ଦିଗପହଣ୍ଡି,୨୮।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଥାନା କୁମ୍ଭଝରି ଗ୍ରାମ ନିକଟ ଦୁର୍ଗମ କେରାଣ୍ଡିିମାଳ ଜଙ୍ଗଲରେ ମଙ୍ଗଳବାର ଭୋର ପ୍ରାୟ ୫ଟା ସମୟରେ ଚୋରା ମଦ ଧରପଗଡ ପାଇଁ ଦିଗପହଣ୍ଡି ଥାନା ଆଇଆଇସି କିଶୋର କୁମାର ସାମଲଙ୍କ ନେତୃତ୍ୱରେ ପୋଲିସ ଟିମ୍ ଏବଂ ବ୍ରହ୍ମପୁର ସଦର ଅବକାରୀ ଇନ୍ସପେକ୍ଟର ବି.ମନୋଜ କୁମାର, ଷ୍ଟ୍ରାଇକିଂ ଫୋର୍ସ ଏସ.ଆଇ ମନୀଷା ଭୋଳ,ଗୋଇନ୍ଦା ଇନ୍ସପେକ୍ଟର ବ୍ରଜ କିଶୋର ବିନ୍ଧାଣି,ଏଏସଆଇ ଉମାରାଣୀ ମହାନ୍ତି,ଦିଗପହଣ୍ଡି ଅବକାରୀ ଥାନା ଏଏସଆଇ ଏନ୍ . ତ୍ରିପତି ସଦଳବଳେ ଅତର୍କିତ ଚଢାଉ କରି ୭୪୪ ଲିଟର ଦେଶୀମଦ ଜବତ କରିବା ସହ ୮୪୦୦ ଲିଟର ମଦ ପୋଚ ନଷ୍ଟ କରିଥିବା ଜଣାପଡିଛି । ଏହି ସମୟରେ ପୋଲିସ କୁମ୍ଭଝରି ଗ୍ରାମର ମାର୍କଣ୍ଡ ମଲ୍ଲିକ(୬୦) ଙ୍କୁ ଗିରଫ କରିବା ସହ ତାଙ୍କ ନିକଟରୁ ୩୦ ଲିଟର ଅପମିଶ୍ରିତ ଦେଶୀ ରନ୍ଧାମଦ ଜବତ କରିଥିଲେ। ଅଭିଯୁକ୍ତଙ୍କ ବିରୋଧରେ ଥାନା ମାମଲା ନଂ.୧୮୯/୨୬ ଅନୁଯାୟୀ ମକଦ୍ଦମା ରୁଜୁ କରାଯିବା ସହ ଅପରାହ୍ନରେ ଅଭିଯୁକ୍ତଙ୍କୁ ବ୍ରହ୍ମପୁର ସଦର କୋର୍ଟ କୁ ଚାଲାଣ କରାଯାଇଥିଲା। ଜାମିନ ଆବେଦନ ନାମଞ୍ଜୁର ହେବାରୁ ତାଙ୍କୁ ବ୍ରହ୍ମପୁର ଜେଲ ହାଜତକୁ ପଠାଇ ଦିଆଯାଇଛି।
ସେହିପରି ବ୍ରହ୍ମପୁର ସଦର ଅବକାରୀ ଇନ୍ସପେକ୍ଟର କୁମ୍ଭଝରି ଗ୍ରାମ ତଳସାହି ର ରଘୁନାଥ ମଲ୍ଲିକ(୪୩) ଏବଂ ଅଶୋକ କୁମାର ମଲ୍ଲିକ(୩୨)ଙ୍କଠାରୁ ୪୦ ଲିଟର ଅପମିଶ୍ରିତ ଦେଶୀମଦ ଜବତ କରି ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ।ଜାମିନ ଆବେଦନ ନାମଞ୍ଜୁର ହେବାରୁ ଉଭୟ ଙ୍କୁ ବ୍ରହ୍ମପୁର ଜେଲ ହାଜତକୁ ପଠାଇ ଦିଆଯାଇଛି। ଷ୍ଟ୍ରାଇକିଂ ଫୋର୍ସ ଏସ.ଆଇ ତଳ କୁମ୍ଭଝରି ଗ୍ରାମର ସୁରେନ୍ଦ୍ର ମଲ୍ଲିକ(୫୦)ଙ୍କ ନିକଟରୁ ୨୫ ଲିଟର ଅପମିଶ୍ରିତ ଦେଶୀମଦ ଜବତ କରିବା ପରେ ତାଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି।ଅବକାରୀ ଗୋଇନ୍ଦା ଇନ୍ସପେକ୍ଟର କୁମ୍ଭ ଝରି ବନ୍ଧ ସାହିର ମହିଳା ଲକ୍ଷ୍ମୀ ମଲ୍ଲିକ(୨୮)ଙ୍କ ନିକଟରୁ ୧୯ ଲିଟର ଅପମିଶ୍ରିତ ଦେଶୀମଦ ଜବତ କରି ତାଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛନ୍ତି।
ଅଭିଯୁକ୍ତ ମାନଙ୍କ ଜାମିନ ଆବେଦନ ନାମଞ୍ଜୁର ହେବାରୁ ସେମାନଙ୍କୁ ବ୍ରହ୍ମପୁର ଜେଲ ହାଜତକୁ ପଠାଇ ଦିଆଯାଇଛି। ଜଙ୍ଗଲ ମଧ୍ୟରୁ ଚୋରା ଚାଲାଣ ପାଇଁ ମହଜୁଦ ଥିବା ୬୩୦ ଲିଟର ଅପମିଶ୍ରିତ ଦେଶୀମଦକୁ ଅବକାରୀ କର୍ମଚାରୀ ବୃନ୍ଦ ଜବତ କରିଥିବା ଜଣାପଡିଛି। ଉକ୍ତ ପାହାଡିଆ ଜଙ୍ଗଲରେ କିଛି ବ୍ୟକ୍ତି ଅପମିଶ୍ରିତ ବିଷାକ୍ତ ମଦ ପ୍ରସ୍ତୁତ କରି ବିଭିନ୍ନ ଗ୍ରାମକୁ ବେଆଇନ ଭାବେ ଯୋଗାଇ ଆସୁଥିବା ପୁଲିସ ଏବଂ ଅବକାରୀ ବିଭାଗକୁ ବିଶେଷ ସୁତ୍ରରୁ ଖବର ମିଳିଥିଲା । ଏହି ପରିପ୍ରେକ୍ଷୀରେ ମଙ୍ଗଳବାର ଭୋରରୁ ଏହି ଜଙ୍ଗଲର ଚଢାଉ କରାଯାଇଥିଲା । ସେହି ସମୟରେ ଅଭିଯୁକ୍ତମାନଙ୍କୁ କାବୁ କରାଯାଇଥିବା ବେଳେ ଅନ୍ୟ କିଛି ଅଭିଯୁକ୍ତ ଫେରାର ହୋଇଯାଇଥିବା ଜଣାପଡ଼ିଛି ।
