ବାହାନଗା, ୨୮ା୫(ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକ ଅଞ୍ଜି ପଞ୍ଚାୟତରେ ଏମ୍ଜିଏନଆରଇଜିଏସ୍ (ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା)ରେ ନିର୍ମାଣ ହେଉଥିବା ରାସ୍ତା କାମ ବେଳେ ଦୁଇ ଶ୍ରମିକ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇ କାମ ବନ୍ଦ ରହିଛି। ଫଳରେ ଗୁରୁବାର ଗୋଟିଏ ଶ୍ରମିକ ଗୋଷ୍ଠୀ ସମ୍ପୃକ୍ତ ଠିକାଦାରଙ୍କୁ ଘେରାଉ କରିଥିଲେ। ସରପଞ୍ଚ ପହଞ୍ଚି ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡିଥିଲା।
ଅଞ୍ଜି ପଞ୍ଚାୟତ ଖରିଦା ଗ୍ରାମରେ ପ୍ରଥମ ପର୍ଯ୍ୟାୟରେ ୪ଲକ୍ଷ ଟଙ୍କା ବ୍ୟୟରେ ବିଦୁଅଞ୍ଜି ଆରଡି ରାସ୍ତାଠାରୁ ପୂର୍ଣ୍ଣଦାସଙ୍କ ଘର ପର୍ଯ୍ୟନ୍ତ ନୂତନ ରାସ୍ତା ନିର୍ମାଣ ଆରମ୍ଭ ହୋଇଛି। ପଞ୍ଚାୟତର ଅଞ୍ଜି, ଖରିଦା, ଜୟୀନଗର ଗ୍ରାମର ୧ଶହରୁ ଊର୍ଦ୍ଧ୍ୱ ଗ୍ରାମବାସୀ ପ୍ରତ୍ୟେକ ଦିନ କାମ କରନ୍ତି। ଏମାନଙ୍କ ମଧ୍ୟରୁ ଜୟୀନଗର ଗ୍ରାମରୁ ଆସୁଥିବା ୪୦ରୁ ଅଧିକ ଶ୍ରମିକ ଓ ଖରିଦା ଗ୍ରାମରୁ ଆସୁଥିବା ୬୦ରୁ ଅଧିକ ଶ୍ରମିକଙ୍କ ଗୋଷ୍ଠୀ ମଧ୍ୟରେ କଥା କଟାକଟି ହୋଇ ଗଣ୍ଡଗୋଳ ହୋଇଥିଲା। ଫଳରେ କାମ ଦୁଇ ଦିନ ହେଲା ବନ୍ଦ ହୋଇଯାଇଥିଲା। ଗୁରୁବାର ସକାଳେ ଜୟୀନଗର ଗ୍ରାମର ଶ୍ରମିକମାନେ କାମ କରିବାକୁ ଆସିବା ମାତ୍ରେ ଖରିଦା ଗ୍ରାମର ୬୦ରୁ ୭୦ଜଣ ଶ୍ରମିକ ଆସି ଠିକାଦାର ରଶ୍ମୀରଞ୍ଜନ ତ୍ରିପାଠୀଙ୍କୁ କରିଥିବା କାମର ପ୍ରାପ୍ୟ ମାଗିବା ସହିତ ଘେରାଉ କରିଥିଲେ। ସ୍ଥାନୀୟ ସରପଞ୍ଚ ତପନ କୁମାର ରାଉତ ପହଞ୍ଚ ଶ୍ରମିକମାନଙ୍କୁ ବୁଝାଶୁଝା କରିବା ସହିତ ପୂର୍ବପରି ଖରିଦା ଗ୍ରାମର ପ୍ରବାସୀ ଶ୍ରମିକ ଓ ଗ୍ରାମର ଅନ୍ୟ ଶ୍ରମିକମାନେ କାମ କରିପାରିବେ ବୋଲି ପ୍ରତିଶ୍ରୁତି ଦେବାରୁ ପରିସ୍ଥିତି ଶାନ୍ତ ପଡିଥିଲା।
ଏହି ଘେରାଉରେ ଗ୍ରାମର ଉପେନ୍ଦ୍ର ମହାଳିକ, ଜ୍ୟୋତିରଞ୍ଜନ ବେହେରା, ସୃଷ୍ଟିରଞ୍ଜନ ବେହେରା, ସଞ୍ଜୟ ବେହେରା, ରାଜେଶ ପତି, ପ୍ରଭାକର ମହାଳିକ, ସଞ୍ଜୟ ବେହେରା, ମାନସ ମଳିକ, ରନତ୍ାକର ପୁହାଣ, ତାପସ ପଣ୍ଡା, ଗଜେନ୍ଦ୍ର ନାୟକ ଓ ମନୋରଞ୍ଜନ ସେଠୀ ପ୍ରମୁଖ ସାମିଲ ଥିଲେ।
