ଦାରିଙ୍ଗବାଡ଼ି,୨୨ା୪(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ସିମନବାଡ଼ି ପଞ୍ଚାୟତର ଏକ ୯ ହେକ୍ଟର ଜମିରେ ଶିଳ୍ପ ସ୍ଥାପନ ହେବ। ଏଥିପାଇଁ ଇଡ୍କୋ ଏବଂ ରାଜ୍ୟ ପର୍ଯ୍ୟଟନ ଉନ୍ନୟନ ବିଭାଗ ପ୍ରସ୍ତୁତି ଚଳାଇଥିବାବେଳେ ଏହାକୁ ନେଇ ସିମନବାଡ଼ି ଅଞ୍ଚଳରେ ଏବେ ତୀବ୍ର ଅସନ୍ତୋଷ ଦେଖାଯାଇଛି। ବୁଧବାର ଏକାଧିକ ଚାଷୀ ଏକାଠି ହୋଇ ଏହି ସମ୍ପର୍କିତ ଏକ ବୈଠକ କରି ଜମି ନ ଛାଡ଼ିବାକୁ ଓ ଏଥିପାଇଁ ଲଢେଇ କରି ନିଜ ଜୀବନଜୀବିକାକୁ ବଞ୍ଚାଇବାକୁ ପ୍ରୟାସ କରିବା ପାଇଁ ନିଷ୍ପତ୍ତି ନେଇଛନ୍ତି। ଜୀବନଜୀବିକା ବାଧାପ୍ରାପ୍ତ ହେବା ସହ ବହୁ ଲୋକଙ୍କୁ ଘରବାଡ଼ି ଜମି ପଟ୍ଟା ପ୍ରଦାନ କରାଯାଇଥିଲେ ମଧ୍ୟ ହିତାଧିକାରୀ ଉକ୍ତ ଜମିକୁ ଅଧିଗ୍ରହଣ କରିନାହାନ୍ତି। ସେହିସବୁ ଜମିକୁ ରାଜ୍ୟ ପର୍ଯ୍ୟଟନ ଉନ୍ନୟନ ବିଭାଗ ପକ୍ଷରୁ ଜମି ଚିହ୍ନଟ କାର୍ଯ୍ୟ କରଯାଉଥିବା ଓ ଏହି ଜମି ପାଇବା ପାଇଁ ଇଡ୍କୋ ତହସିଲ କାର୍ଯ୍ୟାଳୟରେ ଆବେଦନ କରିଥିବା ଘଟଣାକୁ ନେଇ ଅଞ୍ଚଳବାସୀ ତାତିଛନ୍ତି। ଶିଳ୍ପକୁ ବିରୋଧ ନୁହଁ ଜମି ଛଡ଼ାଇନେବାକୁ ବିରୋଧ କରୁଥିବା ଗ୍ରାମର ନଟବର ପ୍ରଧାନ, ସାନ୍ଦୁରା ପ୍ରଧାନ, ସଞ୍ଜୟ ବିନ୍ଧାଣିଙ୍କ ସମେତ ଶତାଧିକ ଲୋକ ପ୍ରତିକ୍ରିୟାରେ କହିଛନ୍ତି।
