ଭୁବନେଶ୍ୱର,୭।୩ : ପ୍ରତିବର୍ଷ ପରି ଚଳିତବର୍ଷ ମଧ୍ୟ ସ୍ଥାନୀୟ ଜନତା ମଇଦାନଠାରେ ୧୮ତମ ହୋମ୍ ଆଣ୍ଡ ଡେକୋର ସାଙ୍ଗକୁ ୧୮ତମ ଇଣ୍ଡିଆ ଇଣ୍ଟରନ୍ୟାଶନାଲ ମେଗା ଟ୍ରେଡ୍ ଫେୟାର-୨୦୨୩ ସୋମବାର ଉଦ୍ଯାପିତ ହୋଇଯାଇଛି। ଏପରିକି ଚଳିତ ବର୍ଷ ଫେବୃୟାରୀ ୨୫ରୁ ଆରମ୍ଭ ହୋଇଥିବା ଏହି ଦ୍ୱୈତ ମେଳା ଆନୁଷ୍ଠାନିକ ଭାବେ ଶେଷ ହୋଇଥିବା ଆୟୋଜକଙ୍କ ପକ୍ଷରୁ କୁହାଯାଇଛି। ଉକ୍ତ ମେଳାର ଉଦ୍ଯାପନୀ ଉତ୍ସବରେ ଶିଳ୍ପମନ୍ତ୍ରୀ ପ୍ରତାପ କେଶରୀ ଦେବ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଜାତୀୟ କ୍ଷୁଦ୍ର ଶିଳ୍ପ ନିଗମ ଲିଃ ତଥା ଜାତୀୟ ଏସ୍ସି-ଏସ୍ଟି ହବ୍ ଭୁବନେଶ୍ୱରର ଶାଖା ପରିଚାଳକ ଶୁଭାଶିଷ୍ ଦାସ, କ୍ରେଡାଇ ଭୁବନେଶ୍ୱରର ସଭାପତି ପ୍ରଦୀପ୍ତ କୁମାର ବିଶ୍ୱାସରାଏ, ଉପସଭାପତି ସୂର୍ଯ୍ୟକାନ୍ତ ନନ୍ଦ ଏବଂ ଜିଏସ୍ ମାର୍କେଟିଂର ନିର୍ଦ୍ଦେଶକ ଚିଦ୍ରୁଦ୍ ସାହା ପ୍ରମୁଖ ଉପସ୍ଥିତ ଥିଲେ। ଏହି ପରିପ୍ରେକ୍ଷୀରେ ମନ୍ତ୍ରୀ ଦେବ କହିଥିଲେ, ପ୍ରତିଟି ମେଳା ସବୁ ବର୍ଗର ଲୋକଙ୍କୁ ଉତ୍ସାହିତ କରିଥାଏ। ଏପରିକି ମେଳାର ବିଶେଷ ଗ୍ରାହକ ଥାଆନ୍ତି। ସେହିଭଳି ଦେଶର ସମସ୍ତ ପୁଞ୍ଜିନିବେଶକାରୀଙ୍କୁ ଓଡ଼ିଶାରେ ଥିବା ଖଣିଜ ସମ୍ପଦ ବ୍ୟବହାରକରି ଶିଳ୍ପ ନିର୍ମାଣ ନିମନ୍ତେ ନିମନ୍ତ୍ରଣ କରାଯାଉଛି। ଏପରିକି ସରକାରଙ୍କ ସହଯୋଗରେ ପୁଞ୍ଜିନିବେଶ କରିବାକୁ ମନ୍ତ୍ରୀ ଦେବ ଆହ୍ବାନ କରିଛନ୍ତି। ଅପରପକ୍ଷରେ ଉପରୋକ୍ତ ୨ଟି ମେଳାରେ ୯ଟି ଦେଶ ଏବଂ ୧୬ଟି ରାଜ୍ୟର ବ୍ୟବସାୟୀ ସେମାନଙ୍କର ଭିନ୍ନ ଭିନ୍ନ ବ୍ୟବସାୟର ପସରା ଖୋଲିଥିଲା ବେଳେ ଏହି ୧୦ଦିନ ମଧ୍ୟରେ ପ୍ରାୟ ଅଢ଼େଇ ଲକ୍ଷରୁ ଊର୍ଦ୍ଧ୍ୱ ଲୋକ ମେଳା ବୁଲିବାକୁ ଆସିଥିଲେ। ସେହିଭଳି ଗ୍ରାହକଙ୍କ ପସନ୍ଦର ଅନୁଯାୟୀ ସାମଗୀ ସାଙ୍ଗକୁ ଖାଦ୍ୟପେୟ ଓ ଆସବାବପତ୍ର ସମେତ ଅନ୍ୟାନ୍ୟ ଘରକରଣା ଦ୍ରବ୍ୟମାନ ଗୋଟିଏ ସ୍ଥାନରେ ପାଇପାରିଥିବାରୁ ସବୁ ବର୍ଗର ଗ୍ରାହକ ସେ ସବୁକୁ କିଣିବା ସହ ଖୁସି ବ୍ୟକ୍ତ କରିଛନ୍ତି। ଏହା ସହିତ କ୍ରେଡାଇ ଭୁବନେଶ୍ୱର ପକ୍ଷରୁ ସ୍ବତନ୍ତ୍ର ଭାବେ ଏକ ଜୋନ୍ରେ ରିୟଲ ଇଷ୍ଟେଟ ସମ୍ବନ୍ଧିତ ସମସ୍ତ ସୂଚନା ଓ ପ୍ରକଳ୍ପକୁ ଏକ ବୃହତ୍ ଷ୍ଟଲ୍ ଜରିଆରେ ପ୍ରଦର୍ଶନ କରିଥିଲେ।
