ମୋହନା,୨୯ା୪(ମନ୍ମଥ ମିଶ୍ର): ଗଜପତି ଜିଲା ମୋହନା ଅଞ୍ଚଳରେ ବୁଧବାର ସନ୍ଧ୍ୟାରେ ବିଭିନ୍ନ ଅଞ୍ଚଳରେ ପବନ ଘଡ଼ଘଡ଼ି ସହ କୁଆପଥର ଏବଂ ପ୍ରବଳ ବର୍ଷା ହୋଇଛି। ଫଳରେ ଲୋକେ ତାତିରୁ ସାମାନ୍ୟ ଆଶ୍ୱସ୍ତି ଅନୁଭବ କରିଛନ୍ତି।
ଗଜପତି ଜିଲା ମୋହନା ସମେତ ଅଡ଼ବା, ପାଣିଗଣ୍ଡା, କଟାମା ସହ ବିଭିନ୍ନ ଅଞ୍ଚଳରେ ସନ୍ଧ୍ୟାରେ ପବନ ଘଡ଼ଘଡ଼ି ସହ ପ୍ରବଳ ବର୍ଷା ହୋଇଥିବା ବେଳେ ମୋହନା ବ୍ଲକର ବିଭିନ୍ନ ଅଞ୍ଚଳରେ କୁଆପଥର ବର୍ଷା ହୋଇଛି। ପ୍ରାୟ ଦେଢ଼ ଘଣ୍ଟା କାଳ ପ୍ରବଳ ବର୍ଷା ଅଞ୍ଚଳରେ ହୋଇଥିଲା। ଯାହା ଫଳରେ ଲିଲିଗଡ଼ ଗ୍ରାମ ପଞ୍ଚାୟତ କାମିଳିଗୁଡା ଗାଁର ତିଳୋତ୍ତମା ରଇତ (୫୨)ଙ୍କ ଘର ଭାଙ୍ଗିବା ସହ ଗାଁର ଲକି ମଳିକ ( ୧୪ )ଙ୍କ ଉପରେ ସେହି ଘରର ଏକ କାନ୍ଥ ପଡ଼ିଯାଇଥିଲା। ଯାହା ଫଳରେ ଗ୍ରାମବାସୀ ଉଦ୍ଧାର କରି ତାଙ୍କୁ ମୋହନା ମେଡିକାଲରେ ଭର୍ତ୍ତି କରି ଚିକିତ୍ସା କରାଉଛନ୍ତି । ଅନ୍ୟପଟେ କେସେରା ଗ୍ରାମ ମୁଖ୍ୟ ରାସ୍ତାରେ ଏକ ବିରାଟକାୟ ଗଛ ପଡ଼ି ମୋହନାଠାରୁ ଗଞ୍ଜାମ ଜିଲା ବଡ଼ଗଡ଼କୁ ସଂଯୋଗ କରୁଥିବା ରାସ୍ତା ଅବରୋଧ ହୋଇଥିଲା। ଖବରପାଇ ମୋହନା ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି କଟର ମେଶନି ମାଧ୍ୟମରେ ରାସ୍ତାରୁ ଗଛକୁ ହଟାଇଥିଲେ।
ଗତ କିଛି ଦିନଧରି ଗ୍ରୀଷ୍ମ ପ୍ରବାହ ଯୋଗୁ ଲୋକେ ଘରୁ ବାହାରିବା ମୁସ୍କିଲ ହୋଇ ପଡ଼ିଥିବାବେଳେ ଗତ କାଲି ଓ ଆଜି ସନ୍ଧ୍ୟାରେ ମୋହନାର ବିଭିନ୍ନ ଅଞ୍ଚଳରେ ବର୍ଷା ଯୋଗୁ ପାଗର ପରିବର୍ତ୍ତନ ହେବା ସହ ଲୋକେ ତାତିରୁ ଆଶ୍ୱସ୍ତି ଅନୁଭବ କରିଛନ୍ତି।
