କଟକ ଅଫିସ,୨୪।୧୧: କଟକ ଚାଉଳିଆଗଞ୍ଜ ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ପରକୀୟା ପ୍ରୀତିରେ ଅନ୍ଧହୋଇ ମା’ ତା’ର ଦୁଇ ଛୁଆଙ୍କୁ ଛାଡ଼ି ଅନ୍ୟ ପୁରୁଷ ସହ ଫେରାର ହୋଇଯାଇଛନ୍ତି। ଶୁକ୍ରବାର ସନ୍ଧ୍ୟାରେ ଚାଉଳିଆଗଞ୍ଜ ବ୍ରହ୍ମପୁର ବସ୍ତି ଅଞ୍ଚଳର ନାଳବନ୍ଧରେ ପୁରୀ ଅଞ୍ଚଳର ଜଣେ ମହିଳା ତାଙ୍କର ଦୁଇ ପିଲାଙ୍କୁ ନେଇ ପହଞ୍ଚିଥିଲେ। ଏଠାରେ ଜଣେ ପୁରୁଷ ତାଙ୍କୁ ବିବାହ କରିବାକୁ କହି ପିଲାଙ୍କୁ ଛାଡ଼ି ତାଙ୍କ ସହ ଯିବାକୁ ବାଧ୍ୟ କରିଥିଲେ। ପରେ ଉଭୟ ଏହି ପିଲାଙ୍କୁ ଛାଡ଼ି ସେଠାରୁ ଚାଲି ଯାଇଥିଲେ। ଦୁଇପିଲା କାନ୍ଦି କାନ୍ଦି ମା’ ପଛରେ ଧାଇଁଥିଲେ ମଧ୍ୟ ମା’ ଅନ୍ୟ ପୁରୁଷ ସହ ବାଇକ୍ରେ ବସି ଚାଲି ଯାଇଥିଲେ। ଫଳରେ ଦୁଇପିଲା କାନ୍ଦି କାନ୍ଦି ବୁଲୁଥିବାବେଳେ ସ୍ଥାନୀୟ ଅଞ୍ଚଳର ଦୋକାନୀ ଟୁକୁନା ଦାସ ସେମାନଙ୍କୁ ଦେଖିଥିଲେ। କ’ଣ ପାଇଁ କାନ୍ଦୁଛ ବୋଲି ପଚାରିବାରୁ ବଡ଼ ଝିଅ(୭) ଟୁକୁନାଙ୍କୁ ସବୁ କଥା କହିଥିଲେ। ପରେ ଟୁକୁନା ଉଭୟଙ୍କୁ ନେଇ ନିଜ ପାଖରେ ରଖିଥିଲେ। ଶନିବାର ସକାଳେ ଟୁକୁନା ଚାଉଳିଆଗଞ୍ଜ ଥାନାରେ ଜଣାଇବା ପରେ ପୋଲିସ ଦୁଇପିଲାଙ୍କୁ ଥାନାକୁ ଆଣି ଜିଲା ଶିଶୁ ମଙ୍ଗଳ କମିଟିର ଅଧିକାରୀଙ୍କୁ ଜଣାଇଥିଲା। ଚାଇଲ୍ଡ ଲାଇନର ନାରାୟଣ ଶୁକ୍ଳ ଥାନାରେ ପହଞ୍ଚିବା ସହ ପିଲାଦ୍ୱୟଙ୍କୁ ଆଣି ସିଡବ୍ଲ୍ୟୁସିରେ ହାଜର କରାଇଥିଲେ। ପରେ ସେଠାରୁ ସେମାନଙ୍କୁ ବସୁନ୍ଧରା ନିଆଯାଇଛି। ଏହି ପିଲାମାନଙ୍କ ପରିବାର ସହ ଯୋଗାଯୋଗ କରାଯାଉଛି ବୋଲି ଶୁକ୍ଳ କହିଛନ୍ତି। ଅନ୍ୟପକ୍ଷରେ ପାରିବାରିକ କଳହରୁ ଏହି ଦୁଇ ପିଲାଙ୍କ ମାଆ ଓ ବାପା ଅଲଗା ରହୁଥିଲେ। ପରେ ମା’ଙ୍କ ପାଖରେ ପିଲାଦ୍ୱୟ ରହୁଥିବା ସୂଚନା ମିଳିଛି।
