ଲକ୍ଷ୍ନୌ,୨୨ା୪: ରବୀନ୍ଦ୍ର ଜାଡେଜାଙ୍କ ଅଲରାଉଣ୍ଡ ପ୍ରଦର୍ଶନ ଓ ବୋଲରଙ୍କ ଘାତକ ବୋଲିଂ ବଳରେ ରାଜସ୍ଥାନ ରୟାଲ୍ସ ୪୦ ରନରେ ଲକ୍ଷ୍ନୌ ସୁପର ଜାଏଣ୍ଟ୍ସକୁ ପରାସ୍ତ କରିଛି। ଏହା ରାଜସ୍ଥାନ ଲାଗି ସପ୍ତମ ମ୍ୟାଚ୍ରେ ପଞ୍ଚମ ବିଜୟ। ଏଥିସହିତ ଦଳ ୧୦ ପଏଣ୍ଟ ସହ ଦ୍ୱିତୀୟ ସ୍ଥାନକୁ ଉଠିଛି। ବ୍ୟାଟିଂ କରିଥିବା ରାଜସ୍ଥାନ କ୍ରମାଗତ ବ୍ୟବଧାନରେ ଉଇକେଟ ହରାଇ ୨୦ ଓଭରରେ ୬ ଉଇକେଟ ହରାଇ ୧୫୯ ରନ କରିଥିଲା। ଜଶସ୍ବୀ ଜୟସ୍ବାଲ (୨୨ ରନ, ୪ ଚୌକା), ଅଧିନାୟକ ରିୟାନ ପରାଗ (୨୦), ଶିମରନ ହେଟମାୟର (୨୨) ଓ ଡୋନୋଭାନ ଫରେରା (୨୦)ଙ୍କୁ ଭଲ ଆରମ୍ଭ ମିଳିଥିଲେ ହେଁ ସେମାନେ ତାହାକୁ ବଡ଼ ସ୍କୋରରେ ପରିଣତ କରିପାରି ନ ଥିଲେ। ଶେଷ ଆଡ଼କୁ ରବୀନ୍ଦ୍ର ଜାଡେଜା ୨୯ ବଲରେ ୪୩ (୨ ଚୌକା ଓ ୧ ଛକା) ଓ ଶୁଭମ ଦୁବେ ୧୧ ବଲରେ ୧୯ (୩ ଚୌକା) ରନ କରିଥିଲେ। ଲକ୍ଷ୍ନୌ ପାଇଁ ମହମ୍ମଦ ଶାମି, ପ୍ରିନ୍ସ ଯାଦବ ଓ ମହସିନ ଖାନ ଦୁଇ ଲେଖାଏ ଉଇକେଟ ନେଇଥିଲେ।
ଜବାବରେ ରାଜସ୍ଥାନ ଭଳି ଲକ୍ଷ୍ନୌ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଏକାକୀ ମିଚେଲ ମାର୍ଶ (୪୧ ବଲ, ୫୫ ରନ, ୬ ଚୌକା ଓ ୨ ଛକା) ଅର୍ଦ୍ଧଶତକୀୟ ଇନିଂସ ଖେଳିଥିବା ବେଳେ ଅନ୍ୟ କୌଣସି ବ୍ୟାଟର ତାଙ୍କୁ ଆବଶ୍ୟକୀୟ ସହାୟତା ଯୋଗାଇପାରି ନ ଥିଲେ। ଆୟୁଷ ବଦୋନୀ, ଅଧିନାୟକ ରିଷଭ ପନ୍ତ ଓ ଏଡେନ ମାରକ୍ରାମ ଖାତା ଖୋଲିପାରି ନ ଥିବା ବେଳେ ନିକୋଲାସ ପୁରନ ୨୨, ମୁକୁଲ ଚୌଧାରୀ ୭ ଓ ହିମତ ସିଂ ୧୫ ରନ କରିଥିଲେ। ଫଳରେ ଲକ୍ଷ୍ନୌ ୧୮ ଓଭରରେ ୧୧୯ ରନରେ ଅଲଆଉଟ୍ ହୋଇଯାଇଥିଲା। ବିଜୟୀ ଦଳ ପାଇଁ ଜୋଫ୍ରା ଆର୍ଚ୍ଚର ୩ ଉଇକେଟ ନେଇଥିବା ବେଳେ ବ୍ରିଜେଶ ଶର୍ମା ଓ ନାନ୍ଦ୍ରେ ବର୍ଗର ଦୁଇଟି ଲେଖାଏ ଉଇକେଟ ନେଇଥିଲେ।
