ଲାଉସାନେ, ୨୮ା୨ (ଏଏଫ୍ପି)-ଚାଇନାର ୩ଥର ଅଲିମ୍ପିକ ସୁଇମିଂ ସ୍ବର୍ଣ୍ଣ ପଦକ ବିଜୟୀ ସନ୍ ୟାଙ୍ଗ ଦୋଷୀ ସାବ୍ୟସ୍ତ ହୋଇଛନ୍ତି। ସେ ଡୋପିଂ ସାମ୍ପଲ ଦେବାକୁ ମନା କରି ଦେଇଥିବାରୁ ତାଙ୍କୁ ୮ବର୍ଷ ବାସନ୍ଦ ଦଣ୍ଡ ଭୋଗିବାକୁ ପଡ଼ିବ। କୋର୍ଟ ଅଫ୍ ଆର୍ବିଟ୍ରେଶନ ଫର୍ ସ୍ପୋଟର୍ସ (କାସ୍) ଶୁକ୍ରବାର ବହୁ ପ୍ରତିକ୍ଷିତ ରାୟ ପ୍ରଦାନ ପରେ ଏହା ସ୍ପଷ୍ଟ ହୋଇଛି। ସନ୍ ହେଉଛନ୍ତି ଚାଇନାର ଜଣେ ଜଣାଶୁଣା ଆଥ୍ଲେଟ। ପୂର୍ବରୁ ୨୦୧୪ରେ ଡୋପିଂ ପାଇଁ ଥରେ ବାସନ୍ଦ ହୋଇ ସାରିଛନ୍ତି। ୨୦୧୮ରେ ଏକ ଟେଷ୍ଟିଂ ସେସନରେ ସନ୍ ନିଜର ରକ୍ତ ସାମ୍ପଲକୁ ଏକ ହାମରେ ପିଟି ନଷ୍ଟ କରିଦେଇଥିବା ଅଭିଯୋଗ ହୋଇଥିଲା। କିନ୍ତୁ ଆବଶ୍ୟକ ପ୍ରମାଣ ନ ଥିବା ଦର୍ଶାଇ ଇଣ୍ଟରନ୍ୟାଶନାଲ ସୁଇମିଂ ଫେଡେରେଶନ (ଫିନା) ଏହି ଚାଇନିଜ ଆଥଲେଟଙ୍କୁ ଆଣ୍ଟି ଡୋପିଂ ନିୟମ ଉଲ୍ଲଂଘନ ଅଭିଯୋଗରୁୁ ଦୋଷମୁକ୍ତ ଘୋଷଣା କରିଥିଲା। ଓ୍ବାଲର୍ଡ ଆଣ୍ଟି ଡୋପିଂ ଏଜେନ୍ସି (ଓ୍ବଡା) ଏଥିରେ ସନ୍ତୁଷ୍ଟ ନ ନ ଥିଲା, ବରଂ ଫିନାର ଏହି ରୁଲିଂକୁ କାସ୍ରେ ଚ୍ୟାଲେଞ୍ଜ କରିଥିଲା। ପ୍ରତିଯୋଗିତା ବାହାରେ ଅନୁଷ୍ଠିତ ଡୋପ୍ ଟେଷ୍ଟରୁ ନିଜକୁ ଦୂରେଇ ରଖିଥିବାରୁ ସନ୍ଙ୍କୁ ୨ ରୁ ସର୍ବାଧିକ ୮ ବର୍ଷ ପର୍ଯ୍ୟନ୍ତ ବାସନ୍ଦ କରିବା ଲାଗି କ୍ରୀଡ଼ାର ସର୍ବୋଚ୍ଚ ନ୍ୟାୟାଳୟରେ ଆବେଦନ କରିଥିଲା। ଚାଇନାର ଏହି ଷ୍ଟାର ସନ୍ତରଣକାରୀ ଡୋପିଂ ନିୟମ ଉଲ୍ଲଂଘନ କରି ପୂର୍ବରୁ ଥରେ ଦଣ୍ଡିତ ହୋଇ ସାରିଛନ୍ତି। ସେ ଆଉଥରେ ଏହି ଅପରାଧ କରିଥିବାରୁ ତାଙ୍କୁ କଠୋର ଦଣ୍ଡ ଦିଆଯିବା ଉଚିତ୍ ବୋଲି ଓ୍ବାଡା କହିଥିଲା। ସନ୍ କିନ୍ତୁ ନିଜକୁ ନିର୍ଦ୍ଦୋଷ ବୋଲି ଦର୍ଶାଇବା ସହ କାସ୍ର ଏହି ରୁଲିଂ ବିରୋଧରେ ସୁଇସ୍ ଫେଡେରାଲ କୋର୍ଟରେ ଚ୍ୟାଲେଞ୍ଜ କରିବେ ବୋଲି କହିଛନ୍ତି।
