ବରଗଡ଼ ଅଫିସ,୧୧ା୬: କନ୍ଧମାଳ ଜିଲା ବାଲିଗୁଡ଼ାରେ ସ୍ଥାପିତ ଡୁମାଲ ଜାତିର ଅଧିଷ୍ଠାତ୍ରୀ ଦେବୀ ମା’ ମାହେଶରୀଙ୍କ ମୂର୍ତ୍ତିକୁ କିଛିଦିନ ତଳେ ଦୁର୍ବୃତ୍ତମାନେ ଭାଙ୍ଗି ଦେଇଛନ୍ତି। ଏହି ଘଟଣା ଡୁମାଲ ସମାଜର ଲୋକଙ୍କ ଭାବାବେଗକୁ ଗଭୀର ଆଘାତ ଦେଇଛି। ଏପରିକି ଉକ୍ତ ମୂର୍ତ୍ତି ଭାଙ୍ଗିବା ଘଟଣାକୁ ନେଇ କନ୍ଧମାଳ ଜିଲାରେ ଦେଖାଯାଇଥିବା ତାତି ବରଗଡ଼ରେ ଦେଖାଦେଇଛି। ଏହି ପରିପ୍ରେକ୍ଷୀରେ ଗୁରୁବାର ବରଗଡ଼ ଜିଲା କୁରୁଆଁର ଡୁମାଲ ସେନା ପକ୍ଷରୁ ମୁଖ୍ୟମନ୍ତ୍ରୀ, ଦେବୋତ୍ତର ବିଭାଗ, କନ୍ଧମାଳ ଜିଲାପାଳ ଓ ଏସ୍ପିଙ୍କ ଉଦ୍ଦେଶ୍ୟରେ ବରଗଡ଼ ଜିଲାପାଳଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ଜିଲାପାଳ ଜ୍ୟୋତିରଞ୍ଜନ ପ୍ରଧାନଙ୍କ ଅନୁପସ୍ଥିତିରେ ଉପଜିଲାପାଳ ପ୍ରଭାସ ଦଣ୍ଡସେନା ସ୍ମାରକପତ୍ର ଗ୍ରହଣ କରିଥିଲେ। ମାହେଶରୀ ଦେବୀଙ୍କ ମୂର୍ତ୍ତି ଭାଙ୍ଗବା ଘଟଣାର ନିରପେକ୍ଷ ତଦନ୍ତ ସହିତ ଅଭିଯୁକ୍ତମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସ୍ମାରକପତ୍ରରେ ଦାବି କରାଯାଇଛି। ଡୁମାଲ ସେନା ପକ୍ଷରୁ ଶୁଭେନ୍ଦୁ ମେଣ୍ଡଲି, ସିଲୁ କଲା, ଦିବସ କୁମାର ପଧାନ, ଜଗନ୍ନାଥ କର୍ଣ୍ଣ, ହେମସାଗର ପାତ୍ର, ଗଣେଶ ମହାକୁର, ସଞ୍ଜୀବ ଦେହୁରୀ, ସୁମନ ପାତ୍ର, ପ୍ରୀତମ କର୍ଣ୍ଣ, ଦୀପକ ଦେହୁରୀ ପ୍ରମୁଖ ସ୍ମାରକପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।
