ଭଞ୍ଜନଗର,୩।୧୨(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ସ୍ଥିତ ଘୁମୁସର ଉତ୍ତର ବନଖଣ୍ଡ ପକ୍ଷରୁ ବୁଧବାର ଗଜସାଥି ଦକ୍ଷତା ପ୍ରଶିକ୍ଷଣ ଶିବିର ସ୍ଥାନୀୟ ନିୟନ୍ତ୍ରିତ ବଜାର କମିଟି ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି । ଏଥିରେ ବ୍ରହ୍ମପୁର ଆଞ୍ଚଳିକ ମୁଖ୍ୟ ବନ ସଂରକ୍ଷକ ବିଶ୍ୱନାଥ ନୀଳାମ୍ବର ମୁଖ୍ୟ ଅତିଥି ଭାବେ ଯୋଗଦେଇ ଲୋକଙ୍କ ମଧ୍ୟରେ ସଚେତନତା ବଢ଼ିଲେ ହାତୀ ମଣିଷ ଲଢେଇ କମିବ ବୋଲି କହିଥିଲେ। ଏଥିପାଇଁ ଗଜସାଥିଙ୍କ ଭୂମିକା ଗୁରୁତ୍ୱପୂର୍ଣ୍ଣ। ଯେଉଁ ଗଜସାଥୀ ଉପଯୁକ୍ତ ସୂଚନା ଦେବେ ତାଙ୍କୁ ପୁରସ୍କାର ଦେବା ବ୍ୟବସ୍ଥା ଅଛି। ଏଥିସହ ଗଜସାଥିମାନେ ଗାଁକୁ ଗାଁ ବୁଲି ଶିକାର , ହୁକିଙ୍ଗ ଉପରେ ତଥ୍ୟ ସଂଗ୍ରହ କରିବେ। ଏହାପରେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ତଥ୍ୟ ପ୍ରଦାନ କରିବେ। ହାତୀମାନଙ୍କ ସୁରକ୍ଷା ପାଇଁ ସରକାର ଏସଓପି ଜାରି କରିଛନ୍ତି। ଏସଓପି ଆଧାରରେ ହାତୀଙ୍କ ସୁରକ୍ଷା କରାଯିବ ବୋଲି ଆର୍ସିସିଏଫ କହିଥିଲେ। ୧୦ ବର୍ଷ ପୂର୍ବେ ହାତୀ ମଣିଷ ଲଢେଇ ରାଜ୍ୟରେ ପ୍ରାୟ ନଥିଲା। କିନ୍ତୁ ସମୟ ବଦଳି ଯାଇଛି। ବିଭିନ୍ନ କାରଣ ଯୋଗୁ ଏହି ସମସ୍ୟା ବଢ଼ିଯାଇଛି। ଆଗକୁ ବଢିବା ମଧ୍ୟ ସମ୍ଭାବନା ରହିଛି। ଏହାକୁ ରୋକିବା ପାଇଁ ବନ କର୍ମଚାରୀ ଏକାକୀ ସମ୍ଭବପର ନୁହେଁ। ତେଣୁ ତାହାକୁ କଡାକଡି ଭାବେ ପାଳନ କରାଯିବ ବୋଲି ଆର୍ସିସିଏଫ କହିଥିଲେ। ନୂଆ ଏସଓପି ଅନୁସାରେ ଦୁଇଜଣ ଗଜସାଥୀ ଗାଁକୁ ଯାଇ ସମ୍ପୃକ୍ତ ପଞ୍ଚାୟତ ସରପଞ୍ଚ କିମ୍ବା ଅନ୍ୟ ନେତାମାନଙ୍କୁ ଭେଟି ତଥ୍ୟ ସଂଗ୍ରହ କରିବେ। ଲୋକଙ୍କୁ ସଚେତନ କରାଇବେ। ଲୋକଙ୍କ ଫସଲ କ୍ଷତି ହେଲେ ଗଜସାଥିମାନେ ଚାଷୀଙ୍କୁ ସହଯୋଗ କରିବେ କି କିଭଳି ଫସଲ କ୍ଷତିପୂରଣ ମିଳିପାରିବ। ବିଭିନ୍ନ ସୂଚନା ଦେଲେ ସେମାନଙ୍କୁ ପ୍ରୋତ୍ସାହନ ରାଶି ମିଳିବ। ବନପାଳମାନେ ସାପ୍ତାହିକ ସମୀକ୍ଷା କରିବେ। ଅଞ୍ଚଳବାସୀଙ୍କ ବିଭିନ୍ନ ସମସ୍ୟାକୁ କର୍ମଚାରୀମାନେ ସମାଧାନ କରିବା ପାଇଁ ପଦକ୍ଷେପ ନେବେ। ଯାହା ବିଭାଗର କାମ ସଂପୃକ୍ତ ବିଭାଗ ଅଧିକାରୀଙ୍କୁ ଲିଖିତ ଭାବେ ଜଣାଇ ସମସ୍ୟାର ସମାଧାନ କରିବେ। ଏହାଦ୍ବାରା ଲୋକଙ୍କ ସମସ୍ୟାର ସମାଧାନ ସହ ବିଭାଗ ପ୍ରତି ଲୋକଙ୍କ ବିଶ୍ବାସ ବଢିବ। ଏଥିପ୍ରତି ଦୃଷ୍ଟି ଦେବାପାଇଁ ଆରସିସିଏଫ ଉପସ୍ଥିତ ଗଜସାଥି ଏବଂ କର୍ମଚାରୀଙ୍କୁ ଆହ୍ବାନ କରିଥିଲେ। ଅନ୍ୟମାନଙ୍କ ମଧ୍ୟରେ ଭଞ୍ଜନଗର ଡିଏଫଓ ହିମାଂଶୁ ଶେଖର ମହାନ୍ତି, ବନ୍ୟପ୍ରାଣୀ ନିର୍ଦ୍ଦେଶକ ଅବସରପ୍ରାପ୍ତ ଆଇଏଫଏସ ଅଧିକାରୀ ଅରୂପ ନାୟକ, ବାଲିଗୁଡା ଡିଏଫଓ ଘନଶ୍ୟାମ ମହାନ୍ତି , ସ୍ନେହା ନିର୍ଦ୍ଦେଶକ ରଞ୍ଜିତ ପଟ୍ଟନାୟକ ପ୍ରମୁଖ ଆଲୋଚନାର ଭାଗନେଇ ବନ୍ୟପ୍ରାଣୀ କିଭଳି ସୁରକ୍ଷିତ ରହିପାରିବ ସେ ଉପରେ କହିଥିଲେ। ମୁଜାଗଡ ରେଞ୍ଜର ବିମ୍ବାଧର ସାହୁ ସ୍ବାଗତ ଭାଷଣ ଦେଇଥିବା ବେଳେ କେନ୍ଦ୍ରୀୟ ବନାଞ୍ଚଳ ଅଧିକାରୀ ପୃଥିବୀ ରାଜ ପ୍ରଧାନ ଧନ୍ୟବାଦ ପ୍ରଦାନ କରିଥିଲେ।
