ବାଙ୍ଗିରିପୋଷି,୧୪ା୧୦(ଡି.ଏନ୍.ଏ.)- ମୟୂରଭଞ୍ଜ ଆଦିବାସୀ ରିଭୋଲ୍ୟୁସନାରୀ ୟୁଥ ଆଣ୍ଡ ଷ୍ଟୁଡେଣ୍ଟ ଆସୋସିଏସନ (ମାରିସା ସେନା) ପକ୍ଷରୁ ସୋମବାର ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ଧାରଣା ଦିଆଯାଇଥିଲା। ସେନାର ଜିଲା ସଭାପତି ଅର୍ଜୁନ ମୁର୍ମୁଙ୍କ ନେତୃତ୍ୱରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଲକ୍ଷ୍ମୀପ୍ରିୟା ପ୍ରଧାନଙ୍କୁ ୬ ଦଫା ସମ୍ବଳିତ ଏକ ଦାବିପତ୍ର ମଧ୍ୟ ପ୍ରଦାନ କରାଯାଇଛି। ଗତ ୪ ତାରିଖରେ ଆମ୍ବୁଲାନ୍ସରୁ ତେଲ ସରିଯିବାରୁ ସ୍ଥାନୀୟ ହାଣଦା ଗ୍ରାମର ଚିତ୍ତରଞ୍ଜନ ମୁଣ୍ଡାଙ୍କ ସ୍ତ୍ରୀ ତୁଳସୀଙ୍କ ସମେତ ତାଙ୍କ ଗର୍ଭସ୍ଥ ଶିଶୁର ମୃତ୍ୟୁ ଘଟିଥିଲା। ଏହି ଦୁଃଖଦ ତଥା ଲଜ୍ଜାଜନକ ଘଟଣାକୁ ମାରିସା ସେନା ପକ୍ଷରୁ ନିନ୍ଦା କରାଯାଇଥିଲା। ମୃତ ମହିଳାଙ୍କ ପରିବାରକୁୁ ୨୦ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରାଯିବା, ଜିଲାରେ ଶିଶୁ ମାତୃ ମୃତ୍ୟୁ ବନ୍ଦ ଲାଗି ପ୍ରତିକାର ବ୍ୟବସ୍ଥା କରାଯିବା, ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ୨୪ ଘଣ୍ଟା ନିରାମୟ କେନ୍ଦ୍ରକୁ ଖୋଲା ରଖାଯିବା, ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପ୍ରସୂତି ଓ ଶିଶୁରୋଗ ବିଶେଷଜ୍ଞ ଡାକ୍ତର ନିଯୁକ୍ତି ଦିଆଯିବା ଏବଂ ନୂତନ ଆମ୍ବୁଲାନ୍ସ ପ୍ରଦାନ ବ୍ୟବସ୍ଥା ପ୍ରତି ଧ୍ୟାନ ଦିଆଯିବା ପାଇଁ ସେନା ପକ୍ଷରୁ ଦାବି କରାଯାଇଛି। ଏହାର ପ୍ରତିକାର ପାଇଁ ଯଦି କୌଣସି ବ୍ୟବସ୍ଥା କରା ନ ଯାଏ ତେବେ ମାରିସା ସେନା ପକ୍ଷରୁ ଆଗାମୀ ଦିନରେ ଗଣତାନ୍ତ୍ରିକ ପଦ୍ଧତିରେ ଆନ୍ଦୋଳନାମତ୍କ ପନ୍ଥା ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି। ଅନ୍ୟମାନଙ୍କ ମଧ୍ୟରେ ବାମନଘାଟି ସବଡିଭିଜନ ସଭାପତି ଜିତରାୟ ମାରାଣ୍ଡି, ବାବୁଲୁ ମାରାଣ୍ଡି, ପ୍ରଭାସ ମାରାଣ୍ଡି, ଦୋଳଗୋବିନ୍ଦ ସିଂ, ପରେଶ ମାରାଣ୍ଡି, ସହଦେବ ମାରାଣ୍ଡି, ବାଲିଆ ମୁର୍ମୁ, ଦାକ୍ଷିନ ମମାରାଣ୍ଡି ଏବଂ ରାଜୁ ସିଂ ପ୍ରମୁଖ ଉପସ୍ଥିତ ଥିଲେ ା
