ସାକ୍ଷୀଗୋପାଳ,୧୮।୩ (ସ୍ବ.ପ୍ର./ ଡି.ଏନ୍.ଏ.): ପୁରୀ ଜିଲାର ପ୍ରସିଦ୍ଧ ଶୁକଳ ମେଳଣ ବେଶ୍ ମହାସମାରୋହରେ ପାଳିତ ହେଉଛି। ତେବେ ମେଳଣରେ ମୁଖ୍ୟ ଆକର୍ଷଣ ସାଜିଥିଲା ବିଭିନ୍ନ ବ୍ଲକରୁ ଠାକୁରଙ୍କ ନେଇ ଆସିଥିବା ୨୦୦ରୁ ଊର୍ଦ୍ଧ୍ୱ ସୁସଜ୍ଜିତ ଦୋଳବିମାନ। ବିମାନରେ ପ୍ରତ୍ୟେକ ଗ୍ରାମର ଆରାଧ୍ୟ ଠାକୁର ଓ ଠାକୁରାଣୀ ଥିବାବେଳେ ମେଳଣ ପଡ଼ିଆରେ ବିରାଜମାନ କରିଥିଲେ। ଏହାର ଥାନାପତି ଭାବେ ତୃତୀୟା ଦେବ ଜଗନ୍ନାଥ ବିରାଜମାନ କରିଛନ୍ତି। ଥାନପତି ତୃତୀୟା ଦେବ ପ୍ରଭୁ ଶ୍ରୀଜଗନ୍ନାଥ ଖୋର୍ଦ୍ଧାର ରାଜା ଦ୍ୱିତୀୟ ରାମଚନ୍ଦ୍ର ଦେବଙ୍କ ସମୟରେ ପ୍ରତିଷ୍ଠା ହୋଇଥିଲେ।
ପ୍ରଥମେ ମେଳଣ ପଡ଼ିଆରେ ତୃତୀୟା ଦେବ ଜଗନ୍ନାଥଙ୍କ ବିରାଜମାନ ପରେ ଶୁକଳ ନିକଟସ୍ଥ ମାର୍କଣ୍ଡ ପଡାର ହରଶିବ ଶ୍ରୀ ନୀଳକଣ୍ଠେଶର ଦେବ ଠାକୁର ବିରାଜମାନ କରିଥିଲେ। ଏହାପରେ ସତ୍ୟବାଦୀ, ବ୍ରହ୍ମଗିରି, ପୁରୀ ସଦର, କଣାସ ଓ ଡେଲାଙ୍ଗ ବ୍ଲକର ବିଭିନ୍ନ ଗ୍ରାମର ୨୦୦ରୁ ଊର୍ଦ୍ଧ୍ୱ ସୁସଜ୍ଜିତ ବିମାନରେ ଠାକୁରଙ୍କ ସହ ବିରାଜମାନ କରିଥିଲେ। ଏହି ମେଳଣର ମୁଖ୍ୟ ପୃଷ୍ଠପୋଷକ ଥିଲେ ତତ୍କାଳୀନ ଏମାର ମଠ ମହନ୍ତ ଗଦାଧର ରାମାନୁଜ ଦାସ ମହାରାଜ। ଏଠାରେ ଏମାର ମଠର ଏକ ଖମାର ମଠ ଥିଲା। ମେଲଣଟି ଦଶଦୋଳ ହୋଇଥିବାରୁ ଏହା ଦୋଳ ପୂର୍ଣ୍ଣିମା ପରେ ନବମୀ ଦଶମୀ ଏକାଦଶୀ ୩ ଦିନ ଧରି ଅନୁଷ୍ଠିତ ହୋଇଥାଏ। ଏହି ମେଳଣରେ ଗ୍ରାମାଞ୍ଚଳର ଗୃହ ଉପକରଣ ବିକ୍ରି ବଟା ସହ କୃଷି ଉପକରଣ ବିକ୍ରି ହୋଇଥିଲା। ମନୋରଞ୍ଜନ ପାଇଁ ସ୍ଥାନୀୟ ଯାତ୍ରା କମିଟି ଦ୍ୱାରା ପ୍ରତିଷ୍ଠିତ ଯାତ୍ରା ପାର୍ଟିଙ୍କୁ ନେଇ ଯାତ୍ରା ପରିବେଷଣ କରାଯିବା ସହ ରାମଲୀଳା ମଧ୍ୟ ହୋଇଥିଲା। ଏହି ମେଳଣ ଦେଖିବା ପାଇଁ ବିଭିନ୍ନ ବ୍ଲକରୁ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଥିଲା।
