ଜେନେଭା,୨୩।୮: ସାରା ବିଶ୍ୱରେ କରୋନା ମହାମାରୀକୁ ନେଇ ଯେଉଁ ଗାଇଡ୍ଲାଇନ ଜାରି କରାଯାଇଛି ସେଥିରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି। ଅନେକଙ୍କ ମନରେ ପ୍ରଶ୍ନ ଉଠେ ବଡମାନେ ମାସ୍କ ପିନ୍ଧିବା ଜରୁରୀ। ହେଲେ ପିଲାମାନଙ୍କ ପାଇଁ ଏହା କେତେଦୂର ସୁରକ୍ଷିତ। ଏବେ ଏହି ପ୍ରଶ୍ନକୁ ନେଇ ମାସ୍କ ପିନ୍ଧିବା ଉପରେ ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ) ନୂଆ ଗାଇଡଲାଇନ ଜାରି କରିଛି। ଏଥିରେ ଉଲ୍ଲେଖ ରହିଛି ଯେ ୧୨ ବର୍ଷରୁ ଅଧିକ ବୟସର ପିଲା ମାସ୍କ ପିନ୍ଧିବା ଜରୁରୀ। କାରଣ ୧୨ ବର୍ଷରୁ ଅଧିକ ବୟସ ହେଲେ କରୋନା ସଂକ୍ରମଣର ଆଶଙ୍କା ମଧ୍ୟ ବଡମାନଙ୍କ ଭଳି ବଢିଯାଇଥାଏ। ତେବେ ୧୨ ବର୍ଷରୁ ଅଧିକ ବୟସର ପିଲାଙ୍କୁ ଜନଗହଳିପୂର୍ଣ୍ଣ ସ୍ଥାନ ଯେଉଁଠି ସାମାଜିକ ଦୂରତାକୁ ଗୁରୁତ୍ୱ ଦିଆଯାଉ ନ ଥିବ ଅବା କରୋନା ବ୍ୟାପୁଥିବା ଅଞ୍ଚଳରେ ନିଶ୍ଚିତ ଭାବେ ମାସ୍କ ପିନ୍ଧାଇବା ଜରୁରୀ ବୋଲି କହିଛି ଡବ୍ଲୁଏଚ୍ଓ। ତେବେ ଏହା ପିଲାମାନଙ୍କ ପାଇଁ କେତେ ହାନୀକାରକ ହେବ ତାହା ସ୍ପଷ୍ଟ କରାଯାଇ ନାହିଁ। ଏହାସହ ଡବ୍ଲୁଏଚ୍ଓ ଏକ ପ୍ରକାର ସ୍ପଷ୍ଟ କରିଛି କି ୫ ବର୍ଷରୁ କମ୍ ବୟସର ଶିଶୁଙ୍କୁ ମାସ୍କ ପିନ୍ଧାଇବା ଜରୁରୀ ନୁହେଁ। ତେବେ ଡବ୍ଲୁଏଚ୍ଓ ମତରେ ୬-୧୧ ବର୍ଷ ବୟସର ଶିଶୁଙ୍କ ପାଖରେ କରୋନା ସଂକ୍ରମଣର ଆଶଙ୍କା କମ୍ ରହିଥାଏ। ତେବେ ପିଲାମାନେ ପଡିଆରେ ଖେଳିବା ବେଳେ ମାସ୍କ ନ ପିନ୍ଧିବା ସହ ପରସ୍ପର ମଧ୍ୟରେ ଦୂରତା ରକ୍ଷା କରିବା ଭଲ ବୋଲି କହିଛି ଡବ୍ଲୁଏଚ୍ଓ।
