ସିଡ୍ନୀ,୨।୧(ପି.ଟି.)- ପ୍ରସ୍ତାବିତ ୪ ଦିନିଆ ଟେଷ୍ଟ ଫର୍ମାଟକୁ ଅଷ୍ଟ୍ରେଲିଆର କେତେକ ଆଗଧାଡ଼ିର କ୍ରିକେଟର ନାପସନ୍ଦ କରିଛନ୍ତି। ନୂଆ ଫର୍ମାଟରେ ଖେଳାଯିବାକୁ ଥିବା ଟେଷ୍ଟର ଏହି ଫର୍ମାଟକୁ ସେମାନେ ବିରୋଧ କରିଛନ୍ତି। ଏଭଳି ପ୍ରସ୍ତାବ ନିହାତି ହାସ୍ୟାସ୍ପଦ ବୋଲି ଅଷ୍ଟ୍ରେଲିଆ ସ୍ପିନର ନାଥନ ଲିୟନ କହିଛନ୍ତି। ଟେଷ୍ଟର ପାରମ୍ପରିକ ୫ ଦିନିଆ ଫର୍ମାଟରେ କୌଣସି ପରିବର୍ତ୍ତନକୁ ଅଷ୍ଟ୍ରେଲିଆ ହେଡ୍ କୋଚ୍ ଜଷ୍ଟିନ୍ ଲାଙ୍ଗର ନାପସନ୍ଦ କରିଛନ୍ତି। କ୍ରିକେଟ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ କେଭିନ ରବଟର୍ସ ୪ ଦିନିଆ ଟେଷ୍ଟ ନେଇ ବୋର୍ଡ ବହୁତ ଉତ୍ସାହିତ ରହିଛି। ନୂଆବର୍ଷରେ ଆଫଗାନିସ୍ତାନ ବିପକ୍ଷରେ ଏହି ୪ ଦିନିଆ ଟେଷ୍ଟ ଅଷ୍ଟ୍ରେଲିଆ ଖେଳିପାରେ ବୋଲି ସେ ସୂଚନା ଦେବାର ଗୋଟିଏ ଦିନ ପରେ ଲିୟନ ଏଭଳି ମତ ଦେଇଛନ୍ତି।
ଏହି ନୂଆ ଫର୍ମାଟକୁ ସମ୍ପୂର୍ଣ୍ଣ ରୂପେ ବିରୋଧ କରୁଛି। ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଏହାକୁ ବିଚାରକୁ ନେବ ନାହିଁ ବୋଲି ଲିୟନ କହିଛନ୍ତି। ଅନ୍ତିମ ତଥା ପଞ୍ଚମ ଦିନରେ ହିଁ ଟେଷ୍ଟ ଫର୍ମାଟର ମଜା ଦେଖିବାକୁ ମିଳିଥାଏ। ଏ ଭଳି କେତୋଟି ଟେଷ୍ଟ ମଧ୍ୟ ମୁଁ ଖେଳିଛି। ଉଲ୍ଲେଖଥାଉ କି, ୨୦୨୩ରେ ଆଇସିସି ୪ ଦିନିଆ ଟେଷ୍ଟକୁ ବିଶ୍ୱ ଟେଷ୍ଟ ଚାମ୍ପିୟନଶିପ୍ରେ ସାମିଲ କରିବ ବୋଲି କୁହାଯାଇଥିଲା। ତେବେ ପ୍ରସ୍ତାବିତ ଏହି ନୂଆ ଫର୍ମାଟକୁ ଆଦୌ ପସନ୍ଦ କରେନାହିଁ। ବରଂ ୫ ଦିନିଆ ଟେଷ୍ଟ ଶ୍ରେଷ୍ଠ ବୋଲି ଲାଙ୍ଗର ମତ ଦେଇଛନ୍ତି। ଯଦି ବି ଟେଷ୍ଟ କ୍ରିକେଟକୁ ଜୀବିତ ରଖିବା ପାଇଁ ଓ ଏହାର ଲୋକପ୍ରିୟତା ୪ ଦିନିଆ ଫର୍ମାଟ ଖେଳାଯିବ ତା’ହାଲେ ଏହାର ସୁଫଳ ଦେଖିବା ଜରୁରୀ। କିନ୍ତୁ ୫ ଦିନିଆ ଟେଷ୍ଟକୁ ଅଧିକ ପସନ୍ଦ କରେ। କାରଣ ଏଥିରେ ପରିବର୍ତ୍ତନ ଚାହେଁନାହି ବୋଲି ଲାଙ୍ଗର କହିଛନ୍ତି। ୨୦୧୪ରେ ଆଡିଲେଡରେ ଖେଳାଯାଇଥିବା ଭାରତ ବିପକ୍ଷ ଟେଷ୍ଟର ଉଦାହରଣ ଦେଇଛନ୍ତି ଲିୟନ। ଏହି ମ୍ୟାଚ୍ର ଅନ୍ତିମ ଘଣ୍ଟାରେ ଅଷ୍ଟ୍ରେଲିଆ ବିଜୟୀ ହୋଇଥିଲା। ଏହି ମ୍ୟାଚ୍ ମଧ୍ୟ ବେଶ୍ ଉପଭୋଗ୍ୟ ଥିଲା ବୋଲି ଲିୟନ କହିଛନ୍ତି। ସେହିପରି ୨୦୧୪ରେ ଖେଳାଯାଇଥିବା କେପ୍ଟାଉନ ଟେଷ୍ଟ ମଧ୍ୟ ବେଶ୍ ରୋମାଞ୍ଚକ ଥିଲା। ଆଉ ଦୁଇ ଓଭର ପରେ ମ୍ୟାଚ୍ ଶେଷ ହେବାକୁ ଯାଉଥିବା ବେଳେ ମର୍ନ ମୋର୍କେଲଙ୍କୁ ରିଆନ ହାରିସ ବୋଲ୍ଟ କରିଥିଲେ ଓ ମ୍ୟାଚ୍ ଅଷ୍ଟ୍ରେଲିଆ ସପକ୍ଷରେ ଯାଇଥିଲା ବୋଲି ଲିୟନ ମନେ ପକାଇ କହିଛନ୍ତି।
ଉଲ୍ଲେଖଥାଉ କି, ୪ ଦିନିଆ ଟେଷ୍ଟରେ ଗୋଟିଏ ଦିନରେ ୯୦ ବଦଳରେ ୯୮ ଓଭର ବୋଲିଂ କରାଯିବ। ଗତ ୧୦ ବର୍ଷ ମଧ୍ୟରେ ଅଷ୍ଟ୍ରେଲିଆରେ ଖେଳାଯାଇଥିବା ୪୩ଟି ଟେଷ୍ଟ ଫଳାଫଳ ମିଳିଥିଲା। ତେବେ ୩୮ଟି ମ୍ୟାଚ୍ର ଫଳାଫଳ ୩୯୨ ଓଭରରେ ଅର୍ଥାତ ୪ଦିନ ମଧ୍ୟରେ ମିଳିଯାଇଥିଲା। ତେବେ ୪ ଦିନିଆ ଟେଷ୍ଟ ନୂଆ ଚ୍ୟାଲେଞ୍ଜ୍ ସୃଷ୍ଟି କରିଛି ବୋଲି ଲିୟନ କହିଛନ୍ତି। ଅଷ୍ଟ୍ରେଲିଆ ଟେଷ୍ଟ ଅଧିନାୟକ ଟିମ୍ ପେନ୍ ଓ ଉପ- ଅଧିନାୟକ ଟ୍ରାଭିସ ହେଡ ମଧ୍ୟ ୫ଦିନିଆ ଟେଷ୍ଟକୁ ସମର୍ଥନ ଜଣାଇଛନ୍ତି।
