ଭଲ କଳାକାର କିଏ? ପ୍ରକୃତ ଅଭିନେତାର ପରିଚୟ କ’ଣ? ଯଦି ଏମିତି ପ୍ରଶ୍ନ କାହା ଭିତରେ ଥାଏ ତା’ହେଲେ ପଢ଼ନ୍ତୁ ଟାହିଆଙ୍କ ଉତ୍ତର। ‘ରାତିସାରା ମଞ୍ଚକୁ ଆସିବା ପାଇଁ ଇଚ୍ଛା ରଖୁଥିବା ବ୍ୟକ୍ତି କେବେ ବି ଜଣେ ସଚ୍ଚା କଳାକାର ନୁହେଁ। ରାତିରେ ପଛେ ଥରୁଟେ ସେ ମଞ୍ଚକୁ ଆସୁ। ମାତ୍ର ସେଇ ଥରକରେ ଦର୍ଶକମାନେ ତାକୁ ଦିନସାରା ମନେ ରଖନ୍ତୁ। ତା’ହେଲେ ସେ ହିଁ ହେବ ଜଣେ ସଚ୍ଚା କଳାକାର। ସେହିଭଳି ନିର୍ଦ୍ଦିଷ୍ଟ ଇମେଜ୍ ଭିତରେ ବାନ୍ଧି ହୋଇ ରହିବା କେବେ ବି ପ୍ରକୃତ ଅଭିନେତାର ପରିଚୟ ନୁହେଁ। ଅଭିନେତା ତ ସିଏ ଯିଏ ସବୁ ଚରିତ୍ରରେ ନିଜକୁ ହଜେଇ ଦେଇପାରେ। ଅଭିନୟ ତ ଅଭିନୟ। ସେଥିରେ ପୁଣି ବାଛ ବିଚାର କ’ଣ?’ ସମ୍ଭବତଃ ସେଇଥିପାଇଁ ଯାତ୍ରା ଇଣ୍ଡଷ୍ଟ୍ରିରେ ଟାହିଆଙ୍କର ରହିଛି ଏକ ସ୍ବତନ୍ତ୍ର ପରିଚୟ। ସେ ଜଣେ ଭର୍ସାଟାଇଲ୍ ଅଭିନେତା। ପଜିଟିଭ ହେଉ କି ନେଗେଟିଭ୍ – ସବୁ ଚରିତ୍ରରେ ସେ ଫିଟ୍।
ଟାହିଆ ଓରଫ୍ ନିଶିକାନ୍ତ ଜେନା। ଯାଜପୁରର ବରୁଣେଶ୍ୱର ନିବାସୀ କାଶୀନାଥ ଜେନା ଏବଂ ଲବଙ୍ଗଲତା ଜେନାଙ୍କ ଏଇ ସୁପୁତ୍ର ଯାତ୍ରାକୁ ଆସନ୍ତି ୧୯୯୯ ମସିହାରେ। ଯୋଗ ଦିଅନ୍ତି ‘ଉତ୍କଳ ଅପେରା’ରେ। ପ୍ରଥମ ନାଟକ ‘ମୁଦି ନାହିଁ ଗୋଡ଼ କଚାଡୁ କେତେ’। ପ୍ରଥମରୁ ସେ ସଂକଳ୍ପ କରିନେଇ ଥାଆନ୍ତି ଯେ, ସେ ଜଣେ ଅଭିନେତା ହେବେ। କେବଳ ଅଭିନୟ କରିବେ। ତେଣିକି ଯେଉଁ ଚରିତ୍ର ମିଳୁଛି ମିଳୁ। ଲେଖକ, ନିର୍ଦ୍ଦେଶକମାନଙ୍କୁ ଅଛପା ରହେନି ଟାହିଆଙ୍କ ଭିତରର ପ୍ରତିଭା ଆଉ ନିଷ୍ଠାପରତା। ବାସ୍, ଆରମ୍ଭ ହୁଏ ଟାହିଆଙ୍କ ଯାତ୍ରା। ‘ଉତ୍କଳ ଅପେରା’ରେ ଅଭିନୟ ଜୀବନର ଖଡ଼ି ଛୁଇଁଥିବା ଏହି ଅଭିନେତା ପରେ ପରେ ‘ପଞ୍ଚଶଖା ଗଣନାଟ୍ୟ’, ‘ମା’ ତାରିଣୀ’, ‘ଟାଇଗର ତାରିଣୀ’, ‘ତ୍ରିନାଥ ଗଣନାଟ୍ୟ’, ‘ରଙ୍ଗମହଲ’, ‘ଦର୍ଶକ ମହଲ’ ଏବଂ ‘କୃଷ୍ଣସୁଦାମା’ ଆଦିରେ ଅଭିନୟ କରି ନିଜର କଳା ପ୍ରଦର୍ଶନ କରନ୍ତି। ତାଙ୍କ ଅଭିନୀତ ସଫଳ ତଥା ଲୋକପ୍ରିୟ ନାଟକଗୁଡ଼ିକ ମଧ୍ୟରେ ରହିଛି ‘ମୋ ପ୍ରେମିକା ନିହାରିକା’, ‘ବିସ୍ଫୋରଣ ୨୦୧୨’, ‘କୁଲି ନମ୍ବର ଓ୍ବାନ୍’, ‘ତମ ସହରକୁ ନମସ୍କାର’, ‘ମାଷ୍ଟର ଝିଅ’, ‘ରୂପାଲି ଛକ ରେପ୍ କେଶ୍’, ‘ପାପ ଭଲଲାଗେ ବାପ ଘରେ’, ‘ପୁରୀରେ ପ୍ରେମିକା କଟକରେ ସ୍ତ୍ରୀ’, ‘ଧର୍ମ ହଜିଗଲା ଧର୍ମଦାଣ୍ଡରେ’, ‘ଅଙ୍ଗନବାଡ଼ି ଦିଦି’, ‘ଶବ ବୁଲୁଛି’, ‘ଖରାପ ଝିଅର ଗପ’ ଏବଂ ଆହୁରି ଅନେକ। ତାଙ୍କୁ ସବୁଠୁ ଭଲ ଲାଗିଥିବା ନାଟକ ହେଉଛି ‘ଖରାପ ଝିଅର ଗପ’ ଏବଂ ‘ବିସ୍ଫୋରଣ ୨୦୧୨’। କାରଣ ଏଥିରେ ଅଭିନୟ ପାଇଁ ଭରପୂର ସ୍କୋପ୍ ଥିଲା। ଯାତ୍ରା ହେଉଛି ଟାହିଆଙ୍କ ଜୀବନ। ପୁଣି ଏଇ ଯାତ୍ରାରୁ ସେ ପାଇଛନ୍ତି ତାଙ୍କର ଜୀବନସାଥୀ ଅଭିନେତ୍ରୀ ମାମା ମହାପାତ୍ରଙ୍କୁ। ଯାତ୍ରାକୁ ନେଇ ତାଙ୍କ ଭିତରେ କ୍ଷୋଭ କିଛି କମ୍ ନୁହେଁ। ବିଶେଷକରି କଳାକାରମାନଙ୍କର ବିଶୃଙ୍ଖଳା ଆଉ ପ୍ରଯୋଜକମାନଙ୍କର ମୌନବ୍ରତ ତାଙ୍କୁ ସବୁବେଳେ ବିବ୍ରତ କରେ। ‘ଆମେମାନେ କଳାକାର। କଳାର ପୂଜାରୀ। କଳା ହେଉଛି ଆମକୁ ଈଶ୍ୱରଙ୍କ ବରଦାନ। ଆମେ କ’ଣ କଳା ପରିବେଷଣ ବେଳେ ଶୃଙ୍ଖଳିତ ହୋଇ ପାରିବାନି? ଆରେ, ବାହାରେ ଯିଏ ଯାହା ହେଉଛ ହୁଅ, ଯାହା କରୁଛ କର; ଅନ୍ତତଃ ଯେଉଁ ଚାରିଘଣ୍ଟା ମଞ୍ଚରେ ନାଟକ ପରିବେଷଣ କରୁଛ ସେତକ ସମୟ ତ ମନକୁ ପବିତ୍ର ରଖ। ଶୃଙ୍ଖଳିତ ହୁଅ’ ବୋଲି ନିଜର ସମଧର୍ମା କଳାକାରମାନଙ୍କୁ ଅନୁରୋଧ କରନ୍ତି ଏହି ଯୁବ ଭର୍ସାଟାଇଲ୍ ଅଭିନେତା।
