ନୂଆଦିଲ୍ଲୀ,୨।୧(ପି.ଟି.)- ପୁରୁଷ ଫ୍ରିଷ୍ଟାଇଲ ୭୪ କେଜି ବର୍ଗର ଟ୍ରାଏଲ ଅନୁଷ୍ଠିତ ହେବ। ଏହାକୁ ବାତିଲ କରିବା ପାଇଁ ଆହତପ୍ରାପ୍ତ ସୁଶିଲ କୁମାର ଅନୁରୋଧ କରିଥିଲେ। କିନ୍ତୁ ତାଙ୍କ ଅନୁରୋଧକୁ ଭାରତୀୟ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ପ୍ରତ୍ୟାଖ୍ୟାନ କରିଦେଇଛି। ଦୁଇ ଥର ଅଲିମ୍ପିକ୍ ପଦକଧାରୀ ମାର୍ଚ୍ଚରେ ଟୋକିଓ ଅଲିମ୍ପିକ୍ସ ଯୋଗ୍ୟତା ହାତେଇବା ପାଇଁ ସୁଯୋଗ ପାଇଥିଲେ। ଷ୍ଟାର ରେସଲର ଏବେ କ୍ୟାରିୟରକୁ ପୁଣି ଥରେ ଆରମ୍ଭ କରିବା ଲାଗି ସଂଘର୍ଷ କରୁଛନ୍ତି। ହାତଜନିତ ଆହତ ସମସ୍ୟା କାରଣରୁ ଶୁକ୍ରବାର ହେବାକୁ ଥିବା ଟ୍ରାଏଲରୁ ଓହରିବା ସହ ବାତିଲ ପାଇଁ ଅନୁରୋଧ କରିଥିଲେ। ଏହି ଶିବିରର ବିଜେତା ୨୦୨୦ ସିଜନର ରୋମଠାରେ ପ୍ରଥମ ର଼୍ୟାଙ୍କ ସିରିଜ ଟୁର୍ନାମେଣ୍ଟ (ଜାନୁୟାରୀ ୧୫-୧୮) , ନୂଆଦିଲ୍ଲୀଠାରେ ଏସିଆନ ଚାମ୍ପିୟନଶିପ (ଫେବୃୟାରୀ ୧୮-୨୩) ଓ ଏସିଆନ ଅଲିମ୍ପିକ୍ କ୍ୱାଲିଫାୟାର (ମାର୍ଚ୍ଚ ୨୭ରୁ ୨୯)ରେ ଭାଗନେବେ। ଡବ୍ଲ୍ୟୁଏଫ୍ଆଇ ସଭାପତି ବ୍ରିଜଭୂଷଣ ଶରନ ସିଂ କହିଛନ୍ତି, ଟ୍ରାଏଲ ବାତିଲ ହେବ ନାହିଁ। ୭୪ କେଜି ବର୍ଗରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ରେସଲର ଅଛନ୍ତି। ସୁଶିଲ ଆହତ ହେଲେ ଆମେ କ’ଣ କରିପାରିବା। ଆମେ ର଼୍ୟାଙ୍କିଙ୍ଗ୍ ସିରିଜ୍ ଇଭେଣ୍ଟରେ ପ୍ରଦର୍ଶନ ଦେଖିବା ପରେ ହିଁ ନିଷ୍ପତ୍ତି ନେବୁ। ଯଦି ଏସିଆନ କ୍ୱାଲିଫାୟର୍ସ ପୂର୍ବରୁ ଡବ୍ଲ୍ୟୁଏଫ୍ଆଇ ଅନୁଭବ କରେ ସେହି ବର୍ଗରେ ଦେଶର ଯୋଗ୍ୟ ପ୍ରତିଯୋଗୀ ନାହାନ୍ତି, ତେବେ ସୁଶିଲଙ୍କୁ ଚୟନ କରାଯାଇପାରେ। ଅନ୍ୟପକ୍ଷରେ ସୁଶିଲ ନିଜ ରୁଷିଆନ କୋଚ୍ କମଲ ମାଲିକୋଭଙ୍କ ସହ ଟ୍ରେନିଂ ବେଳେ ଆହତ ହୋଇଛନ୍ତି। ଟ୍ରାଏଲ ବାତିଲ ନ ହେବା ସମ୍ପର୍କରେ ଜାଣିବା ପରେ ସୁଶିଲ କହିଛନ୍ତି, ମୋତେ ଫିଟ୍ ହେବାକୁ ଦୁଇ ସପ୍ତାହ ସମୟ ଲାଗିବ। ଚିନ୍ତା କରନ୍ତୁ ନାହିଁ, ମୁଁ ଫେରିବି। ବିଶ୍ୱ ଚାମ୍ପିୟନଶିପ୍ରେ ସମାନ ସମସ୍ୟାର ସମ୍ମୁଖୀନ ହୋଇଥିଲି। ଏ ନେଇ ଆସୋସିଏଶନ ନିକଟରେ ଖବର ରହିଛି। ଡବ୍ଲ୍ୟୁଏଫ୍ଆଇ ନିଷ୍ପତ୍ତିରେ ମୋର କିଛି ଆପତ୍ତି ନାହିଁ।
