ଦାରିଙ୍ଗବାଡି,୨୨।୪(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ପାଙ୍ଗାଲି ଗ୍ରାମ ନିକଟରେ ମର୍ମନ୍ତୁଦ ଦୁର୍ଘଟଣା । ବାଇକ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ହୋଇଛି । ମୃତକ ହେଲେ ଦାରିଙ୍ଗବାଡି ଥାନା ସୋନପୁର ପଞ୍ଚାୟତର ସମୀର ବଡାଇକ (୩୨)ବୋଲି ତଦନ୍ତକାରୀ ଅଧିକାରୀ ଶ୍ରୀନିବାସ ରାଓ କହିଛନ୍ତି ।
ପ୍ରକାଶ ଯେ ସମୀର ସକାଳୁ କୌଣସି କାର୍ଯ୍ୟରେ ଦାରିଙ୍ଗବାଡି ନିଜ ବାଇକରେ ଆସିଥିଲେ । କାର୍ଯ୍ୟ ସାରି ସେ ନିଜ ଗାଁ ସୋନପୁରକୁ ଫେରୁଥିଲେ । ଏହି ସମୟରେ ପ୍ଳିହେରୀ ପଞ୍ଚାୟତ ପାଙ୍ଗାଲି ନିକଟ ରାସ୍ତା କଡ଼ରେ ଥିବା ରେଲିରେ ପିଟି ହୋଇ ଗୁରୁତର ହୋଇପଡ଼ିଥିଲେ । ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଦାରିଙ୍ଗବାଡି ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଏନେଇ ମୃତ ସମୀରଙ୍କ ପରିବାର ପକ୍ଷରୁ ଦାରିଙ୍ଗବାଡି ଥାନାରେ ଘଟଣା ସମ୍ପର୍କରେ ଲିଖିତ ଜଣାଇବା ପରେ ପୋଲିସ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ମୃତଦେହ ଜବତ କରି ବ୍ୟବଛେଦ ପାଇଁ ପଠାଇଥିଲା । ଏନେଇ ଥାନାରେ ମାମଲା (୧୦୨/୨୬)ରୁଜୁ କରି ପୋଲିସ ଅଧିକା ତଦନ୍ତ ଚଳାଇଥିବା ତଦନ୍ତକାରୀ ଅଧିକାରୀ କହିଛନ୍ତି ।
