରେ ରହିଛନ୍ତି। ଅନେକ ରାଷ୍ଟ୍ରରେ ପ୍ରବାସୀ ଓଡ଼ିଆ ଜଗନ୍ନାଥ ମନ୍ଦିର ଗଢି ପୂଜାର୍ଚ୍ଚନା କରୁଛନ୍ତି। କୋଟି କୋଟି ଓଡ଼ିଆଙ୍କ ଆରାଧ୍ୟ ଦେବତା ଶ୍ରୀଜଗନ୍ନାଥ ଏବେ ବ୍ରିଟେନ୍ (ୟୁକେ)ରେ ମଧ୍ୟ ପୂଜା ପାଇବେ। ୟୁକେର ସିଟି ଅଫ୍ ବାଥ୍ରେ ମହାପ୍ରଭୁଙ୍କ ଭବ୍ୟ ମନ୍ଦିର ନିର୍ମାଣ ହେବ। ଏଥିପାଇଁ ସେଠାରେ ରହୁଥିବା କେତେଜଣ ଓଡ଼ିଆ ଶ୍ରୀକ୍ଷେତ୍ର ଆସି ମହାପ୍ରଭୁଙ୍କ ବିଗ୍ରହ, ଫୁଲ, ତୁଳସୀ ଓ ମହାପ୍ରସାଦ ନେଇଛନ୍ତି।
ସିଟି ଅଫ୍ ବାଥ୍ରେ ରହୁଥିବା ଓଡ଼ିଆମାନେ ଏକାଠି ହୋଇ ଏହି ମନ୍ଦିର ନିର୍ମାଣ ପରିକଳ୍ପନା କରିଛନ୍ତି। ତେବେ କିଭଳି ବିଧି ବ୍ୟବସ୍ଥା ମଧ୍ୟରେ ଏହା ନିର୍ମାଣ କରାଯିବ ସେଥିଲାଗି ପରାମର୍ଶ ନେବାକୁ ମନ୍ଦିର କମିଟି କର୍ମକର୍ତ୍ତା ପୁରୀ ଆସିଛନ୍ତି। ସେମାନେ ଶନିବାର ଜଗଦ୍୍ଗୁରୁ ଶଙ୍କରାଚାର୍ଯ୍ୟ, ଶ୍ରୀମନ୍ଦିରର ବରିଷ୍ଠ ସେବାୟତଙ୍କଠାରୁ ପରାମର୍ଶ ନେଇଛନ୍ତି। ଗଜପତି ମହାରାଜାଙ୍କଠାରୁ ଅନୁମତି ନେବେ ବୋଲି କହିଛନ୍ତି। ଏହି ଅବସରରେ ବରିଷ୍ଠ ସେବାୟତ ଈପ୍ସିତ ପ୍ରତିହାରୀ କର୍ମକର୍ତ୍ତାମାନଙ୍କୁ ମହାପ୍ରଭୁଙ୍କ ବିଗ୍ରହ, ଫୁଲ, ତୁଳସୀ ଓ ମହାପ୍ରସାଦ ପ୍ରଦାନ କରିଛନ୍ତି। କମିଟି ସଦସ୍ୟ ଅଜିତ କୁମାର ନନ୍ଦ କହିଛନ୍ତି, ବ୍ରିଟେନ୍ରେ ଶ୍ରୀଜଗନ୍ନାଥ ସଂସ୍କୃତି ପହଞ୍ଚାଇବା ଲାଗି ଉଦ୍ୟମ କରିଛୁ। ମହାପ୍ରଭୁଙ୍କ ଆଶୀର୍ବାଦ ଯୋଗୁ ଏଥିରେ ନିଶ୍ଚିତ ସଫଳ ହେବୁ। ପୁରୀ ଶ୍ରୀମନ୍ଦିର ରୀତିନୀତି ଅନୁଯାୟୀ ସେଠାରେ ଠାକୁରଙ୍କ ନୀତିକାନ୍ତି ଓ ସେବାପୂଜା କରାଯିବ। ପୁରୀ ରଥଯାତ୍ରା ଭଳି ସେଠାରେ କିଛିବର୍ଷ ହେଲା ରଥଯାତ୍ରା କରାଯାଇଆସୁଛି। ତେବେ ଅଦିନିଆ ରଥଯାତ୍ରା ନ କରିବା ଉପରେ ଗୁରୁତ୍ୱ ଦିଆଯିବ ବୋଲି ନନ୍ଦ ପ୍ରକାଶ କରିଛନ୍ତି।
