ନୂଆଦିଲ୍ଲୀ,୨୦।୧୦: ହାଇଦ୍ରାବାଦର କୋମ୍ପାଲି ଅଞ୍ଚଳରେ ଜଣେ ଓଡ଼ିଆ ମହିଳାଙ୍କୁ ବଳାତ୍କାର ପରେ ହତ୍ୟା କରାଯାଇଥିବା ସଙ୍ଗୀନ ଅଭିଯୋଗ ହୋଇଛି। ମୃତକ ଭୁବନେଶ୍ୱରର ଭରତପୁର ଅଞ୍ଚଳର ବାସିନ୍ଦା ଥିଲେ ଏବଂ ସ୍ୱାମୀ ଓ ୪ ବର୍ଷର ପୁଅ ସହିତ ଗତ ଛଅ ମାସ ହେବ ସେଠାରେ ରହୁଥିଲେ।
ମହିଳାଙ୍କ ସ୍ୱାମୀ ଏକ ନିର୍ମାଣ କମ୍ପାନୀର କ୍ୱାର୍ଟର୍ସରେ ରହି କାମ କରୁଥିଲେ। ସ୍ୱାମୀ ପାସ୍ପୋର୍ଟ କାମ ପାଇଁ ପୁଅକୁ ନେଇ ଓଡ଼ିଶା ଆସିଥିବା ବେଳେ ଗୁରୁବାର ରାତିରେ ଏହି ଘଟଣା ଘଟିଛି।
ମହିଳାଙ୍କ ମା’ଙ୍କ ଅଭିଯୋଗ ଅନୁଯାୟୀ, ଗୁରୁବାର ରାତିରେ ଜଣେ ଲୋକ ମହିଳାଙ୍କ କ୍ୱାର୍ଟର୍ସରେ ପଶି ଖଟ ତଳେ ଲୁଚି ରହିଥିଲା ଏବଂ ପରେ ବଳାତ୍କାର କରି ହତ୍ୟା କରିଥିଲା। ପଡ଼ୋଶୀମାନେ ଜଣେ ନିଶାସକ୍ତ ବ୍ୟକ୍ତିକୁ ଘରୁ ବାହାରକୁ ଯାଉଥିବା ଦେଖିଥିବା ସେ କହିଛନ୍ତି। ତାଙ୍କ ଝିଅ ମାନସିକ ଚାପରେ ନ ଥିଲା, ତେଣୁ ଏହା ଆତ୍ମହତ୍ୟା ନୁହେଁ ବୋଲି ପରିବାର ଲୋକେ ଦୃଢ଼ୋକ୍ତି ପ୍ରକାଶ କରିଛନ୍ତି।
ଏହି ଘଟଣାରେ ପେଟ-ବଶୀରାବାଦ ପୋଲିସ୍ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ମୃତ୍ୟୁର କାରଣ ଜାଣିବା ପାଇଁ ଶବ ବ୍ୟବଚ୍ଛେଦ ପାଇଁ ପଠାଯାଇଛି ଏବଂ ପୋଲିସ ବଳାତ୍କାର ଓ ହତ୍ୟା ସମେତ ସମସ୍ତ ଦିଗକୁ ତଦନ୍ତ କରୁଛି। ତେବେ ଏପର୍ଯ୍ୟନ୍ତ କାହାରିକୁ ଗିରଫ କରାଯାଇ ନାହିଁ। ପଶ୍ଚିମବଙ୍ଗରେ ଜଣେ ଓଡ଼ିଆ ଛାତ୍ରୀଙ୍କ ଗଣବଳାତ୍କାର ଘଟଣା ପରେ ଏହି ଘଟଣାକୁ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି।
