ଭୁବନେଶ୍ୱର,୯।୪: ପାଖେଇ ଆସିଲାଣି ନିର୍ବାଚନ। ଏନେଇ ସବୁ ଦଳର ପ୍ରାର୍ଥୀ ଓହ୍ଲାଇଲେଣି ପ୍ରଚାର ମଇଦାନରେ। କୁହାଯାଉଛି ଏଥର ୨୪ରେ କଡା ଟକ୍କର ହେବାକୁ ଯାଉଛି। ମୁହାମୁହିଁ ହେବେ ହେଭିଓ୍ବେଟ୍। ପୂର୍ବରୁ ଭୁବନେଶ୍ୱର ଓ ସମ୍ବଲପୁରରେ ମହା ସଂଗ୍ରାମ ହେବ ବୋଲି କୁହାଯାଉଥିବାବେଳେ ଅନ୍ୟ ଜିଲାରେ ମଧ୍ୟ କଡା ଟକ୍କର ଦେଖିବାକୁ ମିଳିପାର। ତେବେ ୨୦୧୯ରେ ମଧ୍ୟ ଓଡିଶାର ବିଭିନ୍ନ ଅଞ୍ଚଳରେ ବିଜେଡି, ଭାଜପା ଓ କଂଗ୍ରେସ ମଧ୍ୟରେ କଡା ଟକ୍କର ଦେଖିବାକୁ ମିଳିଥିଲା। ଆସନ୍ତୁ ଜାଣିବା ଏ ସମ୍ପର୍କରେ…
ଗତ ନିର୍ବାଚନରେ ବଲାଙ୍ଗୀରର କଣ୍ଟାବାଂଜିରେ ହୋଇଥିଲା କାଣ୍ଟେ କା ଟକ୍କର। ବିଜେଡି, ଭାଜପା ଓ କଂଗ୍ରେସ ମଧ୍ୟରେ ଘମାଘୋଟ ଲଢେଇ ହୋଇଥିଲା। କଂଗ୍ରେସ ଏହି ଆସନରୁ ସନ୍ତୋଷ ସିଂ ସାଲୁଜାଙ୍କୁ ଟିକେଟ୍ ଦେଇଥିବାବେଳେ ଭାଜପା ଲକ୍ଷ୍ମଣ ବାଗ ଓ ବିଜେଡି ଅଜୟ କୁମାର ଦାସଙ୍କୁ ଟିକେଟ୍ ଦେଇଥିଲା। ଏଥିରେ ସାଲୁଜା ୬୪,୨୪୬ ଭୋଟ୍ ପାଇ ବିଜୟୀ ହୋଇଥିଲେ। ଲକ୍ଷ୍ମଣଙ୍କୁ ୬୪,୧୧୮ ଭୋଟ୍ ମିଳିଥିଲା। କହିରଖୁଛୁ କି, ଲକ୍ଷ୍ମଣ ମାତ୍ର ୧୨୮ ଭୋଟ୍ରେ ସାଲୁଜାଙ୍କ ଠାରୁ ପରାସ୍ତ ହୋଇଥିଲେ।
ସେହିପରି କୋରାପୁଟର ଲକ୍ଷ୍ମୀପୁରରେ ଦୁଇ ଦଳର ପ୍ରାର୍ଥୀଙ୍କ ଭିତରେ ହୋଇଥିଲା ଘମାଘୋଟ ଲଢେଇ। ବିଜେଡିରୁ ପ୍ରଭୁ ଜାନିଙ୍କୁ ୪୫ ହଜାର ୨୧୧ ଭୋଟ ମିଳିଥିବାବେଳେ କଂଗ୍ରେସର କୈଳାସ କୁଲେଶିକାଙ୍କୁ ୪୪ହଜାର ୯୮୨ ଭୋଟ୍ ମିଳିଥିଲା। ଏହି ନିର୍ବାଚନରେ କୈଳାସ, ପ୍ରଭୁଙ୍କ ଠାରୁ ୨୨୯ ଭୋଟ୍ରେ ପରାଜୟ ହୋଇଥିଲେ।
ଗଜପତିର ମୋହନାରେ କଂଗ୍ରେସର ଦାଶରଥି ଗମାଙ୍ଗ ଓ ବିଜେଡିର ପୂର୍ଣ୍ଣବାସୀ ନାୟକଙ୍କ ମଧ୍ୟରେ କଡା ଟକ୍କର ହୋଇଥିଲା। ଏଥିରେ ଦାଶରଥି ୫୩ହଜାର ୭୦୫ ଭୋଟ୍ ପାଇ ବିଜୟ ମୁକୁଟ ପିନ୍ଧିଥିଲେ। ପୂର୍ଣ୍ଣବାସୀ ଏଥିରେ ମାତ୍ର ୨୩୫୪ ଭୋଟ୍ରେ ପରାସ୍ତ ହୋଇଥିଲେ।
ଢେଙ୍କାନାଳର ପରଜଙ୍ଗରେ ବିଜେଡି ଓ ଭାଜପା ମଧ୍ୟରେ କଡା ଟକ୍କର ଦେଖିବାକୁ ମିଳିଥିଲା। ବିଜେଡିର ନୃସିଂହ ସାହୁ ୭୮ହଜାର ୭୪୭ ଭୋଟ୍ ପାଇଁ ବିଜୟୀ ହୋଇଥିଲେ। ଏଥିରେ ଭାଜପାର ବିଭୂତି ଭୂଷଣ ପ୍ରଧାନ ମାତ୍ର ୭୪୦ କମ୍ ଭୋଟ୍ ପାଇ ପରାସ୍ତ ହୋଇଥିଲେ।
ସୁନ୍ଦରଗଡ଼ର ରାଜଗାଙ୍ଗପୁରରେ ବିଜେଡି, ଭାଜପା ଓ କଂଗ୍ରେସ ମଧ୍ୟରେ ଜୋରଦାର ଲଢେଇ ହୋଇଥିଲା। ଯେଉଁଥିରେ କଂଗ୍ରେସର ରାଜନ ଏକ୍କା ୫୩ହଜାର ୯୧୮ ଭୋଟ୍ରେ ବିଜୟୀ ହୋଇଥିଲେ। ଅନ୍ୟପଟେ ବିଜେଡିର ମଙ୍ଗଳା କିଷାନ ମାତ୍ର ୯୪୬ ଭୋଟ୍ରେ ପରାସ୍ତ ହୋଇଥିଲେ।
ସେହିପରି କେନ୍ଦୁଝରରେ ବିଜେଡି ଓ ଭାଜପା ମଧ୍ୟରେ ଲଢେଇ ହୋଇଥିଲେ। ଏଥିରେ ମୋହନ ମାଝି ୭୨ ହଜାର ୭୬୦ ଭୋଟ୍ ପାଇ ବିଜୟୀ ହୋଇଥିବାବେଳେ ମାଧବ ସରକାର ମାତ୍ର ୧୧୨୪ କମ୍ ଭୋଟ୍ ପାଇ ପରାସ୍ତ ହୋଇଥିଲେ। ଏହି କ୍ରମରେ ଉଦଳାରେ ଭାଜପାର ଭାସ୍କର ମଢେଇ ୬୯ହଜାର ୭୨୫ ଭୋଟ୍ ପାଇ ବିଜୟୀ ହୋଇଥିବାବେଳେ ବିଜେଡିର ଶ୍ରୀନାଥ ସୋରେନ ୧୪୩୩ କମ୍ ଭୋଟ୍ ପାଇ ପରାସ୍ତ ହୋଇଥିଲେ।
ଏବେକାର ଚର୍ଚ୍ଚିତ ଅଞ୍ଚଳ ନୀଳଗିରି ସେବେମଧ୍ୟ ଚର୍ଚ୍ଚାର ଘେରକୁ ଆସିଥିଲା। ଭାଜପାର ସୁକାନ୍ତ ନାୟକ ୬୯ହଜାର ୫୧୭ ଭୋଟ୍ ପାଇ ବିଜେଡିର ସନ୍ତୋଷ ଖଟୁଆଙ୍କୁ ପରାସ୍ତ କରିଥିଲେ। ସନ୍ତୋଷ ତାଙ୍କ ଠାରୁ ମାତ୍ର ୧୫୭୭ କମ୍ ଭୋଟ୍ ପାଇଁ ହାରିଥିଲେ। ସେହପରି ବ୍ରହ୍ମଗିରରେ ଭାଜପାର ଲଳିତେନ୍ଦୁ ବିଦ୍ୟାଧର ମହାପାତ୍ର ୮୮ହଜାର ୨୫୬ ଭୋଟ୍ ପାଇ ଜିତିଥିବାବେଳେ ବିଜେଡିର ସଂଜୟ ଦାଶବର୍ମା ମାତ୍ର ୨୧୩୦ କମ୍ ଭୋଟ ପାଇ ପରାସ୍ତ ହୋଇଥିଲେ।
