ଗୁଣପୁର,୨୯ା୪(ସଙ୍କେତ ପାତ୍ର): ବୁଧବାର ସନ୍ଧ୍ୟାରେ ରାୟଗଡ଼ା ଜିଲା ଗୁଣପୁର ଶିବାନନ୍ଦ ମନ୍ଦିର ନିକଟସ୍ଥ ଏକ ନଡ଼ିଆ ଗଛରେ ବିଜୁଳି ପଡ଼ିଥିବା ଦେଖିବାକୁ ମିଳିଛି। ଘଟଣାଟି ଦେଖି ଆଖପାଖ ଅଞ୍ଚଳରେ ଭୟ ଓ ଆତଙ୍କର ପରିବେଶ ସୃଷ୍ଟି ହୋଇଛି।
ବିଜୁଳି ପଡ଼ିବାର କିଛି ସମୟ ପୂର୍ବରୁ ଜୋର୍ରେ ପବନ ବହୁଥିବା ସହ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହୋଇଯାଇଥିବା ଦେଖାଯାଇଥିଲା। ହଠାତ୍ ବିଜୁଳି ବା ଚଡ଼କ ପଡ଼ିବା ସମୟର ଭୟଙ୍କର ଶବ୍ଦ ଓ ଆଲୋକ ଦୃଶ୍ୟ ଉପସ୍ଥିତ ଲୋକଙ୍କୁ ଆଶ୍ଚର୍ଯ୍ୟଚକିତ କରିଦେଇଥିଲା। ବାରମ୍ବାର ଘଡ଼ଘଡ଼ି ଓ ଚଡ଼କ ଶବ୍ଦରେ ଗୁଣପୁର ସହର ଆଜି କମ୍ପି ଉଠିଥିଲା। ଏହା ସହ ବର୍ଷା ଜୋର୍ରେ ହୋଇଥିବା ବେଳେ ଲୋକେ ରାସ୍ତାରୁ ଭୟରେ ନିକଟସ୍ଥ ଘରେ ଆଶ୍ରୟ ନେଇଥିବା ଦେଖିବାକୁ ମିଳିଛି।
ଏହାସହ ଗତ ଦୁଇଦିନ ତଳେ ପାଣିପାଗ ବିଭାଗ ପକ୍ଷରୁ ତିନିରୁ ୪ଟି ଜିଲା ପାଇଁ ୟେଲୋ ଓ୍ବାର୍ନିଂ ଜାରି କରାଯାଇଥିବା ସୂଚନା ମିଳିଥିଲା। ଯାହାର ପ୍ରଭାବ ଆଜି ସନ୍ଧ୍ୟାରେ ଗୁଣପୁରରେ ସ୍ପଷ୍ଟ ଭାବେ ଦେଖିବାକୁ ମିଳିଛି।
ଘଟଣା ପରେ ଦମକଳ ବାହିନୀ ଗାଡ଼ି ସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିବା ସହ ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରୁଛନ୍ତି। ବର୍ତ୍ତମାନ ଯାଏ କୌଣସି ପ୍ରାଣହାନି ହୋଇ ନ ଥିବା ଖବର ମିଳିଛି।
