ୱାଶିଂଟନ/ସିଙ୍ଗାପୁର, ୩୦ା୪:ଚନ୍ଦ୍ର ପୃଷ୍ଠରେ ମଣିଷ ରହିବା ଏବେ ଆଉ କେବଳ କଳ୍ପନା ହୋଇ ରହିନାହିଁ। ଆସନ୍ତା ୨୦୩୦ ସୁଦ୍ଧା ଚନ୍ଦ୍ରରେ ଏକ ସ୍ଥାୟୀ ମାନବ ବସତି ସ୍ଥାପନ ପାଇଁ ମହାକାଶ ବୈଜ୍ଞାନିକମାନେ ଏକ ବ୍ଲୁ-ପ୍ରିଣ୍ଟ୍ ପ୍ରସ୍ତୁତ କରିଛନ୍ତି। ଭଏଜର୍ ସ୍ପେସ୍ର ଚେୟାରମ୍ୟାନ ତଥା ସିଇଓ ଡିଲାନ୍ ଟେଲର ସିଙ୍ଗାପୁରରେ ଆୟୋଜିତ ଏକ ସମ୍ମିଳନୀରେ ଏହି ସୂଚନା ଦେଇ କହିଛନ୍ତି ଯେ, ୨୦୨୯ ପୂର୍ବରୁ ମଣିଷ ଚନ୍ଦ୍ରରେ ପହଞ୍ଚତ୍ବା ସହ ସେଠାରେ ରହିବା ପାଇଁ ପ୍ରାରମ୍ଭିକ ଭିତ୍ତିଭୂମି ପ୍ରସ୍ତୁତ ହୋଇସାରିଥିବ।
ଏହି ଅଭିଯାନର ସବୁଠାରୁ ଆଧୁନିକ ଦିଗ ହେଉଛି ‘ଇନଫ୍ଲେଟେବଲ୍ ହାବିଟାଟ୍’ ବା ଫୁଲି ପାରୁଥିବା ବାସସ୍ଥାନ। ଟେଲରଙ୍କ ଅନୁଯାୟୀ, ଏହି ସ୍ବତନ୍ତ୍ର ଢାଞ୍ଚାଗୁଡ଼ିକ ରକେଟ୍ରେ ବହୁତ କମ୍ ସ୍ଥାନ ନେଇଥାଏ, ଯାହାକୁ ପଠାଯିବ ସହଜ। କିନ୍ତୁ ଚନ୍ଦ୍ର ପୃଷ୍ଠରେ ପହଞ୍ଚତ୍ବା ପରେ ତାହା ନିଜର ପ୍ରକୃତ ଆକାରଠାରୁ ପ୍ରାୟ ୨୦ ଗୁଣ ପର୍ଯ୍ୟନ୍ତ ବୃଦ୍ଧି ପାଇପାରିବ। ଅର୍ଥାତ୍ ଚନ୍ଦ୍ର ପୃଷ୍ଠରେ ପହଞ୍ଚତ୍ବା ପରେ ସେଗୁଡ଼ିକ ଏକ ବଡ଼ କୋଠରି ଭଳି ଫୁଲିଯିବ। ସେଥିରେ ମହାକାଶଚାରୀମାନେ ରହି କାର୍ଯ୍ୟ କରିପାରିବେ। ଏହି ପ୍ରଯୁକ୍ତିବିଦ୍ୟା ପାଇଁ ଭଏଜର୍ ସ୍ପେସ୍ ଏବଂ ‘ମ୍ୟାକ୍ସ ସ୍ପେସ୍’ ମିଳିତ ଭାବେ କାର୍ଯ୍ୟ କରୁଛନ୍ତି। ଭବିଷ୍ୟତର ଏହି ପରିକଳ୍ପନାକୁ ବର୍ଣ୍ଣନା କରି ଡିଲାନ୍ ଟେଲର କହିଛନ୍ତି, ୨୦୩୦ ଦଶକର ପ୍ରାରମ୍ଭରେ ଆପଣ ନିଜ ଘର ବାରଣ୍ଡାରୁ ଚନ୍ଦ୍ରକୁ ଚାହିଁଲେ ସେଠାରେ ଜଳୁଥିବା ଆଲୋକ ଦେଖିବାକୁ ପାଇବେ, କାରଣ ସେତେବେଳେ ମଣିଷ ସେଠାରେ ରହୁଥିବେ ଏବଂ କାର୍ଯ୍ୟ କରୁଥିବେ।
କେବଳ ଭଏଜର୍ ସ୍ପେସ୍ ନୁହେଁ, ବରଂ ଏଲନ ମସ୍କଙ୍କ ‘ସ୍ପେସ୍-ଏକ୍ସ’ ଏବଂ ଜେଫ୍ ବେଜୋସ୍ଙ୍କ ‘ବ୍ଲୁ ଓରିଜିନ’ ମଧ୍ୟ ଚନ୍ଦ୍ରରେ ସ୍ଥାୟୀ ବସତି ପାଇଁ ଦୌଡ଼ରେ ସାମିଲ ଅଛନ୍ତି। ଏଥିସହିତ ଆମେରିକା ସରକାର ନିକଟରେ ‘ନାସା ଅଥରାଇଜେଶନ ଆକ୍ଟ-୨୦୨୬’ ମାଧ୍ୟମରେ ଚନ୍ଦ୍ରରେ ଏକ ଆଉଟ୍ପୋଷ୍ଟ ନିର୍ମାଣ ପାଇଁ ପାଣ୍ଠି ଯୋଗାଇବାକୁ ଯୋଜନା କରୁଛନ୍ତି, ଯାହା ଚନ୍ଦ୍ର ପୃଷ୍ଠରେ ଚାଇନା ପୂର୍ବରୁ ଆମେରିକାର ଆଧିପତ୍ୟକୁ ସ୍ପଷ୍ଟ କରିବ।
ତେବେ ଚନ୍ଦ୍ରରେ ବସତି ସ୍ଥାପନ କରିବା ଏତେ ସହଜ ନୁହେଁ। ବୈଜ୍ଞାନିକଙ୍କ କହିବାନୁଯାୟୀ, ଦିନରେ ୨୫୦ ଡିଗ୍ରୀ ଫାରେନହିଟ୍ ଉତ୍ତାପ ଏବଂ ରାତିରେ ମାଇନସ୍ ୩୦୦ ଡିଗ୍ରୀ ଫାରେନହିଟ୍ର ପ୍ରବଳ ଶୀତ ସହିତ ବିକିରଣ ଓ ମାରାତ୍ମକ ଚନ୍ଦ୍ର-ଧୂଳିର ସାମ୍ନା କରିବା ପାଇଁ ଉନ୍ନତ ‘ଲାଇଫ୍ ସପୋର୍ଟ ସିଷ୍ଟମ୍’ ପ୍ରସ୍ତୁତ କରାଯାଉଛି। ଏହି ଲୁନାର୍ ବେସ୍ କେବଳ ଚନ୍ଦ୍ରରେ ଗବେଷଣା କରିବାରେ ସାହାଯ୍ୟ କରିବ ନାହିଁ, ବରଂ ମଙ୍ଗଳ ଗ୍ରହ ଭଳି ଦୂରବର୍ତ୍ତୀ ମହାକାଶ ଅଭିଯାନ ପାଇଁ ଏହା ପ୍ରବେଶ ପଥ ଭାବେ କାର୍ଯ୍ୟ କରିବ। ୨୦୩୦ ସୁଦ୍ଧା ଏହି ପ୍ରକଳ୍ପକୁ କାର୍ଯ୍ୟକାରୀ କରିବା ପାଇଁ ନାସା ଏବଂ ବିଭିନ୍ନ ଘରୋଇ ସଂସ୍ଥା ଏବେ ଦ୍ରୁତ ଗତିରେ କାର୍ଯ୍ୟ କରୁଛନ୍ତି। ଯଦି ଏହି ଯୋଜନା ସଫଳ ହୁଏ, ତେବେ ମାନବ ସଭ୍ୟତା ପାଇଁ ପୃଥିବୀ ବାହାରେ ଏହା ପ୍ରଥମ ସ୍ଥାୟୀ ବସତି ହେବ।
Dharitri – Odisha’s No.1 Odia Daily
