ଛତ୍ରପୁର,୩୦।୮(ଡି.ଏନ୍.ଏ.): ଜେଇଇ ପରୀକ୍ଷାର୍ଥୀମାନଙ୍କ ପାଇଁ ରହିବା, ବସ୍ ଆଦି ସମସ୍ତ ସୁବିଧା କରାଯାଇଥିବା ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ରବିବାର ଟୁଇଟ କରି ସୂଚନା ଦେଇଛନ୍ତି। ଶିତଳାପଲ୍ଲୀସ୍ଥିତ ପାରଳା ମହାରାଜା ଇଞ୍ଜିନିୟରିଂ କଲେଜ ଓ ଖଲିକୋଟ କଲେଜ ଅଞ୍ଚଳରେ ଥିବା ଆଇଓଏନ୍ ଡିଜିଟାଲ ଜୋନ ( ଆଇଡିଜେଡ) କେନ୍ଦ୍ରରେ ପରୀକ୍ଷା ଦେବାକୁ ଥିବା ପରୀକ୍ଷାର୍ଥୀଙ୍କ ପାଇଁ ବ୍ରହ୍ମପୁର ଆଇଟିଆଇରେ ରହିବା ପାଇଁ ସରକାରୀ ସୁବିଧା ହୋଇଛି।
ସେହିପରି ଗୋଳନ୍ଥରାସ୍ଥିତ ଆଇଓଏନ୍ ଡିଜିଟାଲ ଜୋନ ( ଆଇଡିଜେଡ)ଓ ଭିଗନାନ ଇନ୍ଷ୍ଟିଚ୍ୟୁଟ୍ ଅଫ ଟେକ୍ନୋଲୋଜି ମ୍ୟାନେଜମେଣ୍ଟ ଏମ୍ଏସି ସେଣ୍ଟରରେ ପରୀକ୍ଷା ଦେବାକୁ ଥିବା ପରୀକ୍ଷାର୍ଥୀଙ୍କ ପାଇଁ ପାଲୁରହିଲ ସ୍ଥିତ ବିଜୁ ପଟ୍ଟନାୟକ ଆଦର୍ଶ ବିଦ୍ୟାଳୟରେ ରହିବା ପାଇଁ ସରକାରୀ ସୁବିଧା କରାଯାଇଛି। ଏଥିସହ ବ୍ରହ୍ମପୁର, ଗୋପାଳପୁର ଓ ହଳଦିଆପଦରଠାରେ ଥିବା ୧୫ ଟି ହୋଟେଲରେ ସାଧାରଣ ଭଡା ଦେଇ ରହିବାର ବ୍ୟବସ୍ଥା ହୋଇଛି। ଭୁବନେଶ୍ୱରଠାରେ ଜେଇଇ ପରୀକ୍ଷା ଦେବାକୁ ଯିବା ପାଇଁ ଗଞ୍ଜାମ ଜିଲାପ୍ରଶାସନ ପକ୍ଷରୁ ବସ୍ର ସୁବିଧା କରାଯାଇଛି। ଏହି ବସ୍ ୩୧ ତାରିଖ ମଧ୍ୟାହ୍ନ ୧୨ଟା ୩୦ରେ ବ୍ରହ୍ମପୁର ଆଇଟିଆଇରୁ ଛାଡିବ ବୋଲି ଜିଲାପାଳ ସୂଚନା ଦେଇଛନ୍ତି।
