ନୂଆଦିଲ୍ଲୀ,୩।୯: ଅର୍ଥ ମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ ୫୬ତମ ଜିଏସ୍ଟି କାଉନ୍ସିଲ୍ ବୈଠକରେ ଜିଏସ୍ଟି ହାର ସରଳୀକରଣକୁ ମଞ୍ଜୁର କରାଯାଇଛି। ୧୨% ଓ ୨୮% ସ୍ଲାବ୍କୁ ରଦ୍ଦ କରି ଦୁଇହାର ଟିକସ ଗଠନ ୫% ଓ ୧୮% ଲାଗୁ ହେବ। ପାନ ମସଲା ଓ ତମାଖୁ ଜାତୀୟ ସୌଖୀନ ସାମଗ୍ରୀ ପାଇଁ ୪୦% ‘ସିନ୍ ଟ୍ୟାକ୍ସ’ ପ୍ରବର୍ତ୍ତନ କରାଯାଇଛି। ଏହି ନୂଆ ଗଠନ ୨୨ ସେପ୍ଟେମ୍ବର ୨୦୨୫ରୁ କାର୍ଯ୍ୟକାରୀ ହେବ।
ସୀତାରମଣ କହିଛନ୍ତି, “ଆମେ ସ୍ଲାବ୍ ସଂଖ୍ୟା ହ୍ରାସ କରିଛୁ। ଏବେ କେବଳ ଦୁଇଟି ସ୍ଲାବ୍ ରହିବ ଏବଂ କମ୍ପୋନସେସନ୍ ସେସ୍ ସମସ୍ୟାର ସମାଧାନ କରାଯାଉଛି।” ଏହି ପୁନର୍ଗଠନରେ କ୍ଷୀର, ପନୀର, ସ୍ନାକ୍ସ, ରୁଟି ଭଳି ୧୭୫ଟି ଅତ୍ୟାବଶ୍ୟକ ସାମଗ୍ରୀ ଶସ୍ତା ହେବ। ୧୨% ଟିକସ ଥିବା ୯୯% ସାମଗ୍ରୀ ୫% ସ୍ଲାବ୍କୁ ଏବଂ ୨୮% ଟିକସ ଥିବା ୯୦% ସାମଗ୍ରୀ ୧୮% ସ୍ଲାବ୍କୁ ସ୍ଥାନାନ୍ତରିତ ହେବ। ପ୍ରାୟ ଡଜନେକ ସୌଖୀନ ସାମଗ୍ରୀ ଉପରେ ୪୦% ‘ସିନ୍ ଟ୍ୟାକ୍ସ’ ଲାଗୁ ହେବ।
ଏହା ପୂଜା ଅବସରରେ ଜନସାଧାରଣଙ୍କ ପାଇଁ ସରକାରଙ୍କର ଏକ ବଡ଼ ଭେଟି ଭାବେ ଦେଖାଯାଉଛି, ଯାହା ଦୈନନ୍ଦିନ ଜୀବନଯାତ୍ରାକୁ ଅଧିକ ସୁଲଭ କରିବ।
