କଲମ୍ବୋ,୨୯ା୪: ରାଷ୍ଟ୍ରପତି ଅନୁରା କୁମାରା ଦିସାନାୟକେଙ୍କ ଅନୁରୋଧ ପରେ ଶ୍ରୀଲଙ୍କା କ୍ରିକେଟ୍(ଏସ୍ଏଲ୍ସି) ମୁଖ୍ୟ ଶାମି ସିଲ୍ଭା ଓ କାର୍ଯ୍ୟକାରୀ କମିଟିର ସଦସ୍ୟମାନେ ଏକ ସ୍ବତନ୍ତ୍ର ବୈଠକରେ ସେମାନଙ୍କ ପଦବୀରୁ ଇସ୍ତଫା ଦେଇଛନ୍ତି। ୩ ଘଣ୍ଟା ଧରି ଚାଲିଥିବା ବୈଠକରେ ଖୁବ୍ ବିଚାରବିମର୍ଶ ପରେ ଏହି ନିଷ୍ପତ୍ତି ନିଆଯାଇଛି।
ସିଲ୍ଭାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକ ପରେ କାର୍ଯ୍ୟକାରୀ କମିଟିର ସଦସ୍ୟମାନେ କ୍ରୀଡ଼ାମନ୍ତ୍ରୀ ସୁନୀଲ କୁମାର ଗାମେଜଙ୍କୁ ଇସ୍ତଫାପତ୍ର ପଠାଇଛନ୍ତି। ଅନ୍ତର୍ଜାତୀୟ କ୍ରିକେଟ୍ରେ ଶ୍ରୀଲଙ୍କା ଦଳର ଖରାପ ପ୍ରଦର୍ଶନ ଓ ଖେଳାଳିଙ୍କଠାରୁ ଅଭିଯୋଗ କାରଣରୁ ସରକାର ଗତ ମାର୍ଚ୍ଚରୁ ସିଲ୍ଭାଙ୍କୁ ହଟାଇବାକୁ ଚାହୁଁଥିଲେ।
ଅନ୍ତରୀଣ ଭାବେ ଏସ୍ଏଲ୍ସିର ଦୈନନ୍ଦିନ କାର୍ଯ୍ୟକଳାପ ପରିଚାଳନା ଲାଗି ସରକାର ନାମ ନିର୍ଦ୍ଧାରଣ କରିସାରିଛନ୍ତି। ସିଲ୍ଭା ୨୦୧୯ରେ ଏସ୍ଏଲ୍ସି ସଭାପତି ଭାବେ ବହୁମତରେ ପ୍ରଥମେ ନିର୍ବାଚିତ ହୋଇଥିଲେ। ଏହାପରେ ନିର୍ଦ୍ୱନ୍ଦ୍ୱରେ ୨୦୨୧, ୨୦୨୩ ଓ ୨୦୨୫ରେ ନିର୍ବାଚିତ ହୋଇଥିଲେ। ୨୦୨୫ରେ ଭାରତର ଜୟ ଶାହାଙ୍କ ବିଦାୟ ପରେ ସିଲ୍ଭା ଏସିଆନ୍ କ୍ରିକେଟ୍ କାଉନ୍ସିଲ ସଭାପତି ଦାୟିତ୍ୱରେ ରହିଛନ୍ତି।
