ଭୁବନେଶ୍ୱର,୪।୧୧: ବାଓଭର୍ଟ ଏକ୍ସପର୍ଟ ପ୍ରାଇଭେଟ ଲିମିଟେଡର ପ୍ରମୁଖ କମ୍ପାନୀ ତଥା ନୂତନ ମସଲା ବ୍ରାଣ୍ଡ୍ ସିଦ୍ଧି ସ୍ପାଇସେସର ଶୁଭାରମ୍ଭ ନିକଟରେ ହୋଇଯାଇଛି। ଏହି ପରିପ୍ରେକ୍ଷୀରେ ଶୁକ୍ରବାର ଭୁବନେଶ୍ୱରର ମଞ୍ଚେଶ୍ୱର ଶିଳ୍ପାଞ୍ଚଳଠାରେ ‘ସିଦ୍ଧି ସ୍ପାଇସେସ୍’ ଆନୁଷ୍ଠାନିକ ଭାବେ ଉଦ୍ଘାଟିତ ହୋଇଯାଇଛି।
ଏହି ଅବସରରେ ରୋଟାରୀ କ୍ଲବର ଅଧ୍ୟକ୍ଷା ସଂଯୁକ୍ତା ନାୟକ ଏବଂ ସ୍ବୟଂ ସିଦ୍ଧି ସମ୍ମାନିତ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ପୂର୍ବତନ କେନ୍ଦ୍ରୀୟ ଶ୍ରମ ସଚିବ ନାରାୟଣ ତ୍ରିପାଠୀ, ରାଜ୍ୟ କ୍ଷୁଦ୍ର ଓ ମଧ୍ୟମ ଶିଳ୍ପର ସ୍ବତନ୍ତ୍ର ସଚିବ ବିଭୂତି ଦାସ, କେନ୍ଦ୍ରୀୟ ଶ୍ରମ କଲ୍ୟାଣ ବିଭାଗ ସଚିବ ସଞ୍ଜୀବ ବର୍ମା, ଏକ୍ସଆଇଏମବି ପ୍ରଫେସର ଗୋପାଳ କୃଷ୍ଣ ନାୟକ, କମଳାକାନ୍ତ ମିଶ୍ର ଓ ଅନ୍ୟମାନେ ଅତିଥି ଭାବେ ଯୋଗ ଦେଇଥିଲାବେଳେ କମ୍ପାନିର ବରିଷ୍ଠ ଅଧିକାରୀ ଓ କର୍ମଚାରୀମାନେ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ, ପ୍ରାଥମିକ ପର୍ଯ୍ୟାୟରେ ସିଦ୍ଧି ସ୍ପାଇସେସର କୁମିନ ପାଉଡର, ବ୍ଲାକ ପିପ୍ପର, କନ୍ଧମାଳ ହଳଦୀ ପାଉଡର, ଚିକେନ ମସଲା, କରିନଣ୍ଡର ପାଉଡର, ମସରୁମ ମସଲା, ଗରମ ମସଲା, ଚିଲି ପାଉଡର, ମଟନ ମସଲା ଆଦି ବଜାରରେ ଉପଲବ୍ଧ ହେବ। ଏପରିକି ଶୁଦ୍ଧ, ଦେଶୀ ଓ ଜୈବିକ ଉପାୟରେ ପ୍ରସ୍ତୁତ ଉପରୋକ୍ତ ମସଲାଗୁଡିକ ବର୍ତ୍ତମାନ ଓଡ଼ିଶା ବଜାରରେ ଉପଲବ୍ଧ ହେଉଛି।
ସିଦ୍ଧି ସ୍ପାଇସେସର ଏମ୍ଡି ପ୍ରତାପ କୁମାର ପ୍ରଧାନ କହିଥିଲେ, ଓଡ଼ିଶା ବଜାରରେ ଆମେ ଆମର ନୂତନ ମସଲା ଉଦ୍ୟୋଗର ଶୁଭାରମ୍ଭ କରି ବେଶ୍ ଉତ୍ସାହିତ ଅଛୁ। ଏପରିକି ଗ୍ରାହକଙ୍କୁ ଆମେ ଉନ୍ନତମାନର ମସଲା ସାଙ୍ଗକୁ ଗୁଣାତ୍ମକ ମାନ ଉତ୍ପାଦ ଯୋଗାଇବାକୁ ପ୍ରତିଶ୍ରୁତିବଦ୍ଧ ରହିଛୁ।
