ସଜନାଗଡ଼,୨୪।୭(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ବ୍ଲକର ବିଭିନ୍ନ ପଞ୍ଚାୟତରେ ମୃତ ହିତାଧିକାରୀଙ୍କୁ ଜୀବିତ ଦର୍ଶାଇ ପିଡିଏସ୍ ସାମଗ୍ରୀ ହରିଲୁଟ୍ କରାଯାଇଛି। ବର୍ଷ ବର୍ଷ ଧରି ଅନେକ ଭୂତ ହିତାଧିକାରୀଙ୍କ ନାମରେ ପିଡିଏସ୍ ସାମଗ୍ରୀ ଉଠାଯାଇଛି। ଏବେ କରୋନା ସମୟରେ ରାଶନକାର୍ଡ ପିଛା ୧ହଜାର ଟଙ୍କା ସହାୟତା ପ୍ରଦାନ କରାଯାଉଥିବାରୁ ଭୂତ ହିତାଧିକାରୀଙ୍କ ସମ୍ପର୍କରେ ତଥ୍ୟ ପଦାକୁ ଆସିଛି। ଏଭଳି ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲା ନୀଳଗିରି ବ୍ଲକ ସଜନାଗଡ଼ ପଞ୍ଚାୟତରେ। ନୀଳଗିରି ବିଧାୟକ ସୁକାନ୍ତ କୁମାର ନାୟକ ଗୁରୁବାର ଏକ ଖବରଦାତା ସମ୍ମିଳନୀ ଡାକି ଏହି ଦୁର୍ନୀତି ସମ୍ପର୍କରେ ସୂଚନା ଦେଇଥିଲେ।
ମିଳିଥିବା ତଥ୍ୟ ଅନୁଯାୟୀ ବାଣ୍ଠିଆପଡ଼ା ଗ୍ରାମର ହିତାଧିକାରୀ ଚମ୍ପାମଣି ସିଂ ଓ ନୂଆସାହି ଗ୍ରାମର ଗୁରୁବାରୀ ମଢ଼େଇଙ୍କ ମୃତ୍ୟୁ ହୋଇଯାଇଥିବା ବେଳେ ତାଙ୍କୁ ଜୀବିତ ଦର୍ଶାଯାଇ ତାଙ୍କ ନାମରେ ଆସୁଥିବା ରାଶନ ସାମଗ୍ରୀକୁ ହଡପ କରାଯାଉଥିଲା। କିଛି ମାସ ପୂର୍ବେ ଉକ୍ତ ପଞ୍ଚାୟତର ୩ଜଣ ଡିଲରଙ୍କ ନାମ କଟିଯାଇଛି। ତେଣ୍ଡା, ରାଜେନ୍ଦ୍ରପୁର, ପାଣବନ୍ଧ, ବେହେରାସାହି ଓ ସଜନାଗଡ ଅଞ୍ଚଳର ଦାୟିତ୍ୱରେ ଥିବା ଡିଲର ଚଞ୍ଚକତା କରି ରାଶନ ସାମଗ୍ରୀ ଉଠାଉଥିବା ଅଭିଯୋଗ ହୋଇଛି। ପାଖ ଡିଲର କଟିଯାଇଥିବାରୁ ରାଶନ ସାମଗ୍ରୀ ନେବାକୁ ହିତାଧିକାରୀ ୨ରୁ ୩ କି.ମି. ଦୂର ବନ୍ଧସାହି, ବାରୁଡ଼ି, ତେଣ୍ଡା, ମୁଣ୍ଡଘୁରା ଅଞ୍ଚଳରୁ ଆସୁଥିଲେ। ଥରେ ଚାଉଳ ନେଇ ଆସିବା ପରେ କେବେ କିରୋସିନ ଆସିବ ତାହା ଜାଣିପାରୁ ନ ଥିଲେ। ଫଳରେ ପ୍ରତିମାସରେ ୫ହଜାର ଲିଟରରୁ ଊର୍ଦ୍ଧ୍ୱ କିରୋସିନ ଉଠାଯାଉଥିବା ବେଳେ ବହୁ ଲୋକ ଆସୁ ନ ଥିବାରୁ ପ୍ରାୟ ୨ହଜାର ଲିଟରରୁ ଊର୍ଦ୍ଧ୍ୱ କିରୋସିନ ହଡପ କରି ବିକ୍ରି କରି ଦିଆଯାଉଥିଲା। ବହୁ ହିତାଧିକାରୀଙ୍କ ଖାତାରେ ମାସ ମାସ କିରୋସିନ ଉଠି ନ ଥିବା ଲିଖିତ ଅଭିଯୋଗ ହୋଇଛି। ଯୋଗାଣ ବିଭାଗ ପକ୍ଷରୁ ଆର୍ଟିଆଇ ତଥ୍ୟ ମିଳିବା ପରେ ଏହି ଦୁର୍ନୀତି ବିଷୟ ଲୋକଲୋଚନକୁ ଆସିଛି। ଏନେଇ ଗରିବ ହିତାଧିକାରୀମାନେ ସ୍ଥାନୀୟ ବିଧାୟକ ନାୟକ ଓ ଉପଜିଲାପାଳ ହରିଶ୍ଚନ୍ଦ୍ର ଜେନାଙ୍କ ଦ୍ୱାରସ୍ଥ ହୋଇଥିଲେ। ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଗୁରୁବାର ନୀଳଗିରି ଉପଜିଲାପାଳଙ୍କ କାର୍ଯ୍ୟାଳୟକୁ ଆସିଥିବା ବେଳେ ବିଧାୟକ ନିଜ ପ୍ରତିନିଧିଙ୍କ ସହ ସମସ୍ତ ତଥ୍ୟ ଜିଲାପାଳଙ୍କୁ ପ୍ରଦାନ କରିଛନ୍ତି।
